میلبورن میں کھیلے گئے ایشیزسیریز کے چوتھے ٹیسٹ میں آسٹریلیا نے انگلینڈ کیخلاف آٹھ وکٹوں سے کامیابی حاصل کی ہے۔ پانچ میچوں کی سیریز میں آسٹریلیا کو چار صفر کی برتری حاصل ہے۔

ایشیز سیریز کے چوتھے میچ میں انگلینڈ نے آسٹریلیا کو جیت کیلئے دو سو اکتیس رنز کا ہدف دیا۔ چوتھے روز آسٹریلوی ٹیم نے مطلوبہ ہدف کے تعاقب میں تیس رنز بغیر کسی نقصان کے دوبارہ اننگز شروع کی۔

چونسٹھ رنز کے اسکور پر ڈیوڈ وارنر آؤٹ ہوئے، وہ پچیس رنز بناسکے۔ دوسری وکٹ پر کرس راجرز اور شین واٹسن نے ایک سو چھتیس رنز کی شاندار پارٹنرشپ قائم کی۔ ایک سولہ رنز کی اننگز کھیل کر کرس راجرز آؤٹ ہوگئے۔

شین واٹسن نے ناقابل شکست تراسی رنز بنائے۔ دو وکٹوں کے نقصان پر آسٹریلیا نے ہدف حاصل کرلیا۔ اس سے پہلے انگلش ٹیم دوسری اننگز میں ایک سو اناسی رنز بناسکی تھی۔
    

پاکستان کرکٹ ٹیم کے لئے دو ہزار تیرہ کا سال بہت ہی کامیاب ثابت ہوا، رواں سال قومی ٹیم نے ون ڈے اور ٹیسٹ سیریزملاکر سات سیریز اپنے نام کی، مصباح الحق سال کے سب سے کامیاب بلے باز اور سعید اجمل سال کے سب سے کامیاب بولر رہے۔

دو ہزار تیرہ پاکستان کرکٹ ٹیم کی کامیابیوں کا سال رہا اور اس کا سہرا جاتا ہے قومی ٹیم کے بیٹسمینوں اور بولرز کو۔ خاص طور پر جادوگر سعید اجمل اور کپتان مصباح الحق کو، جنھوں نے اپنی شاندار کارکردگی سے ٹیم کو کئی اہم مواقعوں پر جیت دلوائی۔

دوہزار تیرہ کے سب سے کامیاب بلے بازوں کی فہرست میں قومی ٹیم کے مصباح الحق سب سے آگے ہیں۔ مصباح نے سال میں سب سے زیادہ پندرہ نصف سنچریوں کا ریکارڈ بناتے ہوئے ایک ہزار تین دو تہتر رنز بنائے۔ بولنگ میں پاکستانی بولر سب سے آگے رہے۔

کینگ آف دوسرا سعید اجمل نے تمام بولرز کو پیچھے کرتے ہوئے سال دو ہزار تیرہ میں باسٹھ شکار کیے۔ پاکستان کی اچھی کارکردگی کا کریڈٹ سعید اجمل اور مصباح الحق کوہی نہیں بلکہ پوری ٹیم کو جاتا ہے۔

اسی ٹیم ایفرٹ کی وجہ سے پاکستانی شاہین رواں سال بھارت، جنوبی افریقہ اور سری لنکا جیسی مضبوط ٹیموں کو شکست سے دوچار کرنے میں کامیاب رہے۔