نوازشریف کے خلاف ریفرنسز پرفیصلہ کل سنایا جائے گا

کی طرف

دسمبر 23, 2018

اسلام آباد: سابق وزیراعظم نوازشریف کے خلاف العزیزیہ اسٹیل ملز اور فلیگ شپ ریفرنس کا فیصلہ کل سنایا جائے گا۔

تفصیلات کے مطابق مسلم لیگ ن کے قائد نوازشریف کے خلاف العزیزیہ اسٹیل ملز اور فلیگ شپ ریفرنس کا محفوظ فیصلہ کل سنایا جائے گا۔

احتساب عدالت کے جج محمد ارشد ملک کل فیصلہ سنائیں گے جبکہ نوازشریف خود بھی عدالت جائیں گے۔ العزیزیہ ریفرنس میں 22 اور فلیگ شپ ریفرنس میں 16 گواہان کے بیانات قلمبند کیے گئے۔

احتساب عدالت نمبر ایک اور دو میں سابق وزیراعظم کے خلاف نیب ریفرنسز کی مجموعی طور پر 183 سماعتیں ہوئیں۔

نوازشریف مجموعی طور پر 130 بار احتساب عدالت کے روبرو پیش ہوئے، وہ 70 بار جج محمد بشیر اور 60 مرتبہ محمد ارشد ملک کی عدالت میں پیش ہوئے۔

نواز شریف کے خلاف کرپشن ریفرنسز پر فیصلہ محفوظ کرلیا گیا

یاد رہے کہ 19 دسمبر کو احتساب عدالت نے سابق وزیراعظم نوازشریف کے خلاف کرپشن ریفرنسز پر فیصلہ محفوظ کیا تھا۔

کیس کا پس منظر

سابق وزیر اعظم نواز شریف اور ان کے خاندان کی مشکل اس وقت شروع ہوئی جب 4 اپریل 2016 کو پانامہ لیکس میں دنیا کے 12 سربراہان مملکت کے ساتھ ساتھ 143 سیاست دانوں اور نامور شخصیات کے نام سامنے آئے جنہوں نے ٹیکسوں سے بچنے کے لیے کالے دھن کو بیرون ملک قائم بے نام کمپنیوں میں منتقل کیا۔

پاناما لیکس میں پاکستانی سیاست دانوں کی بھی بیرون ملک آف شور کمپنیوں اور فلیٹس کا انکشاف ہوا تھا جن میں اس وقت کے وزیر اعظم پاکستان میاں نواز شریف کا خاندان بھی شامل تھا۔

کچھ دن بعد وزیر اعظم نے قوم سے خطاب اور قومی اسمبلی میں اپنی جائیدادوں کی وضاحت پیش کی تاہم معاملہ ختم نہ ہوا۔ پاکستان تحریک انصاف کے سربراہ (موجودہ وزیر اعظم) عمران خان، جماعت اسلامی کے امیر سراج الحق اور عوامی مسلم لیگ کے سربراہ شیخ رشید کی جانب سے وزیر اعظم کو نااہل قرار دینے کے لیے علیحدہ علیحدہ تین درخواستیں سپریم کورٹ میں دائر کی گئیں۔

درخواستوں پر سماعتیں ہوتی رہیں اور 28 جولائی 2017 کو سپریم کورٹ نے فیصلہ دیتے ہوئے وزیر اعظم نواز شریف کو نااہل قرار دیا۔ اس کے ساتھ ہی قومی ادارہ احتساب (نیب) کو حکم دیا گیا کہ وہ وزیر اعظم اور ان کے خاندان کے خلاف ریفرنس دائر کرے۔

بعد ازاں نیب میں شریف خاندان کے خلاف 3 ریفرنسز دائر کیے گئے جن میں سے ایک ایون فیلڈ ریفرنس پایہ تکمیل تک پہنچ چکا ہے۔ ایون فیلڈ ریفرنس میں نواز شریف کو 10 سال قید اور جرمانے کی سزا سنائی گئی جبکہ مریم نواز کو 7 سال قید مع جرمانہ اور کیپٹن صفدر کو ایک سال قید کی سزا سنائی گئی۔

