نامور ڈائریکٹر اور کئی بلاک بسٹر فلموں کی ہدایت کے فرائض انجام دینے والے ایٹلی نے کہا ہے کہ اب وہ جو فلم بنارہے ہیں اس پر بھارت کو فخر ہوگا۔

بلاک بسٹر فلم ’جوان‘ میں کنگ شاہ رخ خان کے ساتھ ساؤتھ فلم ڈائریکٹر ایٹلی نے یادگار اشتراک کیا تھا اور یہ فلم مداحو اور ناقدین دنوں کو کافی پسند آئی تھی، اب ایٹلی ایک اور بڑے سُپراسٹار سلمان خان کے ساتھ فلم کررہے ہیں جس کے بارے میں انھوں نے اظہار خیال کیا ہے۔

ایک انٹرویو میں جب ہدایت کار ایٹلی سے سلمان خان اور ان کے پروجیکٹ اے 6 میں ان کی پوری اسٹار کاسٹ کے بارے میں پوچھا گیا تو ہدایت کار نے کہا کہ میں اس فلم کی کاسٹنگ سے سب کو حیران کرنے والا ہوں۔

ایٹلی نے کہا کہ میں ایک بڑا سرپرائز دوں گا، میں ایک ایسی فلم بنانے جا رہا ہوں جس سے ہمارے ملک کو فخر محسوس ہوگا، میں چاہتا ہوں کہ میرے تمام پرستار اور ناظرین اس فلم کے لیے دعا کریں، فلم کی کاسٹنگ پر کام جاری ہے اور چند دنوں سب سامنے آجائے گا۔

سلمان خان 27 دسمبر کو اپنی سالگرہ منانے جا رہے ہیں، اس موقع پر بالی ووڈ کے بھائی جان کوئی تحفہ دے سکتے ہیں ویسے 2025 میں عید کے موقع پر ان کی فلم سکند ریلیز ہوگی، اس فلم میں سلمان کے ساتھ ساؤتھ سپر اسٹار کمل ہاسن بھی نظر آنے والے ہیں۔

ممکن ہے کہ سلمان خان کے مداحوں کو ایٹلی کی فلم سے بڑا تحفہ بھی مل جائے، یعنی سکندر سے پہلے ایٹلی کی فلم بے بی جان 25 دسمبر کو ریلیز ہونے جا رہی ہے جس میں سلمان کا کیمیو ہے۔

ایٹلی کا A6 پروجیکٹ اس وقت توجہ کا مرکز بنا ہوا ہے، ہدایت کار نے اپنے کیریئر میں اب تک صرف پانچ فلمیں ڈائریکٹ کی ہیں، جن میں سے سبھی سپر ہٹ ثابت ہوئی ہیں۔

فلم اے 6 کے حوالے سے ایٹلی نے کہا کہ یہ وقت دینے والی اور توانائی صرف کرنے والی فلم ہے، فلم کا اسکرپٹ آدھے سے زیادہ تیار ہے، جلد ہی کہانی کا جائزہ لیا جائے گا اور پھر فلم کا اعلان کیا جائے گا۔

علی اعجاز نے اسٹیج، ٹیلی ویژن اور فلم میں بطور اداکار اپنی صلاحیتوں کا لوہا منوایا۔ وہ ان فن کاروں میں شامل ہیں جن کی اداکاری اس قدر بے ساختہ اور عمدہ ہوتی ہے کہ اس پر حقیقت کا گمان ہونے لگے۔ علی اعجاز ہر میڈیم میں یکساں طور پر کام یاب رہے اور ریڈیو کے لیے بھی ڈرامے کیے۔ انھیں عجوبۂ روزگار فن کار کہا جاسکتا ہے۔

آج اداکار علی اعجاز کی برسی منائی جارہی ہے۔ وہ 2018ء میں آج ہی کے روز طویل علالت کے بعد انتقال کرگئے تھے۔ علی اعجاز نے اپنے فنی سفر کا آغاز ریڈیو پاکستان لاہور کے ایک پروگرام "ندائے حق” سے کیا تھا۔ بعد میں تھیٹر اور پھر فلم میں بطور اداکار شہرت پائی۔ علی اعجاز کی پہلی فلم، پہلا فلمی سین اور پہلا فلمی گیت بھی اداکار ننھا کے ساتھ تھا جو ان کے قریبی دوست بھی رہے۔ علی اعجاز ان کے ساتھ بینک میں کام کرتے تھے اور دونوں کو اداکاری کا شوق تھا۔ علی اعجاز 1941 میں لاہور میں پیدا ہوئے اور ننھا کے ساتھ فلم ’انسانیت‘ سے اپنا سفر شروع کیا لیکن شہرت ان کو فلم ’دبئی چلو‘ سے ملی۔ علی اعجاز نے 80 کی دہائی میں منور ظریف، ننھا اور رنگیلا کی موجودگی میں اپنی الگ پہچان بنائی۔ اداکار نے اپنے وقت کی نام ور ہیروئنوں کے ساتھ کام کیا لیکن فلم اسٹار ممتاز کے ساتھ ان کے کئی گانے سپر ہٹ ثابت ہوئے۔

