شہدائے کربلا کے چہلم پر کراچی کی نمائش چورنگی کے قریب ہونے والے بم دھماکے میں موبائل فون استعمال کیا گیا تھا۔
نمائش چورنگی دھماکے کی فرانزک رپورٹ میں کہا گیا ہے کہ اس دھماکے میں موبائل فون استعمال کیا گیا، رپورٹ کے مطابق دہشتگردوں نے موبائل فون میں الارم سیٹ کردیا تھا اور اسے دھماکہ خیزمواد میں لگایا گیا تھا۔
فرانزک رپورٹ کے مطابق دہشت گرد بارودی مواد چھپانے میں کامیاب رہے تھے، جو سیکورٹی اداروں کی ناکامی کے برابر ہے، نمائش چورنگی دھماکے میں کوئی جانی نقصان نہیں ہوا تھا۔
دنیا میں کرسمس کی خوشیاں تو سبھی مناتے ہیں مگر چینی باشندوں نے تو حد کردی اور کرسمس پر تکیوں سے اٹکھیلیاں کی۔
کرسمس پرتکیے اٹھائے چینی شہری یہاں صرف موسیقی کا لطف اٹھانے ہی جمع نہیں ہوئے بلکہ دل کی بھڑاس نکالنے کیلئے بھی اکٹھے ہوئے ہیں، تکیوں سے ایک دوسرے کی درگت بنانے والے ان لوگوں میں شہری رضاکار اور یونیورسٹی کے طلبا کی ایک کثیر تعداد شریک ہے۔
شنگھائی میں ہرسال منعقد ہونے والی تکیہ لڑائی کا یہ ساتواں سال ہے، جہاں اپنی روزمرہ کی زندگی کی مشکلات اور پریشانیوں سےنجات کے لیے خوشیوں اور مسرت کے چند لمحات حاصل کرنے کے لیے یہاں جمع ہوتے ہیں اور پورے سال کا غصہ اتارنے کیلئے ایک دوسرے پر تکیوں سے وار کرتے ہیں۔
شمالی وزیرستان کے علاقے میران شاہ کے قریب ڈرون حملے میں چار افراد جاں بحق ہوگئے۔
بدھ اور جمعرات کی درمیانی شب میرانشاہ کے قاضی خیل نامی گاؤں پر امریکی ڈورن طیارے نے چار میزائل فائر کیے، حملے کے نتیجے میں چار افراد موقع پر ہی جاں بحق ہوگئے جبکہ متعدد افراد کے زخمی ہونے کی اطلاعات ہیں۔ امریکی ڈورن حملے کے بعد علاقے میں شدید خوف و ہراس پایا جاتا ہے۔
لندن کے ہیتھرو ائیرپورٹ پر پی آئی اے کی پرواز پی کے سات سو اٹھاون فنی خرابی کے باعث چوبس گھنٹے بعد بھی لاہور کیلئے روانہ نہ ہوسکی۔
ذرائع کے مطابق کرسمس تعطیلات کے باعث پی آئی اے کے انجنئیرز غائب ہیں، جسکی وجہ سے پرواز میں موجود خرابی تاحال دور نہیں کی جاسکی، تاخیر سے تین سو زائد مسافر مشکلات کا شکار ہیں۔
مسافروں کا کہنا ہے کہ انہیں دو مرتبہ جلد روانگی کی یقین دہانی کے باوجود تاحال اس پر عملدرآمد نہیں ہوسکا، سہولیات کی عدم فراہمی پر مسافروں نے شدید احتجاج بھی کیا۔
پرواز لیٹ ہونے پر برطانوی سول ایوی ایشن نے پی آئی اے پر لاکھوں پاؤنڈز کا جرمانہ عائد کر دیا ہے، ذرائع کا کہنا ہے کہ فلائٹ کی روانگی میں مزید ایک دن کی تاخیر ہوسکتی ہے۔
سپریم کورٹ میں بلوچستان بدامنی کیس کی سماعت میں آئی جی ایف سی پر آج توہین عدالت کرنے پر فرد جرم عائد کئے جانے کا امکان ہے۔
