امریکی خاتون اول مشیل اوباما آج اپنی پچاسویں سالگرہ منا رہی ہیں، صدر اوباما کی طرف سے بیگم کیلئے ڈانس پارٹی کا انعقاد کیا گیا ہے۔

امریکی خاتون اول مشیل اوباما آج پچاس ویں سالگرہ منا رہی ہیں، زندگی کی پچاس بہاریں دیکھنے والی خاتون اول کا دل ابھی بھی جوان ہے، امریکی صدر باراک اوبامہ اور ان کی اہلیہ مشعل اوبامہ ذاتی زندگی میں اپنی نجی زندگی کو کبھی نظر انداز نہیں کرتے۔

اسی لئے امریکی صدر نے پچاس سالہ اہلیہ کی سالگرہ دھوم دھام سے منانے کے لیے وائٹ ہاوٴس میں ففٹی اینڈ فیبیولس کے نام سے شاندار ڈانس پارٹی کا انعقاد کیا ہے۔

امریکی خاتون اول مشیل اوباما امریکی صدر کی بیوی ہونے کی ذمے داریاں نبھانے کساتھ ساتھ بچوں اور فلاحی کاموں میں بھی دلچسپی کا مظاہرہ کرتی ہیں۔
    
   

امریکی کانگریس نے گیارہ کھرب ڈالر کے بجٹ بل کی منظوری دے دی، بل میں پاکستان کیلئے تین کروڑ تیئس لاکھ ڈالر کی امداد ڈاکٹر شکیل آفریدی کی رہائی سے مشروط کی گئی ہے۔

امریکی کانگرس کی جانب سے منظوری کے بعد بجٹ بل کا مسودہ دستخط کیلئے صدر باراک اوباما کو بھجوادیا گیا ہے، امریکی ایوان نمائندگان کے بعد سینیٹ نے بھی سال دوہزار چودہ کے اخراجات کا گیارہ کھرب ڈالر کا بجٹ منظور کرلیا ہے۔

بجٹ کی حمایت میں باہتر اور مخالفت میں چھبیس ووٹ ڈالے گئے، بجٹ کی منظوری سے امریکا میں ستمبر د وہزار چودہ تک شٹ ڈاوٴن کا خطرہ ٹل جائے گا، بل میں پینٹاگون کے لئے پانچ سو باہتر ارب ڈالر کا بجٹ منظور کیا گیا ہے۔

بجٹ مسودے میں ایک شق بھی شامل ہے، جس میں کہا گیا ہے کہ پاکستان کو دہشت گردی کے خلاف کارروائی کے لیے دی جانے والی رقم میں سے تین کروڑ تیس لاکھ ڈالر اس وقت تک روک لیے جائیں۔

جب تک کانگریس کو امریکی وزیرِ خارجہ کی طرف سے یہ ضمانت نہیں مل جاتی کہ ڈاکٹر آفریدی کو جیل سے رہا کر دیا گیا ہے اور ان پر سے تمام الزامات واپس لے لیے گئے ہیں، اس کے علاوہ افغانستان کیلئے بھی امداد پچاس فیصد کم کرکے ایک ارب بارہ کروڑ ڈالر کر دی گئی ہے۔
   

ایران اور چھ مغربی ممالک کے درمیان ایران کے جوہری پروگرام پر ہونے والے جوہری معاہدے کی تفصیلات منظر عام پر آگئیں، جس میں ایران نے یورینیم کی افزودگی کم کرنے کا وعدہ کیا ہے۔

مغربی قوتوں کے ساتھ تعلقات معمول پهر لانے کی پالیسی کے تحت کچھ عرصے تک یورینیم کی افزودگی میں کسی قوم کی کمی نہ کرنے والے ملک ایران نے چھ عالمی طاقتوں سے وعدہ کیا ہے کہ وہ یورینم کی افزودگی میں بتدریج کمی لائے گا۔

