تحریک انصاف کےرہنما شاہ محمود قریشی نےمطالبہ کیا ہے پنجاب میں بلدیاتی الیکشن عدلیہ کی زیرنگرانی کرائےجائیں، الیکشن کمیشن کےضابطہ اخلاق کی دھجیاں اڑائی جارہی ہیں، دھاندلی ہوئی تو ہرگلی اور محلے میں احتجاج ہوگا۔

میڈیا سے گفتگو میں ان کا کہنا تھان لیگ کا ذہن پارٹی بنیادوں پر الیکشن سے ٹکرارہا ہے،حلقہ بندیاں پہلے ہی متنازع تھیں، انتخابات اے سی یا ڈی سی کے تحت کرانے کا فیصلہ مزید متنازع ہے، کیونکہ انتظامی افسروں کی تعیناتی وزیراعلیٰ کی مرضی سے ہوتی ہے۔

انھوں نےکہا پنجاب حکومت نےدبانے اور خریدنے کی پالیسی کاآغازکردیا۔ ن لیگ پیسے کی سیاست کوفروغ دینا چاہتی ہے جس سے ہارس ٹریڈنگ ہوگی۔

مسلم لیگ ق کے سربراہ سینیٹر چوہدری شجاعت حسین نے کہا ہے کہ وزیراعظم قومی، معاشی ایجنڈے کو طے کرنے کے لئے کُل جماعتی گول میز کانفرنس بلائیں۔

لاہور میں قائداعظم ڈے کے حوالے سے تقریب سے خطاب کرتے ہوئے چودھری شجاعت حسین نے کہا کہ آج پھر آئی ایم ایف کے در کا بھکاری بنادیا گیا ہے، جبکہ ہمارے دور میں اس سے نجات حاصل کرلی گئی تھی، حکومت اور عوام گھروں اور میدانوں میں سبزیاں آگانے کی مہم شروع کریں۔

چودھری شجاعت کا کہنا تھا کہ سبزیاں لگانے والوں کو مفت کھاد اور بیج فراہم کیا جائے تاکہ اربوں روپے کا زرمبادلہ ضائع نہ ہو، آج قائد اعظم کے پاکستان میں دہشتگردی، ڈرون حملے، لوڈشیڈنگ، مہنگائی اور بیروزگاری عروج پر ہے۔

تقریب سے خطاب کرتے ہوئے پرویز الہٰی نے کہا کہ قائد اعظم نے مسلمانوں کو اسلامی فلاحی مملکت قائم کرکے دی تاکہ وہ اپنی زندگی آزادانہ گزار سکیں، ہمارے دور میں صوبہ بھر میں مفت ادویات اور تعلیم دی جاتی تھیں، طالبات کو وظیفہ دیا جاتا تھا، موجودہ حکومت نے صوبے کے پانچ ہزار سکول بند کردئیے۔

پرویز الہٰی نے کہا کہ اسپتالوں کی ایمرجنسی میں مریضوں کو صرف دھکے ملتے ہیں، ریسکیو 1122 ہمارے دور کا انمول تحفہ ہے، آج ہر شخص بدحال ہے، شہباز شریف ترکی کے وزیراعظم کو ایچی سن کالج لے گئے بہتر تھا وہ انہیں کسی دانش سکول لے جاتے۔