ذرائع کے مطابق عدالت کے حکم پر آئی جی ایف سی کی عدم پیشی کی صورت ان کے خلاف توہین عدالت کے تحت فرد جرم عائد کیا جاسکتا ہے، یاد رہے کہ گزشتہ سماعت میں عدالت نے آئی جی ایف سی کو ہدایت کی تھی کہ وہ پیش ہو کرلاپتہ افراد کو ڈھونڈنے کے حوالے سے پیش رفت پر رپورٹ کریں کہ کتنے لوگ اب تک لاپتہ ہیں اور کتنوں کو ڈھونڈ نکالا گیا ہے۔
چھ سالہ جمہوری دور میں سندھ میں پہلے بلدیاتی انتخابات کیلئے امیدواروں کی جانب سے کاغذات نامزدگی آج سے وصول کئے جائیں گے۔
مختلف نشستوں کے لئے حکمران جماعت پیپلزپارٹی، متحدہ قومی موومنٹ اور دیگر جماعتوں کے ارکان کی جانب سے کاغذات وصول کئے جاچکے ہیں، کاغذات جمع کرانے کا سلسلہ 29دسمبر تک جاری رہے گا۔
جانچ پڑتال اور اعتراضات کے بعد 13 جنوری کو امیدواروں کی حتمی فہرست جاری کی جائے گی، یاد رہے کہ صوبائی حکومت کی جانب سے بلدیاتی انتخابات کی تاریخ میں تبدیلی کرانے کی درخواست کے باوجود انتخابات الیکشن کمیشن کی مقررکردہ تاریخ پر ہی کرائے جارہے ہیں۔
پاکستان نے چوتھے ون ڈے میچ میں تباہ کن بولنگ اور محمد حفیظ کی شاندار سنچری کی بدولت سری لنکا کو با آسانی آٹھ وکٹوں سے ہرا کر سیریز تین ایک سے اپنے نام کرلی، پاکستان نے رواں سال سات سیریز جیتنے کا ریکارڈ بھی قائم کردیا۔
ابوظہبی میں کھیلے گئے ون ڈے سیریز کے چوتھے میچ میں پاکستانی ٹیم کی کارکردگی نے شائقین کے دل جیت لیے، پہلے بولرز نے کمال دکھایا پھر محمد حفیظ کی شاندار اننگز نے پاکستان کو باآسانی آٹھ وکٹوں سے کامیابی دلا دی۔
شاہینوں کی تباہ کن بولنگ کے آگے سری لنکن ٹائیگرز نہ جم سکے اوردوسو پچیس رنز پر ڈھیر ہوگئے، عمر گل نے ابتدائی تین وکٹیں حاصل کرکے سری لنکا کو دباؤ میں لے لیا، آشان پریانجن اور کمار سنگاکارا نے کچھ مزاحمت کی، پریانجن نے چوہتر رنز اور کمار سنگاکارا اکیاون رنز بناسکے۔
سعید اجمل نے چار کھلاڑیوں کو آؤٹ کرکے رہی سہی کسر پوری کردی، جنید خان نے بھی بہتی گنگا میں ہاتھ دھوئے اور دو کھلاڑیوں کو شکار کیا، پاکستانی ٹیم کی پہلی وکٹ اکتیس رنز پر گری جسکے بعد محمد حفیظ اور احمد شہزاد نے سری لنکن بولرز کو آڑے ہاتھوں لیا اور خوب درگت بناڈالی۔
احمد شہزاد چوالیس رنز بناسکے، صہیب مقصود چھیالیس رنز اور محمد حفیظ نے ایک سو تیرہ رنز کی ناقابل شکست اننگز کھیلیں، محمد حفیظ میچ کے بہترین کھلاڑی قرار پائے، سیریز کا پانچواں اور آخری میچ ستائیس دسمبر کو ابوظہبی میں ہی ہوگا۔