امریکہ سے جاری ہونے والی معاہدے کی تفصیلات کے مطابق ایران چھ عالمی طاقتوں کے ساتھ معاہدے کے مطابق یورینیم کی افزودگی بیس فیصد تک لانے پر رضا مند ہوگیا ہے، ایران ہر چھ ماہ بعد یورینیم کی افزودگی پانچ فیصد کم کرے گا۔
   

شام کے کیمیائی ہتھیاروں کو تلف کرنے والے ادارے نے خدشہ ظاہر کیا ہے کہ شام کے کیمیائی ہتھیاروں کی تلفی کے لئے دی گئی مقررہ تاریخ میں تاخیر کا امکان ہے۔

کیمیائی ہتھیاروں کو تلف کرنے والے عالمی ادارے کے سربراہ کا کہنا تھا کہ ہتھیاروں کو گذشتہ سال اکتیس دسمبر تک شام سے منتقل کرکے جون دو ہزار چودہ تک تلف کیا جانا ہے۔

تاہم ان ہتھیاروں کو ابھی اس جہاز پرمنتقل کیا گیا ہے، جس میں انہیں اٹلی بھیجنا ہے لیکن اٹلی میں ان ہتھیاروں کی منتقلی کیخلاف جاری مظاہروں کے بعد ہتھیاروں کی منتقلی معطل کر دی گئی ہے۔

یاد رہے کہ شام میں تین سال سے جاری خانہ جنگی میں کیمیائی ہتھیاروں کے استعمال کے بعد عالمی برادری کی جانب سے عائد معاہدے کے تحت ان کیمیائی ہتھیاروں کو تلف کیا جارہا ہے۔
   

ایران نے جوہری پروگرام کے تنازعے کے حل لیے مثبت پیشرفت کرتے ہوئے عرب ممالک کو خدشات دور کرنے کے لیے ایٹمی پاور پلانٹ کے دورے کی دعوت دے دی۔

ایران کو جوہری پروگرام کے باعث معاشی و سفارتی پابندیوں کا سامنا رہا ہے، عالمی طاقتوں سمیت عرب ممالک نے بھی ایران کے جوہری پروگرام پر خدشات کا اظہار کرتے ہوئے جوہری پروگرام بند کرنے پر زور دیا۔

تاہم عالمی طاقتوں سے ہونیوالے موثر مزاکرات سے پابندیوں میں نرمی اور مذاکرات جاری رکھنے پراتفاق کیا گیا، ایران نے مزید پیش رفت کرتے ہوئے عرب ممالک کو دعوت دی ہے کہ عرب ممالک اپنے خدشات دور کرنے کے لیے ماہرین کی ٹیم جوہری پاور پلانٹ کے معائنے کے لیے روانہ کریں۔

ایران نے جوہری پروگرام پر جائزے کے لیے علاقائی تعاون تنظیم قائم کرنے کی تجویزبھی پیش کی۔

امریکی ریاست کیلیفورنیا کے اینجلزنیشنل فارسٹ میں لگنے والی خوفناک آگ کے ذمہ دار تین افراد کو پولیس نے گرفتار کرلیا۔

امریکی شہر لاس اینجلس کے شمال میں موجود گھنے جنگلات میں اس وقت آگ بھڑک اٹھی جب کیلی فورنیا سےتعلق رکھنےوالے تین نوجوانوں نے غفلت کامظاہرہ کرتے ہوئے دوران کیمپنگ جنگل میں آگ بھڑکا دی۔

جس کی چنگاریوں نے تیز ہوا کے باعث پورے جنگل کو اپنی لپیٹ میں لے لیا، حادثے کے ذمہ دار تینوں نوجوان پولیس حراست میں ہیں، جن میں سے ایک نوجوان نے اعتراف جرم بھی کرلیا ہے۔

خوفناک آگ کے باعث حکام نے سات سو افراد کو علاقہ خالی کرنے کا حکم دے دیا ہے جبکہ آٹھ ہیلی کاپٹر اور دو سپراسکوپر طیارے آگ بجھانے میں مصروف ہیں۔