الطاف حسین کا کہنا ہے کہ پرویزمشرف سے امتیازی سلوک اس لیے کیا جارہاہے کیوں کہ وہ سندھ کا بیٹا ہے، آرٹیکل چھ کی زد میں اور لوگ بھی آتے ہیں کاروائی سب کے خلاف کی جائے۔ 

  ایم کیوایم کے قائد الطاف حسین نے انتخابی جلسے سے خطاب کرتے ہوئے کہا کہ وفاق، فوج اور اسٹیبلشمنٹ سے سوال کیا کہ کیا وہ سندھ کی آدھی آبادی کو کھڈے لائن لگا کر سمندرمیں پھینکنا چاہتے ہیں، پرویزمشرف سے ایسے سلوک کی وجہ ان کا سندھ دھرتی سے تعلق ہے۔

الطاف حسین کا کہنا تھا کہ آرٹیکل چھ کے معاملے پرمیٹھا میٹھا ہپ ہپ اور کڑو ا کڑوا تھو تھو کا معاملہ کیا جارہا ہے اور لوگ بھی آرٹیکل چھ کی زد میں آتے ہیں، انکا کہنا تھا کہ پرویزمشرف کو تین سال کی ایکسٹینشن عدالت نے دی سزا بلاتفریق ملنی چاہئے۔

الطاف حسین کا کہنا تھا کہ بھارت نے پاکستان پرحملے کیلئے گندی نگاہ اٹھائی تومقابلے کے لیے دو لاکھ کارکن بھیج سکتا ہوں۔
   

وزیراعظم نوازشریف نے معروف بزنس مین جاوید ملک کو اپنا خصوصی مشیر مقرر کر دیا ہے۔

وزیراعظم نوازشریف نے سابق اینکر پرسن، معروف بزنس مین ، ڈپلومیٹک بزنس کلب یو اے ای کے صدر جاوید ملک کو اپنا خصوصی مشیر مقرر کر دیا ہے، جاوید ملک کو وزیراعظم نے غیرملکی سرمایہ کاری کے حوالے سے مشیر مقرر کیا ہے۔

سابق صدر پرویز مشرف کی بیماری کے حوالے سے پیپلز پارٹی کے رہنماوں کا کہنا ہے کہ پرویز مشرف اس سے پہلے بھی ملک سے باہر جانے کی کوشش کرتے رہے ہیں۔

سابق صدر پرویز مشرف کی طبیعت نے سیاسی ماحول میں ہلچل مچا دی ہے، پرویز مشرف کی طبیعت کے حوالے سے پیپلز پارٹی کے رہنما آغا سراج درانی کا کہنا ہے کہ صدر مشرف اس سے پہلے بھی ملک سے باہر جانے کی کوششیں کرتے رہے ہیں۔

رکن پنجاب اسمبلی راجہ ریاض احمد کا کہنا ہے کہ سابق صدر پرویز مشرف چھ جنوری کو دبئی روانہ ہو جائیں گے اور ان کی روانگی کے ذمہ دار نواز شریف اور چوہدری نثار ہوں گے۔ 

راجہ ریاض کا مزید کہنا تھا کہ پرویز مشرف کو دل کی تکلیف نہیں ہے وہ ڈرامہ کر رہے ہیں ۔