وفاقی وزیر اطلاعات و نشریات سینیٹر پرویز رشید نے کہا ہے کہ وزیراعظم کے اثاثوں میں غیرمعمولی اضافےکا تاثر درست نہیں، امیر جماعت اسلامی سید منور حسن کے بیان سے ملک اور پارٹی میں ان کا تشخص متاثر ہوگا۔

حکومت نے وزیراعظم کے اثاثوں کے بارے میں امیر جماعت اسلامی کے بیان کا نوٹس لے لیا، وزیراعظم کے ترجمان اور وفاقی وزیراطلاعات و نشریات پرویز رشید نے اپنے بیان میں کہا ہے کہ وزیراعظم کے اثاثوں کی پرانی اور موجودہ مالیت سے متعلق ابہام پیدا کیا جارہا ہے۔

پرویز رشید کا کہنا تھا کہ منقولہ اورغیرمنقولہ اثاثوں کی مالیت میں وقت کیساتھ اضافہ قابل فہم ہے، ساتھیوں کےغلط مشورے امیر جماعت اسلامی کے مبہم بیانات کا سبب ہیں، توقع ہے کہ منور حسن غیرمصدقہ اورغلط بیانات سے اجتناب کرینگے۔

وزیر اطلاعات کا کہنا تھا کہ ایسے بیانات سے ملک اور پارٹی میں منور حسن کا تشخص متاثرہوگا، امیر جماعت اسلامی سید منور حسن نے جمعے کو منصورہ میں خطاب کرتے ہوئے وزیراعظم سے مطالبہ کیا تھا کہ وہ بتائیں کہ ان کے اثاثے دوگنا کیسے ہوگئے۔

امیر جماعت اسلامی کا کہنا تھا کہ وزیراعظم نے عام انتخابات میں اثاثوں کی جو تفصیلات بتائی ہیں وہ انکے موجودہ اثاثوں سے دو گنا کم ہیں۔

پاکستان اور بھارت نے سرحدی کمیونیکیشن ذرائع کو بہترین اور فوری امداد کو استعمال کرنے پر رضامند ہوگئے، پانچ روزہ پاک بھارت ڈائریکٹر جنرلز ملاقات کا مشترکہ اعلامیہ جاری کردیا گیا۔

پاک بھارت تناؤ کی برف سرد موسم میں پگھلنے لگی، پاکستان اور بھارت کی سرحدی فورسزغلطی سے بارڈر پار کرنے والوں کو فوری واپسی کرنے پر رضامند ہوگئے، رینجرز ذرائع کے مطابق ورکنگ باؤنڈری اور انٹرنیشنل باڈر پر پاکستان اور بھارت کیطرف سے کوئی نئی دفاعی تعمیرات نہیں کی جائیں گی۔

ڈیڑھ سال بعد پاکستان رینجرز پنجاب کے ڈائریکٹر جنرل اور بی ایس ایف کے ڈائریکٹر جنرل کے درمیان ہونے والی ملاقات میں قیام امن کے لئے فلیگ میٹنگ جاری رکھنے پر بھی اتفاق کیا گیا، پانچ روز جاری رہنے والی ملاقات میں پاکستانی وفد کی قیادت میجر جنرل خان طاہر خان نے کی۔

بھارت کی جانب سے ڈائریکٹر جنرل بی ایس ایف شیریں سبہاش جوشی نے مرکزی کردارادا کیا، مشترکہ اعلامیہ میں مثبت انداز میں بات چیت اور تنازعات حل کرنے پر بھی اتفاق کیا گیا، دونوں پڑوسی ممالک نے اسمگلنگ کی روک تھام کیلئے معلومات کے تبادلے کو یقینی بنانے پر بھی اتفاق کیا۔

آئندہ چند روز میں ملک کے زیادہ ترعلاقوں میں موسم سرد اور خشک رہےگا، تاہم شمالی بلوچستان اور بالائی علاقے شدید سردی کی لپیٹ میں رہیں گے، چترال کے بالائی علاقے لواری ٹاپ میں برف باری سے رابطہ سڑکیں بند ہوگئیں۔

سردی ان دنوں اپنے جوبن پر ہے، گلگت بلتستان اور چترال میں برفباری سے راستے بند ہوگئے ہیں، جس کی وجہ سے لوگوں کی مشکلات بڑھ گئی ہیں، محکمہ موسمیات کے مطابق دو سے تین روز کے دوران بالائی پنجاب کے علاقوں راولپنڈی، لاہور، گوجرانوالہ، فیصل آباد اور سرگودھا ڈویژن میں صبح کے وقت کہر پڑنے کا امکان ہے۔

آئندہ چوبیس گھنٹوں کے دوران ملک کے بیشتر علاقوں میں موسم سرد اور خشک رہے گا، تاہم مالاکنڈ ، ہزارہ ڈویژن کشمیر اور گلگت بلتستان میں ہلکی بارش اور پہاڑوں پر برفباری کا امکان ہے۔

گزشتہ چوبیس گھنٹوں کے دوران ملک کے بیشتر علاقوں میں موسم سرد اور خشک رہا، تاہم بالائی پنجاب میں کہیں کہیں صبح کے وقت دھند رہی اور مالاکنڈ ڈویژن میں چند مقامات پر ہلکی بارش اور پہاڑوں پر ہلکی برفباری ہوئی۔

کالام میں ایک انچ برفباری جبکہ مالم جبہ میں ایک ملی میٹر بارش ریکارڈ کی گئی، آج ملک میں سب سے کم درجہ حرارت قلات میں منفی گیارہ ڈگری سینٹی گریڈ ریکارڈ کیا گیا۔