فلسطینی صدر محمود عباس نے پارلیمنٹ تحلیل کردی

کی طرف

ویب ڈیسک

دسمبر 23, 2018

غزہ : فلسطینی صدر نے دیگر جماعتوں کو اعتماد میں لیے بغیر پارلیمنٹ تحلیل کرکے آئندہ 6 ماہ میں انتخابات کرانے کا اعلان کردیا۔

تفصیلات کے مطابق مقبوضہ فلسطین کے صدر محمود عباس نے عدالتی حکم کے تحت قانون ساز کونسل ’پارلیمنٹ‘ کو تحلیل کردیا، عدالت نے ملک میں پارلیمانی الیکشن کرانے کا حکم دیا ہے۔

مقامی خبر رساں ادارے کا کہنا ہے کہ محمود عباس نے اسمبلی تحلیل کرنے سے قبل دیگر جماعتوں کو اعتماد میں نہیں لیا، فلسطینی صدر کا کہنا ہے کہ عدالتی فیصلے پر عمل درآمد ضروری ہے۔

ہفتے کے روز فلسطینی علاقے رام اللہ میں اجلاس سے خطاب کرتے ہوئے محمود عباس کا کہنا تھا کہ القدس کی سودے بازی نہیں کریں گے وہ فلسطینیوں کا ابدی اور دائمی دارالحکومت ہے، ہم امریکیوں کے اقدامات کو ہرگز قبول نہیں کریں گے۔

فلسطینی صدر محمود عباس نے کہا کہ فلسطینی عوام پر امن اور پر عزم شہری ہیں، ہم اسرائیلی مظالم کو مزید برداشت نہیں کرسکتے۔

فلسطینی صدر کا کہنا تھا کہ فلسطینی اتھارٹی نیشنل کونسل اور مرکزی کونسل کے فیصلوں کو نافذ کریں گے۔

صدر محمود عباس کا کہنا تھا کہ فلسطینیوں کے درمیان مصالحت کے حوالے سے پیش کی تجاویز پر کوئی جواب نہیں ملا، تاہم مصالحت کے لیے مصر کی کوششوں کا خیر مقدم کرتے ہیں۔

ایک سال میں 20 نئی ٹرینیں چلائیں گے،غریب کوسستا ٹکٹ ملے گا‘ شیخ رشید

کی طرف

ویب ڈیسک

دسمبر 23, 2018

پشاور: وفاقی وزیر ریلوے شیخ رشید نے کہا ہے کہ لوگ وزیراعظم عمران خان کےساتھ حقیقی تبدیلی کے لیے کھڑے ہیں، کرپشن کا ایسا خاتمہ کریں گے کہ لوگ یاد رکھیں گے۔

تفصیلات کے مطابق وفاقی وزیرریلوے شیخ رشید نے رحمان بابا ایکسپریس کی افتتاحی تقریب سے خطاب کرتے ہوئے کہا کہ مسافروں کو کراچی سے پشاور8 گھنٹےمیں بھی پہنچائیں گے۔

انہوں نے کہا کہ سیاحوں کے لیے 3 ٹرینیں چلانے جا رہے ہیں، ایک ٹرین پشاورسے اٹک تک چلائیں گے، دوسری ٹرین راولپنڈی سے ٹیکسلا تک چلے گی، تیسری ٹرین کراچی سے کینجھرجھیل تک چلائیں گے۔

شیخ رشید نے کہا کہ اصل ٹارگٹ مال گاڑیوں کی تعداد میں اضافہ کرنا ہے، 25 جنوری کو دوسری کنٹینر ٹرین چلائی جائے گی، چاہتا ہوں نفع نقصان کے بغیرمسافرٹرینیں چلائیں۔

وفاقی وزیرریلوے نے کہا کہ اربوں کے اخراجات کے ساتھ ٹرینیں چلانا آسان نہیں، یکم جنوری سے ایک ماہ کے لیے ونٹرٹرین چلائیں گے، خواہش ہے پشاورسے لاہورکے لیے ٹرین چلائیں۔

انہوں نے کہا کہ ریلوے کی زمینوں سے قبضے ختم کرانے کا کہا ہے، ریلوے اراضی پرجتنا بڑا بدمعاش قابض ہو اسے نیست ونابود کیا جائے گا۔

شیخ رشید نے کہا کہ اب بھی کرپشن کونہیں پکڑا تویہ ملک آگے نہیں چل سکتا، چوروں، کمیشن خوروں کوسزا نہ ہوئی توملکی بنیادیں ہل جائیں گی۔

