پاکستان کی تاریخ میں پہلی بار آج دو سابق صدور کو ایک ہی روزعدالتوں کا سامنا ہے۔

   پاکستان کی تاریخ میں پہلی بار دو سابق صدر دو مختلف عدالتوں کا سامنا کریں گے، سابق صدر زرداری کو آج نیب عدالت میں پیش ہونا ہے، سابق صدر زرداری عدالت میں پیشی کے لئے اسلام آباد پہنچ چکے ہیں۔

دوسری طرف سابق صدر پرویز مشرف کا معاملہ بھی خصوصی عدالت میں تیزی سے چل رہا ہے، ان کی میڈیکل رپورٹ پر فیصلہ آج متوقع ہے ساتھ ہی ساتھ اس درخواست پر فیصلہ متوقع ہے کہ کیا انہیں گرفتار کرکے عدالت میں پیش کیا جائے۔

آج دونوں سابق صدور کا مقدمہ ہوگا، ایک صدر سے صدارت کی کرسی دوسرے صدر کو ملی تھی یعنی پرویز مشرف کے بعد صدر منتخب ہوئے تھے، لیکن آصف علی زرداری نے یہ کرسی الیکشن جیت کر حاصل کی تھی، اب دونوں صدور کو عدالتوں کا سامنا ہے اور دونوں کے مخالف نواز شریف براجمان اقتدار کی کرسی پر ہیں۔

   جنوبی وزیرستان میں سیکیورٹی فورسز نے دہشتگردوں کا حملہ ناکام بنا دیا گیا۔

شمالی وزیرستان میں شدت پسندوں نے سیکیورٹی فورسز کی ایک چوکی پر حملہ کیا، جس میں دستی بموں اور بھاری اسلحہ کا استعمال کیا گیا، آئی ایس پی آر کے مطابق سیکیورٹی فورسز کی جوابی کاروائی کرتے ہوئے دہشت گردوں کا حملہ پسپا کردیا اور اس کاروائی میں دس شدت پسند ہلاک ہوئے، شدت پسندوں سے فائرنگ کے تبادلے میں تین سیکیورٹی اہلکار شہید ہوگئے۔

پانی اور بجلی کے وزیرمملکت عابد شیرعلی خیبرپختونخوا حکومت پر گرجے تو شاہ فرمان وزیرمملکت پر برس پڑے، عابد شیرعلی  کا کہنا ہے کہ بجلی چوری بند نہ ہوئی بجلی بند کردیں گے جبکہ شاہ فرمان نے کہا کہ بنوں کی بجلی بند ہوئی تو پنجاب کی بجلی بند کردیں گے۔

خیبرپختونخوا میں لائن لاسز کے معاملے پر عابد شیرعلی کے بیان نے ایک نئی بحث چھیڑ دی، عابد شیرعلی نے خیبر پختونخوا کے وزرا پر بجلی چوروں کی پشت پناہی کا الزام لگایا۔

عابد شیرعلی کے الزامات کا جواب دینے کیلئے صوبائی وزیر اطلاعات شاہ فرمان میدان میں آگئے اور خیبرپختونخوا اسمبلی میں وفاق کے خلاف شکایتوں کے انبار لگا دیئے۔

شاہ فرمان وزیراطلاعات خیبرپختونخوا کا کہنا تھا کہ ضرورت سے زیادہ بجلی پیدا کرتے ہیں اور ہمیں واجبات بھی نہیں دیئے جاتے، ملک کا ہر شہری سوچنے پرمجبور ہے کہ بجلی پر سیاست کب تک چلے گی اور بجلی کی لوڈشیڈنگ کب ختم  ہوگی اور کب سستی بجلی ملے گی۔

وفاقی وزیر خزانہ اسحاق ڈار مختلف وزارتوں اور سیکرٹریز پر برہم ہوگئے، ان کا کہنا تھا کہ وزارتوں کے بارے میں خبریں چلنے پر انھیں وضاحت دینا پڑتی ہے۔

اقتصادی رابطہ کمیٹی کے اجلاس کی صدارت کے دوران وزیر خزانہ اسحاق ڈار نے کہا کہ وزارتوں کے حوالے سے خبریں چلتی ہیں تو انھیں وضاحت کرنا پڑتی ہے، اس بارے میں متعلقہ وزارتیں چوبیس گھنٹے کے اندر ہر سوال کا جواب دیں۔

وزیر خزانہ کا کہنا تھا کہ سیکرٹریز اجلاس میں غلط سمریاں لے کر آتے ہیں اور باہر جا کر سیاست کرتے ہیں، انہوں نے بتایا کہ ستمبر دوہزار سولہ کے بعد پاکستان آئی ایم ایف کی شرائط کا پابند نہیں ہوگا۔

وزیر خزانہ نے یوریا کی قیمتوں میں فی بیگ ایک سو پچاس روپے اضافے کو بلاجواز قرار دیتے ہوئے کھاد کی کمپنیوں کا اجلاس طلب کرلیا ہے، اسحاق ڈار نے وزارت پیٹرولیم کو عالمی مارکیٹ میں قیمتوں کا موازنہ پیش کرنے کی ہدایت کی ہے۔

اقتصادی رابطہ کمیٹی نے لکی سیمنٹ کو چار کروڑ ڈالر واپس جمع کرنے کی ہدایت کی ہے، جو اس نے کونگو میں سیمنٹ پلانٹ لگانے کیلئے لی تھی، اجلاس میں پٹ کوک بھارت سے واہگہ کے ذریعے درآمد کرنے کی منظوری بھی دی گئی۔