لاہور : ارکان پنجاب اسمبلی کی تنخواہوں میں 4 لاکھ روپےاضافے کی تیاری کرلی گئی ، تنخواہوں میں اضافے کا بل آج پیش کیا جائے گا۔

تفصیلات کے مطابق پنجاب اسمبلی کا19واں اجلاس کچھ دیر بعد شروع ہوگا، پنجاب اسمبلی اجلاس کی صدارت ڈپٹی سپیکر ملک ظہیر چنڑ کریں گے، آغاز تلاوت قرآن پاک، نعت اور قومی ترانے سے ہوگا۔

اجلاس میں محکمہ ایکسائز ٹیکسیشن اینڈ نارکوٹکس کنٹرول کے متعلق سوالوں کے جوابات دئیے جائیں گے اور توجہ دلاؤ نوٹس کے جوابات بھی پیش کئے جائیں گے۔ ا

راکین اسمبلی کی تنخواہوں میں اضافے کا بل پیش کیا جائے گا منظوری کے بعد یکم جنوری سے اراکین پنجاب اسمبلی کی تنخواہوں میں اضافہ ہو گا۔

ارکان پنجاب اسمبلی کی تنخواہ ایک لاکھ روپے ماہوار ہے، بل کی منظوری کے بعد تنخواہ پانچ لاکھ روپے ہو جائے گی۔

ایوان میں آڈٹ رپورٹس پیش کی جائیں گی، اجلاس میں عام بحث کے دوران امن و عامہ کے متعلق بھی گفتگو کی جائے گی

کراچی / اسلام آباد / لاہور : بلوچستان کے علاوہ ملک بھر میں انسداد پولیو مہم کا آغاز کردیا گیا ، مہم میں 4 کروڑ 40 لاکھ سے زائد بچوں کو پولیو سے بچاؤ کے قطرے پلائے جائیں گے۔

تفصیلات کے مطابق ملک بھر میں انسداد پولیومہم کا آغاز ہوگیا، مہم کے دوران 4 کروڑ 40 لاکھ سے زائد بچوں کو پولیو سے بچاؤ کے قطرے پلائے جائیں گے۔

آج سے 22 دسمبر تک ملک کے 143 مخصوص اضلاع میں انسداد پولیو مہم جاری رہے گی۔

وزیرِاعظم کی فوکل پرسن برائے انسدادِ پولیو عائشہ رضا فاروق کے مطابق مہم کے دوران 4 کروڑ 40 لاکھ سے زائد بچوں کو پولیو سے بچاؤ کے قطرے پلائے جائیں گے، ہمارا عزم ہے کہ 5 سال تک کی عمر کے تمام بچوں تک ویکسین کی رسائی ممکن بنائی جائے۔

وزیراعلیٰ سندھ مراد علی شاہ نے انسداد پولیو مہم کا افتتاح کردیا ، وزیراعلیٰ نے اسکول کے بچوں کو پولیو سے بچاؤ کے قطرے پلا کر مہم کا آغاز کیا۔

انسدادپولیو مہم 16 تا 22 دسمبر تک جاری رہے گی، ماحولیاتی نمونوں میں پولیو وائرس کی موجودگی صورتحال کی سنگینی ظاہر کرتی ہے، سال کی آخری پولیو مہم ہے، کوئی بچہ رہ نہ جائے۔

5سال تک کی عمرکےایک کروڑ 6 لاکھ بچوں کو قطرے پلائے جائیں گے ، 80 ہزار فرنٹ لائن ورکرز گھر گھر جا کر بچوں کو پولیو کے قطرے پلائیں گے ، اس موقع پر سندھ میں پولیو ٹیموں کی حفاظت کے لیے 15ہزار اہلکار تعینات ہیں۔

پنجاب میں انسداد پولیو مہم کا آغاز ہوچکا ہے۔ پولیو مہم 22 دسمبر جاری رہے گی، جس میں تین کروڑ تیئس لاکھ بچوں کو پولیو قطرے پلائے جائیں گے، وزیر صحت پنجاب سلمان رفیق نے پولیو مہم کا افتتاح کیا۔

پشاور میں چیف سیکریٹری کےپی ندیم اسلم نے انسدادپولیو مہم کا افتتاح کیا ، پشاور میں انسدادپولیو مہم 7 روز تک جاری رہے گی ، اس دوران 8 لاکھ بچوں کو پولیو سے بچاؤ کے قطرے پلائےجائیں گے۔

