یمن کے حوثیوں نے جنوبی اسرائیل میں اسرائیلی فوجی اڈے نیواتیم ایئربیس پر میزائل سے حملہ کرنے کا دعویٰ کر دیا۔

قطری نشریاتی ادارے الجزیرہ کی رپورٹ کے مطابق حوثی ترجمان یحییٰ نے بتایا کہ ہم نے نیگیو میں نیواتیم ایئربیس کو نشانہ بناتے ہوئے ایک آپریشن کیا جس میں ہائپرسونک بیلسٹک میزائل کا استعمال کیا۔

اس سے قبل اسرائیلی فوج نے اپنے بیان میں بتایا تھا کہ اس نے بحیرہ مردار کے علاقے میں فضائی حملے کے سائرن بجنے کے بعد یمن سے فائر کیے گئے میزائل کو مار گرایا۔

یہ بھی پڑھیں: حوثیوں نے 200 ملین ڈالر سے زائد مالیت کے امریکی ڈرونز مار گرا دیے

یہ واقعہ یمن کی وزارت صحت کے ایک بیان کے بعد سامنے آیا جس میں کہا گیا کہ ہفتے کی شام صنعا پر امریکی حملوں میں دو بچوں سمیت کم از کم آٹھ شہری زخمی ہوئے۔

دوسری جانب، اسرائیلی فوج نے وادی اردن کے علاقے اور مقبوضہ مغربی کنارے کے صوبے قلقیلیہ میں فوجی پابندیاں بڑھا دی ہیں۔ وادی اردن میں اسرائیلی فورسز نے حمرہ چیک پوائنٹ پر پابندیاں مزید سخت کر دیں جس سے ٹریفک جام ہوگیا۔

قلقیلیہ میں شہر کے جنوب پر حبلہ شہر کے قریب اور شہر کے مشرق پر عارضی فوجی چوکیاں قائم کی گئیں۔

عینی شاہدین کے مطابق فوجیوں نے گاڑیوں کو روکا، مسافروں کے شناختی کارڈ چیک کیے اور کاروں کو کئی گھنٹوں تک حراست لے رکھا۔

سابق اسرائیلی وزیر اعظم نفتالی بینیٹ نے فوج میں ہزاروں اہلکاروں کی کمی کا انکشاف کرتے ہوئے نیتن یاہو حکومت سے اہم مطالبہ کر دیا۔

قطری نشریاتی ادارے الجزیرہ کی رپورٹ کے مطابق سابق اسرائیلی وزیر اعظم نے اپنے بیان میں کہا کہ فوج گزشتہ ڈیڑھ سال کے دوران غزہ، مقبوضہ مغربی کنارے، وادی اردن، لبنان، شام اور سینائی میں جنگ کے ساتھ اپنی حدود سے تجاوز کر گئی ہے۔

یہ بھی پڑھیں: اسرائیل حماس اور فلسطینیوں کو کیسے نشانہ بنا رہا ہے؟

نفتالی بینیٹ نے سوشل میڈیا پلیٹ فارم ایکس پر لکھا کہ ہمیں اتنی سرحدوں اور فوجیوں کو سنبھالنے کی ضرورت پہلے کبھی نہیں پڑی، اس وقت فوج میں 20 ہزار سے زائد اہلکاروں کی کمی کا سامنا ہے۔

انہوں نے نیتن یاہو حکومت سے مطالبہ کیا کہ وہ الٹرا آرتھوڈوکس یہودی اسرائیلیوں کی فہرست میں شامل ہونے پر پابندیاں ہٹائے تاکہ ریزروسٹوں پر دباؤ کم کیا جا سکے۔

یاد رہے کہ جنوری میں اسرائیلی فوج نے 338 الٹرا آرتھوڈوکس یہودیوں کو فہرست میں شامل کیا تھا۔