وزیراعلیٰ سندھ مراد علی شاہ نے کہا ہے کہ نہروں کا مسئلہ حل ہوگیا جو بھی دھرنے ہورہے ہیں فوری ختم کیے جائیں، ادویات کی ترسیل رکی ہوئی ہے۔

مشترکہ مفادات کونسل کے اجلاس کے بعد گفتگو کرتے ہوئے وزیراعلیٰ سندھ نے کہا کہ دھرنے والوں نے ٹریفک معطل کررکھا ہے، ادویات کی ترسیل رک گئی، ہم نے دھرنے والوں سے کہا کہ ایک سڑک کو کھول دیا جائے، جو لوگ نفرتیں پھیلانا چاہتے تھے وہ اب ناکام ہوچکے ہیں۔

وزیراعلیٰ سندھ مرادعلی شاہ نے کہا کہ سندھ کے عوام کو مبارکباد دیتا ہوں، دریائے سندھ پر نہروں کے مسئلے کو وزیراعظم نے اہم سمجھا، آصف زرداری اور شہباز شریف نے ملاقات کی جس میں موجود تھا۔

انھوں نے کہا کہ جب تک باہمی اتفاق نہیں ہوجاتا، نئی نہریں نہیں بنائی جائیں گی، جب تک سی سی آئی میں فیصلہ نہ ہو آئندہ کوئی نئی نہر نہیں بنائی جائے گی۔

مراد علی شاہ نے کہا کہ مشترکہ مفادات کونسل کا اجلاس 2 مئی کے بجائے 28 اپریل کو ہوا، شکرگزار ہوں کہ اہم معاملے کو خوش اسلوبی کیساتھ حل کیاگیا ہے، فیصلہ کیا گیا ہے پانی کے معاہدے پرعمل کیا جائےگا۔

وزیراعلیٰ سندھ نے کہا کہ فیصلہ کیا گیا ہے وفاق صوبوں کی مشاورت کے بغیر آگے نہیں بڑھے گا، 7 فروری کے ایکنک کے نہروں کی منظوری کو واپس کرنے کا فیصلہ کیا گیا۔

ہمیشہ سے کہہ رہا تھا دریائے سندھ پر کوئی نہر نہیں بن رہی، نہروں کی اسکیم پر ایک پیسہ خرچ نہیں ہوا، بغیر پیسہ خرچ کیے نہریں کیسے بن سکتی تھیں؟ پارلیمنٹ میں صدر آصف زرداری نے بھی کہا اتفاق رائے کے بغیر نہریں نہیں بن سکتی۔

مرادعلی شاہ کا کہنا تھا کہ نہروں کا مسئلہ حل ہوگیا جو بھی دھرنے ہورہے ہیں فوری ختم کیے جائیں، دھرنے والوں نے ٹریفک معطل کررکھا ہے، ادویات کی ترسیل رک گئی۔

انھوں نے کہا کہ ہم نے دھرنے والوں سے کہا کہ ایک سڑک کو کھول دیا جائے، جو لوگ نفرتیں پھیلانا چاہتے تھے وہ اب ناکام ہوچکے ہیں۔

وزیراعلیٰ سندھ مرادعلی شاہ نے کہا کہ نہروں کا مسئلہ حل ہوگیا، صوبوں کی منظوری کے بغیر کوئی منصوبہ نہیں بنےگا، نہروں کا مسئلہ مشترکہ مفادات کونسل نے ہی حل کرنا تھا۔

سی سی آئی نے کہا ہے کہ پانی روکنے کی صورت میں پاکستان اپنے آبی مفادات کے تحفظ کا حق رکھتا ہے، حکومت کی پالیسی کی توثیق کی گئی۔

بھارت کی جانب سے سندھ طاس معاہدے کی معطلی کے بعد سی سی آئی نے کہا ہے کہ اگر بھارت کی طرفھ سے پانی روکنے کا اقدام کیا گیا تو پاکستان اپنے آبی مفادات کے تحفظ کا حق رکھتا ہے، مشترکہ مفادات کونسل کے اجلاس میں وفاقی حکومت کی پالیسی کی بھی توثیق کی گئی۔

مشترکہ مفادات کونسل نے سات فروری کو کینال سے متعلق ایکنک اجازت مسترد اور صوبوں کے اتفاق کے بغیر کوئی نئی نہر نہ بنانے کا فیصلہ کیا ہے۔

وفاقی حکومت کی جانب سے اس فیصلے کو تسلیم کرتے ہوئے فیصلہ کیا ہے کہ سی سی آئی کی رضامندی کے بغیر کوئی نئی نہریں تعمیرنہیں ہوں گی۔

وزیراعظم شہباز شریف کی زیر صدارت مشترکہ مفادات کونسل کا اجلاس اسلام آباد میں منعقد ہوا جس میں نائب وزیراعظم اسحاق ڈار، چاروں صوبوں کے وزرائے اعلیٰ سمیت ارسا حکام نے بھی شرکت کی۔

اجلاس میں پنجاب حکومت کو ارسا کی جانب سے جاری پانی دستیابی کا سرٹیفکیٹ بھی ختم کر دیا گیا، وزیراعلیٰ خیبر پختونخوا علی امین گنڈاپور کا کہنا تھا کہ سندھ اور اس کے عوام کے لیے خوشخبری ہے کہ نہروں سے متعلق اس کا مطالبہ مان لیا گیا ہے۔

وزیر اعلیٰ کے پی نے کہا کہ ہم کسی صوبے کا حق کسی دوسرے کو نہیں کھانے دیں گے اور ہر صوبے کو اس کے حصےکا پانی دیا جائے گا۔

واضح رہے کہ دریائے سندھ سے 6 نہریں نکالنے کا معاملہ پاکستان میں گزشتہ کافی عرصہ سے موضوع بحث تھا اور اس پر پیپلز پارٹی نے جہاں سخت موقف اختیار کیا وہیں سندھ میں ان منصوبوں کے خلاف شدید احتجاج بھی ہوا جو اب تک جاری ہے۔

حکومت سندھ کی گزارش پر سی سی آئی کا اجلاس آج ہی طلب