کے۔ الیکٹرک نے قابل تجدید توانائی (رینوایبل انرجی) کی جانب اپنے سفر میں نمایاں پیش رفت کرتے ہوئے وندر اور بیلہ ( بلوچستان) میں اپنے 150 میگاواٹ کے شمسی توانائی (سولر انرجی) کے منصوبوں کے لیے بڈ ایویلیویشن رپورٹ نیپرا کو پیش کردی۔

ریگولیٹر نے آج اس حوالے سے سماعت مکمل کرلی ہے، جو ان منصوبوں کی تکمیل کی جانب ایک اہم قدم ہے اور پاکستان کے توانائی کے منظرنامے کو تبدیل کرنے کی کے۔ الیکٹرک کی کوششوں کی عکاس ہے۔

رواں سال کے اوائل میں نیپرا سے منظوری ملنے کے بعد کے۔ الیکٹرک نے قابل تجدید توانائی کے منصوبوں کا آغاز کرنے کے لیے صنعت کی پہلی مسابقتی بولی کا عمل شروع کیا تھا۔ 150 میگاواٹ کے وندر اور بیلہ منصوبے، جو کہ مجموعی طور پر 640 میگاواٹ قابل تجدید توانائی منصوبوں کا حصہ ہیں۔

کمپنی کے طویل المدت وژن کا پہلا مرحلہ ہے، جس کے تحت جنریشن مکس میں 1300 میگاواٹ پائیدار توانائی شامل کیا جائےگا۔ یہ سنگ میل کے۔ الیکٹرک کے وسیع تر قابل تجدید توانائی روڈ میپ کا حصہ ہے جس کا مقصد 2030 تک جنریشن مکش میں 30 فیصد قابل تجدید توانائی کو شامل کرنا ہے۔

گزشتہ ایک سال کے دوران کے۔ الیکٹرک کے قابل تجدید منصوبوں میں سرمایہ کاروں کی نمایاں دلچسپی دیکھی گئی ہے، جس میں وندر اور بیلہ منصوبوں کے لیے 15 بولیاں اور اس کے بعد دھابیجی( سندھ) میں 220 میگاواٹ کے ہائبرڈ سولر ونڈ پروجیکٹ کے لیے سات بولیاں شامل ہیں۔

پاکستان میں قابل تجدید توانائی کے منصوبوں کے حوالے سے اُس وقت ایک نئی مثال قائم ہوئی جب کے۔ الیکٹرک کو 100 میگاواٹ بیلہ اور 50 میگاواٹ وندر منصوبے اور 220 میگاواٹ ہائبرڈ سولر ونڈ پروجیکٹ کے لیے انتہائی مسابقتی ٹیرف بولیاں موصول ہوئیں۔

مزید برآں پاور یوٹیلیٹی نے 270 میگاواٹ سندھ سولر پروجیکٹس کے لیے بڈنگ کا عمل مکمل کرنے کے بعد نیلامی کی تشخیصی رپورٹ نیپرا میں جمع کرا دی ہے، مجموعی طور پر یہ منصوبے کے۔ الیکٹرک کے انرجی مکس کو متنوع بنانے، درآمدی ایندھن پر انحصار کم کرنے اور سرمایہ کاروں کےاعتماد کو فروغ دینے کے عزم کو اجاگر کرتے ہیں۔

کے۔الیکٹرک کے چیف اسٹریٹجی آفیسر شہاب قادر نے کہا کہ ہماری بڈ ایویلیویشن رپورٹ کی سماعت انرجی ٹرائیلیما سے نمٹنے اور کاربن فٹ پرنٹ کو کم کرنے کی ہماری کوششوں میں ایک اہم سنگ میل ہے۔

ہم کراچی کے عوام کے لیے پائیداراور مستحکم توانائی کی فراہمی کے لیے پرعزم ہیں۔ہم ریگولیٹر کے فیصلے کے منتظر ہیں جو ہمارے وژن کو حقیقت میں بدلنے میں مدد دے گا۔ ہم حکومت، سرمایہ کاروں اور تمام شراکت داروں کے شکر گزار ہیں جنہوں نے بولی کے عمل کو کامیاب بنانے کے لیے مل کر کام کیا، جس سے ملک میں سرمایہ کاری اور توانائی کی منتقلی کی رفتار تیز ہوئی ہے۔

کے ۔الیکٹرک اس اہم معاملے کے حوالے سے ریگولیٹر کے ساتھ رابطے میں ہے جو اس کے صارفین کے لیے سستی توانائی تک رسائی کو ممکن بنا سکتا ہے۔

نائب وزیراعظم اسحاق ڈار کا کہنا ہے کہ ہمارا 2018 کا مینڈیٹ واپس کریں ہم 2024 کا کردیتے ہیں۔

اے آر وائی نیوز کے مطابق سینیٹ میں اظہار خیال کرتے ہوئے نائب وزیراعظم اسحاق ڈار نے کہا کہ پہلے 2018 کا حساب دیں کس نے الیکشن جیتا اور کس نے جتوایا، میرا ساتھ میثاق جمہوریت پر کسی نے نہیں دیا اب اپوزیشن میں آئے تو میثاق جمہوریت یاد آگئی۔

انہوں نے کہا کہ 2024 کے مینڈیٹ پر بات کرنی ہے تو پہلے 2018 کا حساب دیں، ہمیں ہمارا 2018 کا مینڈیٹ واپس کریں، ہم 2024 کا واپس کردیتے ہیں۔

اسحاق ڈار نے کہا کہ چیف الیکشن کمشنر بھی آپ کی ہی مرضی کا لگا، 2 غلط مل کر ایک صحیح نہیں بن سکتے، آج میڈیا اتنا آگے جاچکا ہے کہ سب کے سامنے سب کچھ ہے، ایک جماعت کو 2018 کے الیکشن کا اتنا فائدہ ہوا کہ سینیٹ میں بھی اکثریت ملی، ہمیں چاہیے کہ ہم مل کر ایسی چیزیں کریں جس کا فائدہ آنے والی نسل کو ہو۔

سینیٹر نے کہا کہ اپوزیشن لیڈر کہہ رہے ہیں کہ بانی پی ٹی آئی کے خلاف سیاسی مقدمات ہیں جو عدالت میں ہیں ریلیف ملتا ہے تو لے لیں، پی ٹی آئی دور میں ڈی جی نیب اور بشیر میمن کو بلوا کر مقدمات بنوائے گئے۔

انہوں نے کہا کہ مفاہمت پر یقین رکھنے والا ہوں، 8 فروری انتخابات کا معاملہ عدالت میں ہے، یہ کہا جائے کہ مینڈیٹ کسی اور کو دیا گیا ہے تو پھر2018 میں کیا ہوا تھا، موجودہ حکومت نے کسی کے خلاف مقدمات کے لیے نہیں کہا، کسی کے پاس ثبوت ہے تو لائیں میں وزیراعظم سے بات کروں گا۔

اسحاق ڈار نے مزید کہا کہ احتجاج کے لیے ڈی چوک کیوں چنا گیا کوئی اور جگہ کیوں نہیں، بانی پی ٹی آئی کو بہت سے کیسز میں ریلیف بھی ملا ہے، دعویٰ کررہا ہوں موجودہ حکومت نے کوئی سیاسی مقدمہ نہیں بنوایا۔