اداکار علی اعجاز کو فلم کی دنیا میں خاصی جدوجہد کرنا پڑی۔ 1979ء تک وہ ڈیڑھ سو کے قریب فلموں میں عام مزاحیہ اداکاری کے علاوہ ولن اور ملے جلے کردار کیا کرتے تھے۔ اس کے علاوہ وہ ٹی وی پر بھی کام کرتے رہے جہاں ‘خواجہ اینڈ سنز’ اور ‘شیدا ٹلی’ وغیرہ ان کے مشہور ڈرامے ثابت ہوئے۔ یہ ستر کی دہائی تھی جب ایک ڈرامے "دبئی چلو” میں علی اعجاز نے لاجواب اداکاری سے ناظرین کے دل موہ لیے اور پھر اس ڈرامے سے متاثر ہوکر ہدایت کار حیدر چوہدری نے اسی نام پر فلم بنائی اور علی اعجاز کو وہی کردار دیا جو انھوں نے ٹی وی ڈرامے میں کیا تھا۔ علی اعجاز نے اپنی بے ساختہ اداکاری سے اس فلم میں اپنے کردار کو یادگار بنا دیا۔ اسّی کی دہائی میں علی اعجاز ایک بڑے فلمی ہیرو اور ٹی وی کے مقبول اداکار بن چکے تھے۔ علی اعجاز نے جہاں فلمی دنیا میں اپنا عروج دیکھا وہیں انھوں نے فلمی صنعت اور شائقین کے رجحانات بدل جانے کے بعد اپنی شہرت کا گراف نیچے جاتا ہوا بھی دیکھا اور یہ کوئی انہونی نہ تھی۔ ایک عرصہ تک اپنے مداحوں کو مزاحیہ اور سنجیدہ کرداروں سے بہلانے والے علی اعجاز نے اردو اور پنجابی زبانوں میں‌ بننے والی فلموں میں بے مثال اداکاری کی۔ ان میں دلبر جانی، یملا جٹ، جی او جٹا، دبئی چلو، عشق پیچاں اور دوستانہ ان کی یادگار فلمیں ہیں۔

شوبز انڈسٹری کے سینئر اداکار کاشف محمود کا کہنا ہے کہ بھینس کا دودھ نہیں گائے کا دودھ پینے کے لیے ہوتا ہے۔

اداکار کاشف محمود نے حال ہی میں نجی ٹی وی کے مزاحیہ پروگرام میں شرکت کی اور اس دوران انہوں نے بتایا کہ لاہور کے گاؤں کوٹ حاکم علی میں کاروبار کے لیے زمین خریدی تھی اور کاروبار کیا تھا۔

انہوں نے بتایا کہ ٹیپ بال ٹورنامنٹ میں مہمان خصوصی کے طور پرمدعو تھا وہاں پر کسی سے مذاق میں کہا کہ یہاں پر کوئی زمین خرید دیں، پھر زمین خرید لی جو ایک کنال کی تھی جس میں دو بھینسیں رکھیں، شوق تھا کہ لوگوں کو خالص دودھ بیچوں جس میں پانی نہ ملایا جائے۔

اداکار کے مطابق آہستہ آہستہ چالیس پچاس بھینسیں ہوگئیں تو پتا چلا کہ یہ میرا کام نہیں ہے میں نے پھر کاروبار بند کردیا اور بھینسیں بیچ دیں۔

سینئر اداکار نے بتایا کہ جس قیمت پر ہم خالص دودھ خریدنا چاہتے ہیں وہ مل نہیں سکتا، یہ فیکٹ ہے جس قیمت پر ہم خریدنا چاہتے ہیں اس میں ہمیں پانی ملا دودھ ہی فروخت کیا جائے گا۔