ندیم اسلم چوہدری کا کہنا تھا کہ کے پی میں ابتک 18 پولیو کے کیسز رپورٹ ہوئےہیں، پولیو کے زیادہ تر کیسز ڈی آئی خان سے رپورٹ ہوئے، سب سے درخواست ہے مہم میں حکومت کا ساتھ دیں ، انکاری والدین کاڈیٹا مرتب کیا ہے، کارروائی بھی کی جائے گی۔

پشاور اورمضافات میں انسداد پولیو مہم کے دوران سیکیورٹی کے سخت انتظامات کئے گئے ہیں ، انسداد پولیو ٹیموں کی سیکیورٹی پر 4431 جوان تعینات ہیں جبکہ سٹی پٹرول اور ابابیل اسکواڈ بھی گشت پر مامور ہیں۔

بلوچستان میں سیکیورٹی صورتحال کے باعث انسداد پولیومہم کل سےشروع ہو گی۔

اسلام آباد : صدر مملکت آصف زرداری ، وزیراعظم شہباز شریف سمیت دیگر سیاسی رہنماوں نے 10 ویں برسی کے موقع پر سانحہ اے پی ایس کے شہدا کوخراجِ عقیدت پیش کیا۔

تفصیلات کے مطابق سانحہ آرمی پبلک اسکول کے 10 سال مکمل ہوگئے ، اس موقع پر وزیراعظم نے پیغام میں کہا کہ سانحہ آرمی پبلک اسکول پشاورایک دل سوزواقعہ ہے، سانحہ اےپی ایس کی یادایک دہائی سےہمارےدلوں کومضطرب کررہی ہے،بچوں کی زندگی، خواب، امیدیں، مستقبل ان سےچھین لیاگیا۔

مجھ سمیت پوری قوم ہمارے بچوں واساتذہ کی بہادری کو سلام پیش کرتی ہے، وزیراعظم

وزیراعظم کا کہنا تھا کہ فتنہ الخوارج اوران جیسے دہشت گردوں کا دین سے کوئی تعلق ہے اورنہ معاشرتی اقدارسے، پوری قوم ان بزدل دہشت گردوں کےخلاف سیسہ پلائی دیوارکی طرح کھڑی ہے۔

انھوں نے مزید کہا کہ مجھ سمیت پوری قوم ہمارے بچوں و اساتذہ کی بہادری کو سلام پیش کرتی ہے، آئیں آج ہم ایک پرامن اور محفوظ پاکستان کی تعمیر کیلئے اپنے عزم کا اعادہ کریں۔

اس دن نے ہماری قوم کی اجتماعی یادداشت پرانمٹ نقوش چھوڑے، صدر مملکت

صدرمملکت آصف زرداری نے آرمی پبلک اسکول پشاورحملےکے10ویں برسی پرپیغام میں کہا کہ 16 دسمبر 2014 کے افسوناک دن دہشت گردوں نے ہمارے قوم کے مستقبل پر حملہ کیا، دہشت گردوں نے اساتذہ اور بچوں کو نشانہ بنا کرعوام دشمنی کا ثبوت دیا، اس دن نے ہماری قوم کی اجتماعی یادداشت پرانمٹ نقوش چھوڑے۔

آصف زرداری کا کہنا تھا کہ یہ دن ہمیں دہشت گردی کے خلاف جنگ میں قوم کی قربانیوں کی یاد دلاتا ہے، اے پی ایس جیسے واقعات دہشت گردوں اور خوارج کا اصل چہرہ بے نقاب کرتےہیں۔

انھوں نے کہا کہ پاکستانی قوم دہشت گردوں کو کبھی اپنے مذموم عزائم میں کامیاب نہیں ہونے دے گی، سانحہ اے پی ایس نے ہمیں دہشت گردی کےخلا ف بحیثیت قوم متحد کیا، آئیے دہشت گردی کےخاتمے اور پرامن پاکستان کے لیے کام کرنے کا عہد کریں۔