انہوں نے کہا کہ کرپشن کا ایسا خاتمہ کریں گے کہ لوگ یاد رکھیں گے، لوگ وزیراعظم عمران خان کے ساتھ حقیقی تبدیلی کے لیے کھڑے ہیں۔

وفاقی وزیر ریلوے نے کہا کہ ایک سال میں 20 نئی ٹرینیں چلائیں گے،غریب کے لیے سستا اور امیر کے لیے مہنگا ٹکٹ ہوگا۔

شیخ رشید نے کہا پاکستان ایکسپریس کا کرایہ صرف 500 رکھا تومیرے خلاف تحقیقات ہوئی، زندگی میں ایک بارتحقیقات ہوئیں سروخرورہا۔

امریکا میں نسل پرست لڑکی کا مسلمان طالبہ پر تشدد

کی طرف

ویب ڈیسک

دسمبر 23, 2018

واشنگٹن : امریکا میں متعصب طالبہ نے نسل پرستی کی بنیاد پر پناہ گزین شامی طالبہ کو بہیمانہ تشدد کا نشانہ بنایا، ویڈیو سوشل میڈیا پر وائرل ہوگئی۔

تفصیلات کے مطابق امریکی ریاست پنسلوانیا میں واقع چارٹیئرز ویلی نامی ہائی اسکول میں زیر تعلیم نسل پرست طالبہ نے تعلیم کے حصول کےلیے اسکول جانے والی باحجاب شامی لڑکی پر مسلمانوں سے نفرت کا اظہار کرتے ہوئے بے رحمانہ تشدد کیا۔

سوشل میڈیا پر جاری ہونے والی ویڈیو میں دیکھا جاسکتا ہے کہ ہائی اسکول کے بیت الخلاء میں شامی پناہ گزین دوسری لڑکی سے گفتگو کررہی ہے جس میں امریکی طالبہ مسلسل شامی لڑکی کو دھمکا رہی ہے۔

امریکی طالبہ نے گفتگو کے دوران ہی شامی پناہ گزین کو دھکا دیا اور تشدد پر شروع کردیا جس کے باعث متاثرہ لڑکی کو اسپتال منتقل کرنا پڑا، متاثرہ لڑکی کی جانب سے پولیس کو شکایت درج کروائی گئی تاہم پولیس نے تعاون کرنے سے انکار کیا۔

سوشل میڈیا پر شامی طالبہ پر تشدد کی ویڈیو وائرل ہوئی تو پولیس مقدمہ درج کرنے پر مجبور ہوئی تاہم پولیس نے امریکی طالبہ کو بچانے کی خاطر شامی پناہ گزین پر تشدد کو مسلمانوں کے خلاف نفرت کے بجائے دو طالبات میں جھگڑے کا مقدمہ درج کیا اور صرف نظم و صبط کی خلاف ورزی کے تحت کارروائی کی درخواست کی۔

امریکی پولیس نے واقعے کی مزید معلومات فراہم کرنے سے انکار کرتے ہوئے مقدمہ بچوں کے جرائم کی دفعات کے تحت درج کیا اس لیے ملزم اور متاثر طالبہ سے متعلق معلومات فراہم نہیں کیں۔

واضح رہے کہ متاثرہ طالبہ شامی میں ہونے والی خانہ جنگی کے دوران 2 برس پناہ گزین کیمپوں میں گزارنے کے بعد اپنے اہل خانہ کے ہمراہ امریکا پہنچی تھی جہاں اس نے پنسلوانیا کے اسکول میں داخلہ لے لیا۔

ڈونلڈ ٹرمپ سے اختلافات، امریکی نائب وزیرخارجہ مستعفی

کی طرف

ویب ڈیسک

دسمبر 23, 2018

واشنگٹن: شام سے فوج کے انخلاف پر امریکی صدر ڈونلڈ ٹرمپ سے اختلاف کے باعث نائب وزیرخارجہ بریٹ میک گروک نے عہدے سے استعفیٰ دے دیا۔

تفصیلات کے مطابق امریکی نائب وزیرخارجہ بریٹ میک گروک شام سے امریکی فوجیوں کی واپسی سے متعلق ڈونلڈ ٹرمپ کے فیصلے پر اختلاف کرتے ہوئے عہدے سے مستعفی ہوگئے۔