کاشف محمود نے بتایا کہ بھینس کا دودھ پینے والا نہیں ہے یہ تو ڈیری پروڈکٹ مکھن، گھی وغیرہ کے لیے ہے، گائے کا دودھ پینے کے لیے ہوتا ہے جس کی مثال یہ ہے کہ جب بھینس کا بچہ پیدا ہوتا ہے تو چربی کی وجہ سے وہ دو سے تین دن تک ہل نہیں سکتا اور گائے کا بچہ پیدائش کے بعد ہی بھاگنا شروع کردیتا ہے وہ ایکٹو ہوتا ہے تو سب کو گائے کا دودھ ہی پینا چاہیے۔

انہوں نے کہا کہ کراچی اور کوئٹہ کی مارکیٹ میں بھینس کے بچے کو ساتھ لے کر نہیں جایا جاتا اس کے بچے کو بیچ دیا جاتا ہے، بھینس کو دودھ دینے کے لیے اپنے بچے کی خوشبو چاہیے ہوتی ہے تبھی وہ دودھ دے گی ورنہ وہ ایسا نہیں کرے گی پھر اسے انجیکشن لگایا جاتا ہے۔

کاشف محمود نے بتایا کہ اگر کسی بھینس کو انجیکشن لگے تو طبی طور پر کہا جاتا ہے کہ اس کا دودھ 7 سے 8 دن تک نہیں پینا چاہیے لیکن یہاں پر لوگ اپنی صحت اور زندگی کا خیال نہیں رکھتے ہیں۔

پاکستانی فلمی صنعت کے زوال اور اس کے اسباب پر تو ہم اخباری کالم اور ٹیلی ویژن پروگراموں میں بہت کچھ سنتے اور پڑھتے رہتے ہیں، لیکن یہاں ہم اُن فلموں کا تذکرہ کررہے ہیں جنھیں زبردست کام یابی ملی اور وہ لالی وڈ کی یادگار فلمیں‌ ثابت ہوئیں۔

قیام پاکستان کے بعد یہاں نئی فلمی صنعت میں قدم رکھنے والوں میں کئی بڑے اداکار اور منجھے ہوئے فلم ساز شامل تھے۔ یہ وہ لوگ تھے جنھوں نے متحدہ ہندوستان کے زمانے میں کلکتہ اور بمبئی کے فلمی مراکز میں اپنی خداداد صلاحیتوں کا اظہار کرکے نام و مقام پایا تھا۔ اس چمکتی دمکتی دنیا میں کئی نئے چہرے اور وہ فن کار بھی شامل ہوتے گئے جنھوں نے ہدایت کاری، فوٹو گرافی اور موسیقی جیسے شعبہ جات میں اپنی صلاحیتوں کو منوایا۔ اس وقت بڑی تعداد میں اردو، پنجابی اور پشتو فلموں میں کام کرنے والوں نے اپنے فن و کمال کا جادو جگایا اور لالی وڈ کی فلمیں یادگار ثابت ہوئیں۔

آغاز کرتے ہیں فلم کوئل سے جس کے لیے سحر انگیز موسیقی خواجہ خورشید انور نے ترتیب دی تھی اور میڈم نور جہاں نے ناقابل فراموش گلوکاری اور اداکاری سے اسے کام یاب بنا دیا۔ اس فلم میں نور جہاں کے علاوہ اسلم پرویز، علاﺅالدین، نذر اور نیلو نے بھی بہترین اداکاری سے فلم بینوں کو متاثر کیا۔ یہ لولی وڈ کی وہ فلم تھی جس کے مکالمے نہایت جاندار اور اسکرپٹ مضبوط تھا۔ فلمی ناقدین کوئل کو لالی وڈ کی بہترین فلم قرار دیتے ہیں۔

1956ء میں فلم انتظار ریلیز ہوئی اور یہ ایک شاہکار فلم ثابت ہوئی۔ اسے فلم بینوں نے بہت پسند کیا اور فلم کی زبردست کام یابی کی ایک وجہ اس کے نغمات اور موسیقی بھی تھی۔ فلم کی موسیقی خواجہ خورشید انور نے ترتیب دی تھی جب کہ گیت قتیل شفائی نے لکھے تھے۔ فلم کے ہدایت کار مسعود پرویز تھے۔ اس فلم نے گولڈن جوبلی مکمل کی تھی۔ اداکاروں میں نور جہاں، سنتوش کمار، آشا پوسلے اور غلام محمد شامل تھے اور ان کی بے مثال اداکاری نے شائقین کے دل موہ لیے۔ اس فلم میں سنتوش کمار نے ڈبل رول نبھایا تھا۔ اوپر ہم نے فلم کوئل کی کام یابی کا ذکر کیا تھا، اور اس کے بعد فلم انتظار نے بھی زبردست بزنس کیا۔

