سینٹ کی قائمہ کمیٹی برائے خزانہ اوراقتصادی امور کا اہم اجلاس آج ہوگا، اجلاس میں پی آئی اے کی نجکاری اور آئی ایم ایف کے ساتھ کیے گئے وعدوں کے معاملے پر کمیٹی کے ارکان کو اعتماد میں لیا جائے گا۔

ذرائع کے مطابق سینٹ کی قائمہ کمیٹی اپنے آج ہونیوالے اجلاس میں حکومت سے پی آئی اے کی نجکاری کے بارے میں تفصیلی بریفنگ لے گی، اس کے علاوہ آئی ایم ایف کے ساتھ طے پانے والے معاہدے میں نجکاری کے بارے میں حکومت کی جانب سے کئے گئے وعدے وعید کے بارے میں بھی تفصیلی جواب طلب کیا جائیگا۔

واضح رہے کہ سینٹ میں حزب اختلاف حکومت کو آئی ایم یف کے ساتھ طے پانے والے معاہدے اور پی آئی اے کی نجکاری کے حوالے سے شدید تنقید کا نشانہ بناتی رہی ہے۔

ملک کے مختلف شہروں میں مکان میں گیس بھرنے اور آتشزدگی کے نتیجے میں دو بچوں سمیت تین افراد جاں بحق ہوگئے اور پانچ خواتین بے ہوش گئیں۔

فیصل آباد کےعلاقے کھرڑیانوالا میں گزشتہ رات جھوپٹری میں آگ لگنے سے دو بچے آٹھ سالہ اعجاز اور دس سالہ شہزاد جھلس کر جاں بحق جبکہ بچوں کا والد جھلس گیا.

بچوں کے والد کا کہنا ہے کہ انھوں نے سردی سے بچنے کیلئے جھونپڑی میں چولہا جلایا تھا جسکے باعث آگ بھڑک اٹھی، بھکر میں کام کے دوران بیکری میں گیس بھر جانے سے بیکری کا ملازم جاں بحق ہوگیا۔

لاہور میں گلشن راوی کے علاقہ میں گھر میں ہیٹر سے ہونے والی آتشزدگی سے ماں بیٹی جھلس گئیں، جنہیں اسپتال منتقل کر دیا گیا، تحصیل ٹل میں گھر کے کمرے میں کوئلے کی گیس بھرنے سے تین خواتین بے ہوش ہوگئیں ایک کو تشویشناک حالت میں اسپتال منتقل کر دیا گیا۔

ایم کیو ایم کے رہنما روئف صدیقی نے برطانوی وزیر اعظم ڈیوڈ کیمرون وزیر داخلہ تھیریسا مے اور اسکاٹ لینڈ یارڈ کےسربراہ کو خط لکھا ہے جس میں ایم کیو ایم کے قائد الطاف حسین کے خلاف منفی پراپیگنڈے پر اپنی تشویش کا اظہار کیا ہے ۔

اپنے کھلے خط میں روئف صدیقی نے لکھا ہے کہ ایم کیو ایم کے قائد الطاف حسین کے خلاف میڈیا ٹرائل، منفی پروپیگنڈہ اور سازشیں قابلِ مذمت ہیں ، الطاف حسین کروڑوں لوگوں کے دلوں میں بستے اور ان کی نمائندگی کرتے ہیں۔ انہوں نے کہا کہ الطاف حسین کو پہنچنے والی تکلیفوں کے اثرات سےلوگ بے چین ہو رہے ہیں،

الطاف حسین اور ان کی پارٹی کی جدوجہد اخلاص اور انصاف پرمبنی ہے جبکہ پاکستا ن کے ،روائیتی جاگیردار سیاستدان اپنے برطانو ی نژاد کارکنوں کے ذریعے برطانوی قوانین کا سہارا لے کر الطاف حسین کے خلاف منفی پروپیگنڈے میں مصروف ہیں، الطاف حسین اور ان کے ساتھیوں کے خلاف کوئی مقدمہ زیرِ سماعت نہ ہونے کے باجود انہیں ذہنی دباؤ کا شکار کیوں کیا جا رہا ہے، روئف صدیقی نے سوال کیا کہ منفی پروپیگنڈے سے متاثر ہو کر کہیں اختیارات سے تجاوز تو نہیں کیا جا رہاڈاکٹر عمران فاروق کا لندن میں قتل خود الطاف حسین کا بھی بہت بڑا نقصان تھا۔