آئندہ چند روز میں ملک کے زیادہ ترعلاقوں میں موسم سرد اور خشک رہےگا، تاہم شمالی بلوچستان اور بالائی علاقے شدید سردی کی لپیٹ میں رہیں گے، چترال کے بالائی علاقے لواری ٹاپ میں برف باری سے رابطہ سڑکیں بند ہوگئیں۔

سردی ان دنوں اپنے جوبن پر ہے، گلگت بلتستان اور چترال میں برفباری سے راستے بند ہوگئے ہیں، جس کی وجہ سے لوگوں کی مشکلات بڑھ گئی ہیں، محکمہ موسمیات کے مطابق دو سے تین روز کے دوران بالائی پنجاب کے علاقوں راولپنڈی، لاہور، گوجرانوالہ، فیصل آباد اور سرگودھا ڈویژن میں صبح کے وقت کہر پڑنے کا امکان ہے۔

آئندہ چوبیس گھنٹوں کے دوران ملک کے بیشتر علاقوں میں موسم سرد اور خشک رہے گا، تاہم مالاکنڈ ، ہزارہ ڈویژن کشمیر اور گلگت بلتستان میں ہلکی بارش اور پہاڑوں پر برفباری کا امکان ہے۔

گزشتہ چوبیس گھنٹوں کے دوران ملک کے بیشتر علاقوں میں موسم سرد اور خشک رہا، تاہم بالائی پنجاب میں کہیں کہیں صبح کے وقت دھند رہی اور مالاکنڈ ڈویژن میں چند مقامات پر ہلکی بارش اور پہاڑوں پر ہلکی برفباری ہوئی۔

کالام میں ایک انچ برفباری جبکہ مالم جبہ میں ایک ملی میٹر بارش ریکارڈ کی گئی، آج ملک میں سب سے کم درجہ حرارت قلات میں منفی گیارہ ڈگری سینٹی گریڈ ریکارڈ کیا گیا۔
   

سخت سردی میں گیس پریشر میں کمی نے عوام کی مشکلات میں اضافہ کر دیا ہے، کراچی تا خیبر گھروں کے چولھے ٹھنڈے پڑگئے۔ 

ایک جانب سردی نے اپنا رنگ دکھایا تو دوسری جانب گیس کے پریشر نے بھی عوام کو تنگ کرنا شروع کر دیا، کراچی اور لاہور سمیت ملک کے دیگر چھوٹے بڑے شہروں میں گیس کی بندش اور پریشر میں کمی نے گھروں کے چولھے ٹھنڈے کر دیئے ہیں۔

اس صورتحال میں گھریلو خواتین کے لئے کھانا پکانا جان جوکھوں میں ڈالنے کا کام بن گیا، گھروں میں لکڑیوں کی مدد سے کھانا پکایا جارہا ہے لیکن ستم ظریفی یہ کہ اس صورتحال میں آگ جلانے کی لکڑیاں بھی مہنگی کر دی گئی ہیں۔

پنجاب کے کئی شہروں میں گیس کی فراہمی میں زبردست کمی آگئی ہے، جس کے باعث گھریلو معمولات متاثر ہو رہے ہیں، سوئی سدرن گیس کا کہنا ہے کہ گیس پریشر میں کمی سردی کی شدت میں اضافے کی وجہ سے ہے، بلوچستان کے دار الحکومت کوئٹہ میں گیس کی لائینیں خالی ہوگئی ہیں، جہاں گیس کا دباؤ ہوتا تھا وہاں گیس کا کھنچاؤ چل رہا ہے۔

گیس کی قلت کے ساتھ ملک بھر میں عوام بجلی کی لوڈ شیڈنگ کےعذاب سے بھی دوچار ہے۔

پنجاب میں گیس کے بعد بجلی کی لوڈشیڈنگ میں بھی اضافہ ہوگیا ہے، کئی شہروں اور دیہات میں سولہ گھنٹوں کی لوڈشیڈنگ کی جا رہی ہے، پشاورکے نواحی اور شہری علاقوں میں اعلانیہ اور غیراعلانیہ لوڈشیڈنگ کے باعث شہریوں کو شدید مشکلات کا سامنا ہے۔

کئی علاقوں میں لوڈ شیڈنگ کا دورانیہ دس گھنٹوں تک جا پہنچا ہے، جس سے متاثرہ علاقوں میں پانی کی شدید قلت پیدا ہوگئی ہے، سوئی سدرن گیس کمپنی کی جانب سے گیس کی فراہمی میں کمی کے باعث کراچی میں بھی غیر اعلانیہ لوڈ شیڈنگ میں اضافہ ہوگیا۔

جس کے باعث عوام دوھرے عذاب میں مبتلا ہیں، شہر کے مختلف علاقوں میں کئی کئی گھنٹوں کی لوڈ شیڈنگ کی جارہی ہے۔