پاکستانی نژاد برطانوی باکسر عامر خان نے کہا ہے کہ لاہور میں باکسنگ کی فائٹ کرنے اور باکسنگ اکیڈمی کے قیام کی ارادہ رکھتا ہوں۔
لمز یونیورسٹی کے اسپورٹس فیسٹول کے موقع پر طلبہ و طالبات سے خطاب کرتے ہوئے انہوں نے کہا کہ ڈینی گارشیا سے شکست کا آج بھی انھی افسوس ہے، مئی میں ہونے والی اگلی فائٹ کیلئے بھرپور تیاری کر رہا ہوں۔
عامر خان کا کہنا تھا کہ اگر نوجوان محنت کریں تو اچھے کھلاڑی بن سکتے ہیں، عامر خان نے اس موقع پر نمائشی باکسنگ بھی کی اور طلبہ و طالبات کے سوالوں کا جواب بھی دیا، وہ طلبہ و طالبات میں گھل مل گئے اور آٹو گراف دینے کے ساتھ ساتھ ان کے ساتھ تصاویر بھی بنوائیں۔
بھارت کے خلاف کل سے ڈربن میں شروع ہونے والا میچ جاک کیلس کے کیرئیر کا آخری ٹیسٹ ہوگا، لیکن وہ ون ڈے کے لئے دستیاب ہوں گے، کیلس ہمیشہ سے جنوبی افریقہ کے سب سے پراعتماد کھلاڑی رہے ہیں۔
کیلس نے انیس سو پچانوے میں انگلینڈ کے خلاف ڈربن میں ٹیسٹ کیرئیر کا آغاز کیا، اٹھارہ سالہ ٹیسٹ کیرئیر میں کیلس نے کئی میچز میں ٹیم کی کامیابی میں کلیدی کردار ادا کیا، بیٹنگ، بولنگ ہو یا فیلڈنگ کھیل کے تینوں شعبوں میں کلیس نے اپنی صلاحیتوں کا لوہا منوایا۔
کیلس کو جنوبی افریقی ٹیم کی ریڑھ کی ہڈی بھی سمجھا جاتا ہے، ان کا چلنا ہمیشہ ہی جیت کی ضمانت رہا ہے، کیلس نے ایک سو پینسٹھ ٹیسٹ میچز میں جنوبی افریقہ کی نمائندگی کی اور پچپن کی اوسط سے تیرہ ہزار ایک سو چوہتر رنز بنائے، جو طویل دورانیئے کی کرکٹ میں چوتھا بہترین اسکور ہے۔
ٹنڈولکرکے بعد ٹیسٹ کرکٹ میں سب سے زیادہ چوالیس سینچریاں بنانے کا اعزاز بھی کیلس کو ہی حاصل ہے، کیلس کا کہنا ہے کہ ٹیسٹ کرکٹ چھوڑنا آسان فیصلہ نہیں لیکن یہ بہترین وقت ہے، اگر فٹ رہا تو دوہزار پندرہ کا ورلڈ کپ ضرور کھیلوں گا۔
اسلامی جمعیت طلبہ کی تقریب سے خطاب کرتے ہوئے امیرجماعت اسلامی سید منورحسن کاکہناتھا وزیرستان میں آپریشن جاری ہے ،بنگلادیش بھی اسی طرح کے آپریشن کا نتیجہ تھا،بلوچستان ، کراچی اور وزیرستان آپریشنز سے کیا کھویا کیا پایا آرمی چیف کو عوام کے سامنے رپورٹ پیش کرنی چاہیے۔
ان کاکہناتھاجدید سیکولرازم صرف دھوکا ہے جس کی وجہ سے یورپ اور امریکا میں بھی غربت میں اضافہ ہوا، آج کی ایسٹ انڈیا کمپنی آئی ایم ایف ہے، سید منور حسن کاکہناتھا امریکا کو یورپ میں ایسی شکست ہوئی کہ جیسی روس کوبھی افغانستان میں نہیں ہوئی لیکن دنیاکونہیں بتایاگیا، ان کاکہناتھا افغانستان کے کئی صوبوں میں طالبان حکومت قائم کرچکے ہیں، سید منورحسن کاکہناتھابھارت سے دوستی کرنی چاہیےلیکن کشمیرپر سودے بازی نہیں کی جائے۔