بریٹ میک گروک نے اپنا استعفیٰ سیکریٹری آف اسٹیٹ مائیک پومپیو کو ارسال کردیا جس میں انہوں نے ڈونلڈ ٹرمپ کے بیان کو مسترد کرتے ہوئے کہا کہ شام میں داعش کو شکست نہیں ہوئی، ابھی جنگ جاری ہے۔

بریٹ میک گروک کا کہنا تھا کہ شام سے امریکی فوجیوںکا قبل ازوقت انخلا داعش کو ازسرنو منظم کرے گا۔

صدر ٹرمپ سے اختلافات، امریکی وزیر دفاع مستعفی ہوگئے

خیال رہے کہ دو روز قبل امریکی وزیر دفاع جیمزمیٹس صدر ڈونلڈ ٹرمپ سے اختلافات کے باعث عہدے سے مستعفی ہوگئے تھے۔

یاد رہے کہ گزشتہ ہفتے امریکی صدر ڈونلڈ ٹرمپ نے کہا تھا کہ داعش کو تاریخی شکست کے بعد شام سے فوج کی واپسی کا وقت آگیا ہے، شام میں داعش کو شکست دے کر مقصد حاصل کرلیا، دہشت گردی کے خلاف ہمیشہ کھڑے رہے۔

انشاءاللہ پی ٹی آئی 27 جنوری کومیانوالی میں جلسہ کرےگی‘ نعیم الحق

کی طرف

ویب ڈیسک

دسمبر 23, 2018

اسلام آباد : وزیراعظم کے مشیر خصوصی برائے سیاسی امور نعیم الحق کا کہنا ہے کہ عمران خان 27 جنوری کو میانوالی میں جلسے سے خطاب کریں گے۔

تفصیلات کے مطابق وزیراعظم کے مشیرخصوصی برائے سیاسی امورنعیم الحق نے سماجی رابطے کی ویب سائٹ ٹویٹرپراپنے پیغام میں کہا کہ انشاءاللہ پی ٹی آئی 27 جنوری کو میانوالی میں جلسہ کرے گی۔

نعیم الحق نے اپنے پیغام میں مزید کہا کہ وزیراعظم عمران خان میانوالی میں جلسے سے خطاب کریں گے، حکومت بننے کے بعد پہلی بارعمران خان کا جلسے سے خطاب ہوگا۔

یاد رہے کہ گزشتہ روز لاہور میں پنجاب حکومت کی 100 روزہ کارکردگی سے متعلق طلوع سحر کے 100 دن کے عنوان سے منعقدہ تقریب سے خطاب کرتے ہوئے عمران خان کا کہنا تھا کہ اپوزیشن کی سب باتیں مان سکتے ہیں لیکن احتساب سے پیچھے نہیں ہٹ سکتے۔

کچھ بھی ہوجائے احتساب کا عمل نہیں رکے گا‘ عمران خان

وزیراعظم کا کہنا تھا کہ وہ شخص کیسے ملک سے وفادار ہوگا جب اس کی اربوں روپے کی دولت پاکستان سے باہر ہے۔

وزیراعظم کا مزید کہنا تھا کہ کرپشن میں حکومت نہیں عوام کا پیسہ چوری ہوتا ہے اور عوام کو ہی اس کی قیمت ادا کرنا پڑتی ہے، جو بھی معاشرہ آگے بڑھتا ہے وہ کرپشن کو پنپنے نہیں دیتا۔

برصغیر کی نامور گلوکارہ ملکہ ترنم نورجہاں کو ہم سے بچھڑے18برس بیت گئے

کی طرف

ویب ڈیسک

دسمبر 23, 2018

لاہور : لازوال گیتوں سے اپنی آواز جادو جگانے والی برصغیر کی نامور گلوکارہ ملکہ ترنم نور جہاں کو ہم سے بچھڑے18برس بیت گئے مگر اُن کا فن آج بھی ان کے مداحوں کے دلوں میں زندہ ہے۔

تمغہ امتیاز اور پرائیڈ آف پرفارمنس کی حامل پاکستان کی معروف گلو کارہ ملکہ ترنم نور جہاں کی آج 18ویں برسی منائی جارہی ہے، مگر وہ اپنے صدا بہار گیت اور غزلوں کی بدولت آج بھی ہم میں موجود ہیں۔