1965ء کی ایک فلم بنام لاکھوں میں ایک کو لالی وڈ کی کلاسیک فلموں میں شمار کیا جاتا ہے۔ یہ تقسیمِ ہند کے پس منظر میں ایک مسلمان نوجوان اور ہندو لڑکی کے عشق کی داستان پر مبنی فلم ہے جسے شائقینِ سنیما نے بے حد سراہا۔ اس فلم کے ہدایت کار رضا میر تھے جب کہ فلمی گیتوں کے خالق فیاض ہاشمی تھے اور ان کے خوب صورت گیتوں کی دھنیں نثار بزمی نے ترتیب دی تھیں۔ فلم کے گیت میڈم نور جہاں، مہدی حسن اور مجیب عالم کی آواز میں آج بھی سننے والوں میں مقبول ہیں۔ ایک گیت جو آپ کو بھی یاد ہو، میڈم نور جہاں کی آواز میں گویا امر ہوگیا۔ اس کے بول ہیں، ”چلواچھا ہوا تم بھول گئے۔“ اس کے علاوہ ایک گیت بڑی مشکل سے ہوا تیرا میرا ساتھ پیا بھی ہر زبان پر تھا۔ بطور ولن مصطفیٰ قریشی نے اسی فلم سے اپنا کیریئر شروع کیا تھا۔ ان کے علاوہ فلم میں شمیم آرا، اعجاز اور طالش نے لاجواب اداکاری کی۔
1966ء میں فلم ارمان ریلیز ہوئی جو پاکستان کی پہلی پلاٹینم جوبلی فلم ہے۔ فلم ساز وحید مراد اور ہدایت کار پرویز ملک کی اس کاوش نے ملک گیر مقبولیت ملی۔ فلم کے گیت شاعر مسرور انور نے لکھے اور موسیقی سہیل رانا نے دی تھی۔ اداکارہ زیبا، وحید مراد اور نرالا نے فلم میں عمدہ اداکاری کی اور فلم بینوں کے دل جیت لیے۔ یہ ایک رومانوی فلم تھی جس میں وحید مراد اور اداکارہ زیبا کی جوڑی کو بہت پسند کیا گیا۔ ارمان کو لالی وڈ کی بہترین فلموں میں سے ایک کہا جاتا ہے۔
آئینہ وہ فلم تھی جس کی کہانی، مکالمے، فوٹو گرافی، گیت اور ان کی موسیقی سبھی بہترین تھے اور اسے نذر الاسلام نے اپنی ہدایت کاری سے یادگار بنا دیا۔ اس فلم کی موسیقی روبن گھوش نے ترتیب دی تھی اور فلمی ناقدین کی نظر میں اس کی کام یابی میں موسیقی کا بڑا دخل تھا۔ آئینہ کے اداکاروں میں شبنم، ندیم شامل تھے جن کی جوڑی بہت پسند کی گئی۔ اسی فلم کا ایک گیت اس دور کے نوجوانوں اور بعد میں آنے والوں میں یکساں مقبول ہے جس کے بول ہیں، ”روٹھے ہو تم، تم کو کیسے مناﺅں پیا۔“ گلوکارہ نیرہ نور کی آواز میں اس گیت نے مقبولیت کا ریکارڈ قائم کیا۔
آزادیٔ فلسطین کے موضوع پر فلم زرقا کو ریاض شاہد کی شاہکار فلم تسلیم کیا جاتا ہے۔ یہ فلم 1969ء میں ریلیز ہوئی تھی اور اس کے گیت شاعرِ‌ عوام حبیب جالب نے لکھے تھے۔ فلم کے موسیقار رشید عطرے تھے۔ ریاض شاہد نے فلم کا اسکرپٹ اور مکالمے تحریر کیے جو ان کے فن و تخلیقی صلاحیتوں کا بہترین اظہار تھا۔ اداکار طالش کے علاوہ نیلو، اعجاز، ساقی نے بھی شان دار اداکاری کا مظاہرہ کیا۔ یہ لالی وڈ کی ایک ناقابلِ فراموش فلم ہے۔

(پاکستان کی فلمی صنعت اور فن کار سے ماخوذ)