سانحہ اے پی ایس نے قوم کے ضمیر کو جھنجوڑ کر رکھ دیا، بلاول بھٹو

چیئرمین پیپلزپارٹی بلاول بھٹو نے بھی سانحہ اے پی ایس کے شہدا کو خراجِ عقیدت پیش کرتے ہوئے کہا کہ قوم دہشت گردی کیخلاف جنگ میں ثابت قدم اورآنیوالی نسلوں کو محفوظ بنائے گی، اے پی ایس سانحہ ملکی تاریخ کا سیاہ ترین دن ہے، سانحہ اے پی ایس نے قوم کے ضمیر کو جھنجوڑ کر رکھ دیا۔

انھوں نے کہا کہ سانحہ نے ہمیں دہشت گردی کے ناسور کے خلاف متحد کیا، وفاقی اورصوبائی حکومتیں نیشنل ایکشن پلان پر موثر عملدرآمد کو یقینی بنائیں تاکہ نیشنل ایکشن پلان پر موثرعملدرآمد سے ایسے سانحات سے بچا جا سکے گا۔

بلاول بھٹو نے انتہا پسندی کے اسباب کو تعلیم، معاشی مواقع کے ذریعے حل کرنے کی پر زور دیتے ہوئے کہا کہ ہم ایسے پاکستان کے لیے اپنی جدوجہد جاری رکھیں گے جو دہشت گردی سے پاک ہو۔

شہدا اےپی ایس آج بھی قوم کے دلوں میں زندہ ہیں، وزیر داخلہ

وفاقی وزیرداخلہ محسن نقوی نے آرمی پبلک اسکول کے شہدا کی برسی پر پیغام میں کہا کہ بدترین دشمن نے16دسمبرکومعصوم بچوں اوربےگناہ اساتذہ کو ناحق شہیدکیا، یہ دن ہمارے عزم کانشان بن چکاہےکہ ہم دہشتگردی کیخلاف لڑتے رہیں گے، بچوں اور ٹیچرز نے اپنے قیمتی لہو سے پرامن پاکستان کی بنیاد رکھی۔

محسن نقوی کا کہنا تھا کہ شہدا اے پی ایس آج بھی قوم کے دلوں میں زندہ ہیں،بزدل دشمن کیلئے پاک دھرتی تنگ کر دی گئی ہے، شہدائے اے پی ایس نے قوم کو دہشت گردی کے ناسور کے خاتمے کیلئے ایک کیا، آرمی پبلک اسکول کے شہدا کی قربانیاں پاکستان کے ہر فرد کے دل میں ہمیشہ زندہ رہیں گی۔

انھوں نے کہا کہ شہید بچے اور اساتذہ پوری قوم کے ہیرو ہیں، شہید بچے اور اساتذہ اوران کے خاندانوں کو سلام اور مکمل یکجہتی کا اظہار کرتے ہیں، قوم آج شہداکی لازوال قربانیوں کوخراج عقیدت پیش کررہی ہے۔

16دسمبر2014 کی سیاہ صبح ہرپاکستانی کے دل پر نقش ہے، مریم   نواز  

وزیر اعلیٰ پنجاب مریم نواز نے بھی شہدا کے لیےحرف عقیدت پیش کرتے ہوئے کہا کہ اے پی ایس پشاور کو 10سال گزر چکے لیکن دکھ آج بھی زندہ ہیں، 16دسمبر 2014 کی سیاہ صبح ہر پاکستانی کے دل پر نقش ہے، دہشت گردوں نے 147 معصوم بچوں اوران کے اساتذہ کو سفاکیت کا نشانہ بنایا۔

مریم نواز کا کہنا تھا کہ ننھے طلبہ جو علم کی روشنی سے ملکی مستقبل کو روشن کرنا چاہتے تھے، درندگی کی نذر ہوگئے، سانحہ 16 دسمبر صرف اسکول پر ہی نہیں بلکہ انسانیت، تعلیم، ملک کے روشن مستقبل پر حملہ تھا، معصوم طلبہ اور اساتذہ کی قربانی نے ہمیں یہ سبق دیا کہ دہشت گردی کا خاتمہ ہرصورت ناگزیر ہے۔

انھوں نے کہا کہ اے پی ایس شہدا ہماری قوم کے ہیرو ہیں، سانحہ اے پی ایس کے والدین اور اہل خانہ کا حوصلہ اور صبر قابل تحسین ہے، دہشت گردی کے خلاف جنگ جیت کرکے ہی دم لیں گے۔