ملکہ ترنم نور جہاں 21 ستمبر1926کو قصور میں پیدا ہوئیں، ان کا اصل نام اللہ وسائی جبکہ نور جہاں ان کا فلمی نام تھا۔
انہوں نے اپنے فنی کیرئیر کا آغاز 1935 میں پنجابی زبان میں بننے والی پہلی اولین فلم ’شیلا عرف پنڈ دی کڑی‘سے بطور چائلڈ سٹار بےبی نور جہاں کے نام سے کیا۔

بے بی نورجہاں نے بطور چائلڈ اسٹارمتعدد فلمیں کیں جن میں ’گل بکاﺅلی‘، ’سسی پنوں‘ ’ہیرسیال‘شامل ہیں‘۔
موسیقار غلام حیدر نے1941میں انہیں اپنی فلم ’خزانچی‘ میں پلے بیک سنگر کے طور پر متعارف کروایا اور اسی برس بمبئی میں بننے والی فلم ’خاندان‘ ان کی زندگی کا ایک اور اہم سنگ میل ثابت ہوئی۔

اسی فلم کی تیاری کے دوران ہدایت کار شوکت حسین رضوی سےان کی شادی ہوگئی،جبکہ قیام پاکستان کے بعد وہ اپنے شوہر شوکت حسین رضوی کے ہمراہ ممبئی سے کراچی منتقل ہوگئیں۔

انہوں نےبطوراداکارہ بھی متعدد فلمیں کیں جن میں گلنار،چن وے، دوپٹہ، پاٹے خان، لخت جگر، انتظار،نیند، کوئل، چھومنتر، انار کلی اور مرزا غالب کے نام شامل ہیں۔

میڈم نورجہاں نے 1965ءکی جنگ میں اے وطن کے سجیلے جوانوں، رنگ لائے گا شہیدوں کا لہو، میریا ڈھول سپاہیا تینوں رب دیاں راکھاں، میرا ماہی چھیل چھبیلا کرنیل نی جرنیل نی، اے پتر ہٹاں تے نہیں وکدے گاکرپاک فوج کے جوش وجذبے میں بے پناہ اضافہ کیا۔

انہیں شاندار پرفارمنس کے باعث صدارتی ایوارڈ تمغہ امتیاز اور بعد میں پرائیڈ آف پرفارمنس سے بھی نوازا گیا، میڈم نور جہاں نےتقریباََ10 ہزار سے زائد غزلیں و گیت گائے جن میں سے بیشتر اب بھی لوگوں کے ذہنوں میں زندہ ہیں۔

ملکہ ترنم نور جہاں 23 دسمبر 2000 کو 74 برس کی عمر میں انتقال کر گئیں۔اگرچے ایسا لگتا ہے کہ وہ ہم میں نہیں لیکن ان کے گائے ہوئے گیت آج بھی عوام میں بےپناہ مقبول ہیں۔

نواز دور میں پی آئی اے انتظامیہ پائلٹس کے ہاتھوں بیلک میل ہوتی رہی، آڈٹ رپورٹ

کی طرف

محمد صلاح الدین

دسمبر 23, 2018

کراچی : پی آئی اے کی دس سالہ آڈٹ رپورٹ میں انکشاف کیا گیا ہے کہ انتظامیہ کی پائلٹس پر مہربانیاں جاری رہیں، اضافی ادائیگیاں کی گئیں۔

تفصیلات کے مطابق پی آئی اے کی دس سالہ آڈٹ رپورٹ کے مطابق سیاسی حکومتیں اور ایئر لائن انتظامیہ پائلٹس کے ہاتھوں بلیک میل ہوئیں, گزشتہ دس سال میں پائلٹس کو کم ازکم فلائنگ گھنٹوں پر مبنی الاؤنس سے ہٹ کر بھی ادائیگیاں کی گئیں۔

قومی ائیر لائن کے پائلٹس کو کی گئی ادائیگیوں کے مقابلے میں کارکردگی کی شرح کم رہی,آڈٹ رپورٹ میں کہا گیا ہے کہ موجودہ جہازوں کی تعداد کے مقابلے میں پی آئی اے میں پائلٹس کی تعداد بھی زیادہ ہے۔

