حضرت امام حسین اور شہدائے کربلا کے چہلم کے موقع پر کراچی سے خیبر تک سیکورٹی کے سخت انتطامات کیے جا رہے ہیں۔ کئی شہروں میں موبائل فون سروس بند رہے گی۔ حضرت امام حسین کے چہلم کے موقع پر ملک بھر میں سیکورٹی پلان تیار اہم شہروں میں موبائل فون رہیں گے خاموش اور کئی شہروں میں موٹرسائیکل کی ڈبل سواری پر پابندی ہوگی۔

وفاقی دارالحکومت اسلام آباد میں تین ہزار سیکیورٹی اہلکار ڈیوٹی دیں گے اورفوج کو الرٹ رکھا جائے گا۔ شہر کی دو حساس امام بارگاہوں پر کمانڈوز بھی تعینات کر دیے گئے۔ پہلی بار جڑواں شہروں کی پولیس مشترکہ گشت کرے گی۔ لاہور اور راولپنڈی سمیت پنجاب کے کئی شہروں میں موبائل فون بند رہیں گے۔ ملتان میں مرکزی جلوس کی گزرگاہوں پر سی سی ٹی وی کیمرے نصب کر دیے گئے ہیں۔

ڈی آئی جی آپریشنز لاہور نے کہا ہے کہ ہربنس پورہ کے علاقے سے دہشت گرد گروہ کی گرفتاری کے بعد چہلم امام حسین پر دہشت گردی کے خدشات کو رد نہیں کیا جا سکتا۔ سندھ میں کراچی ، حیدرآباد، میر پور خاص ، خیرپور اور سکھر میں جلوس کے اوقات میں موبائل فون سروس بند جبکہ تیئس اور چوبیس دسمبر کو کراچی، حیدرآباد، میرپورخاص، خیرپور ، سکھر اور لاڑکانہ میں موٹرسائیکل کی ڈبل سواری پر پابندی ہوگی۔ صوبے بھر میں چہلم امام حسین کے موقع پر اسلحہ کی نمائش پر پابندی عائد کرتے ہوئے خصوصی اجازت نامے بھی منسوخ کر دیے گئے۔

ملک بھر میں جلوسوں کے آنے سے پہلے روٹس کی مکمل سیکیورٹی سرچنگ کرکے پولیس پیٹرولنگ کرائی جائے گی۔پشاور اور کوئٹہ میں بھی چہلم کےموقع پر سخت سیکورٹی انتظامات کیے جا رہے ہیں ۔ پارا چنار میں چہلم کے حوالے سے سیکیورٹی پلان مکمل کر لیا گیا۔
    

شہداء فاونڈیشن نےعبدالرشید غازی قتل کیس میں سابق چیف کمشنر خالد پرویز سابق آئی جی چو ہدری افتخار سمیت دیگر افسران کے نام واپس لینے کا فیصلہ کر لیا ہے۔

شہداء فاونڈیشن کے مطابق عبدالرشید غازی قتل کیس میں سات افسران کے نام واپس لینے کا فیصلہ کیا گیا ہے۔ جس کے لیے پولیس کو تحریری درخواست آج دی جائے گی۔

افسران میں سابق چیف کمشنر اسلام آباد خالد پرویز،سابق آئی جی پولیس اسلام آ باد چوہدری افتخار احمد سمیت وفاقی دارالحکومت کے چار اسسٹنٹ کمشنرز حسین بہادر، اجمل بخاری، ملک فرخ ندیم اور طارق رحیم حیدری شامل ہیں ۔
    

ملک بھر میں سردی نے ڈیرے ڈال لئے بالائی علاقوں میں برف باری ہے تو میدانی علاقوں میں ٹھنڈی ٹھار ہوائیں ۔سردی کی شدت میں اضافے کے ساتھ ہی گرم مشروبات کا استعمال بڑھ گیا۔
ملک بھر میں جاڑے نے دھوم مچادی۔ کہیں سرسراتی ٹھنڈی ہوائیں تو کہیں راج ہے ہلکی بارش اور برف باری کا۔ گلگت بلتستان اوراور ملحقہ علاقوں میں ہلکی برفباری جبکہ اپر اور لوئر دیر میں بارش کے بعدسردی کی شدت میں اضافہ ہوگیاہے۔ملکہ کوہسارمری میں بھی وقفے وقفے سے بارش اوربرفباری کا سلسلہ ہے جاری ۔مری میں تین انچ برف باری ریکارڈ کی گئی۔موسم سے لطف اندوز ہونے کے لئے شہری کر رہے ہیں گرم مشروبات کا استعمال۔ پنجاب کے شہروں میں سردی کی شدت کے سارتھ ساتھ دھند نے بھی اپنا راج برقرار رکھا ہو اہے۔خیبر پختونخوا کے بالائی علاقوں میں بھی سردی کی شدت میں اضافہ ہوگیا پہاڑوں نے بھی برف کی سفید چادر اوڑھ لی۔ بلوچستان کے بیشترعلاقے بھی سرد ہواوٴں کی لپیٹ میں ہیں۔درجہ حرارت کم ہوتے ہی کوئلہ اور جلانے والی لکڑی کی مانگ میں اضافہ ہوگیا ہے۔ کوئٹہ کی یخ بستہ ہواؤں نے کراچی کا بھی رخ کر لیا ہے۔ جس کے باعث شہر میں سردی کی شدت میں اضافہ ہو گیا ہے ۔محکمہ موسمیات کے مطابق آئندہ چوبیس گھنٹوں کے دوران خیبر پختونخوا،اسلام آباد،بالائی پنجاب ،کشمیر اورگلگت بلتستان میں چند مقامات پر بارش جبکہ پہاڑوں پر برفباری ہوگی جس کے ساتھ ہی سردی مزید بڑھنے کا امکان ہے۔