رپورٹ میں مزید کہا گیا ہے کہ بوئنگ737 گراؤنڈ ہونے کے باوجود اس کے لئے مقرر فرسٹ آفیسرز تنخواہیں وصول کر رہے ہیں،50سے 75 کم از کم فلائنگ گھنٹے پائلٹس کے لئے مقرر کرنا پائلٹس کو غیر ضروری فائدہ پہنچانا ہے۔

ریونیو کے اعتبار سے لیگی حکومت کے پانچ سال بدترین رہے ،فیول کی قیمتیں کم ہونے کے باوجود ریونیو نہایت کم رہا۔ پیپلز پارٹی کے دور حکومت میں ریونیو تین بار سو ملین سے زیادہ رہا جبکہ لیگی حکومت ایک بار بھی سو ملین ریونیو نہ کما سکی۔

آڈٹ رپورٹ کے مطابق خسارے کے اعتبار سے لیگی حکومت کے پانچ سال بدترین رہے، حکومت کے آخری سال میں مجموعی نقصان 360 ملین کا ہوگیا۔

فیولنگ میں گزشتہ دس سال میں 436 ارب روپے خرچ کئے گئے۔2013میں57فیصد فیول پر خرچ کیا گیا جبکہ سب سے کم 30 فیصد 2016 میں خرچ کیا گیا، مینجمنٹ کی نااہلی کی وجہ سے فیول مینجمنٹ درست طور پر نہ ہوسکی۔

ڈاکوؤں نے بینک سے نکلنے والے شہری سے رقم لوٹ لی، سکھن سے رہزن گرفتار، اسلحہ برآمد

کی طرف

ویب ڈیسک

دسمبر 23, 2018

کراچی : ایف بی ایریا میں بینک سے رقم لے کر آنے والا ڈاکوؤں کے ہتھے چڑھ گیا، نارتھ ناظم آباد میں خواتین کو لوٹنے والے ڈاکو کی شہریوں نے دھنائی کردی، سکھن پولیس نے رہزن کو گرفتار کرکے اسلحہ برآمد کرلیا۔

تفصیلات کے مطابق کراچی کے علاقے فیڈرل بی ایریا النور سوسائٹی میں ڈاکوؤں نے بینک سے رقم لے کر آنے والے شہری کو لوٹ لیا، دن دہاڑے تین موٹر سائیکلوں پر سوار چار ڈاکوؤں نے شہری کو موٹرسائیکل سے اتارا اور بے خوف وخطر اس کی تلاشی لی، ملزمان شہری سے نقدی، موبائل فون اوربائیک کی چابی لے کر باآسانی فرار ہونے میں کامیاب ہوگئے۔

دوسری جانب نارتھ ناظم آباد میں خواتین سے لوٹ مار کرکے فرار ہونے والے موٹرسائیکل سوار ڈاکوؤں پر شہری نے گاڑی چڑھا دی، ایک ڈاکو گرتے ہی بھاگ نکلا جبکہ دوسرے ڈاکو کو شہریوں نے پکڑ کر خوب دھلائی کی اور بعد میں پولیس کے حوالے کردیا۔

علاوہ ازیں کراچی کے علاقے سکھن میں پولیس نے خفیہ اطلاع پر کارروائی کرتے ہوئے اسٹریٹ کرمنل کو گرفتار کرلیا، پولیس کے مطابق گرفتار ملزم عبداللہ سے اسلحہ برآمد کرکے اس کیخلاف مقدمہ درج کرلیا ہے۔

30مارچ سے پہلے دونوں چوروں پرجھاڑو پھر جائے، شیخ رشید کی ایک اور پیش گوئی

کی طرف

ویب ڈیسک

دسمبر 23, 2018

اسلام آباد : وفاقی وزیر ریلوے شیخ رشید نے کہا ہے کہ30مارچ سے پہلے دونوں چوروں پرجھاڑو پھر جائے گا، عوام نے عمران خان کو کرپٹ لوگوں کو زنجیریں ڈالنے کیلئےووٹ دیئے۔

ان خیالات کا اظہار انہوں نے اے آر وائی نیوز کے پروگرام سوال یہ ہے میں میزبان ماریہ میمن سے خصوصی گفتگو کرتے ہوئے کیا، شیخ رشید نے کہا کہ وزیر اعظم عمران خان ڈیلیور کرنا چاہتے ہیں لیکن حالات و اقعات نے ان کے ہاتھ باندھ رہے ہیں، وہ بہت محنت کررہے ہیں ،ہمیں لٹا پٹا خزانہ ملا، پاکستان کے پاس عمران خان کےعلاوہ کوئی چوائس نہیں، ان کی کامیابی کی اس ملک کی ضرورت ہے۔

وزیر ریلوے کا کہنا تھا کہ خواجہ سعد رفیق تو کمیشن کھانے آئے تھے، انہوں نے اربوں روپے کی کرپشن کی، اب انہوں نےچخ چخ کی تو نیب میں اصل کھاتا لےجاؤں گا، نیب کو بتاؤں گا کہ کس کس نے اور کہاں کہاں کمیشن کھایا ہے۔

پی اے سی کی چیئرمین شپ سے متعلق ایک سوال کے جواب میں انہوں نے کہا کہ ہم نے دودھ کی رکھوالی پر بلے کو بٹھا دیا ہے، اب شہبازشریف اپنے پروڈکشن آرڈر خود جاری کرے گا، وہ اب ڈاکٹرز کی رپورٹ لائے گا کہ مجھےکھلی فضا میں رکھو، پتہ نہیں خان صاحب کی کیا مجبوری تھی کہ شہبازشریف کو چیئرمین پی اے سی بنادیا۔

پبلک اکاؤئنٹس کمیٹی کی چیئرمین شپ پر میں نےاحتجاج کیا ہے، شہبازشریف زیرعتاب نہیں زیرخطاب ہے، یہ لوگ جیل میں نہیں ہیں بلکہ پنکنک منارہے ہیں۔

شیخ رشید احمد کا مزید کہنا تھا کہ شہبازشریف اور سعدرفیق کے پروڈکشن آرڈر غلط ہوئے، ریمانڈ کےدوران کسی کے پروڈکشن آرڈرجاری نہیں ہوسکتے، جس جس کا کیس نیب میں چل رہاہے وہ یہی کہہ رہا ہے کہ نیب کا قانون تبدیل کرو، نیب زدہ شہباز شریف کو وہی مراعات حاصل ہیں جو شیخ رشید کو ہیں، میں پروڈیکشن آرڈرپراسپیکرسےاحتجاج کروں گا۔

وزیر ریلوے کا مڈٹرم الیکشن کے حوالے سے کہنا تھا کہ عمران خان سادہ آدمی ہے، سیدھی بات کردی، مڈٹرم الیکشن ہوجائیں تو کوئی قیامت نہیں آجائے گی، میں بھی حامی ہوں کہ چار سال بعد الیکشن ہوجائیں، ہم کارکردگی دکھائیں گے توعوام ہمیں دوبارہ لائیں گے۔

1...22,60722,60822,609...30,816 صفحہ%موجودہ صفحہ%کا%کل صفحات

نوازشریف کے خلاف ریفرنسز پرفیصلہ کل سنایا جائے گا

فلسطینی صدر محمود عباس نے پارلیمنٹ تحلیل کردی

ایک سال میں 20 نئی ٹرینیں چلائیں گے،غریب کوسستا ٹکٹ ملے گا‘ شیخ رشید

امریکا میں نسل پرست لڑکی کا مسلمان طالبہ پر تشدد

ڈونلڈ ٹرمپ سے اختلافات، امریکی نائب وزیرخارجہ مستعفی

انشاءاللہ پی ٹی آئی 27 جنوری کومیانوالی میں جلسہ کرےگی‘ نعیم الحق

برصغیر کی نامور گلوکارہ ملکہ ترنم نورجہاں کو ہم سے بچھڑے18برس بیت گئے

نواز دور میں پی آئی اے انتظامیہ پائلٹس کے ہاتھوں بیلک میل ہوتی رہی، آڈٹ رپورٹ

ڈاکوؤں نے بینک سے نکلنے والے شہری سے رقم لوٹ لی، سکھن سے رہزن گرفتار، اسلحہ برآمد

30مارچ سے پہلے دونوں چوروں پرجھاڑو پھر جائے، شیخ رشید کی ایک اور پیش گوئی

سوشل میڈیا

اے آر وائی ڈیجیٹل نیٹ ورک

انٹرایکٹو

کارپوریٹ