امریکا کی وفاقی عدالت نے خفیہ نگرانی پروگرام کو آئین کی خلاف ورزی قرار دے دیا، اسنوڈن کا کہنا ہے کہ عدالت نے ان کے انکشافات کا جواز پیش کردیا ہے۔

اسنوڈن کی جانب سے امریکی خفیہ پروگرام کے انکشاف کے بعد امریکی عدالت میں مقدمے کی سماعت کے دوران جج رچرڈ لیون نے امریکی عوام کی فون کالز ڈیٹا کی نگرانی کو آئین کی چوتھی ترمیم کی خلاف ورزی قرار دیا، نیشنل سیکیورٹی ایجنسی نے موقف اختیار کرتے ہوئے کہا تھا کہ نگرانی ممکنہ دہشتگردی کے حملوں سے حفاظت کے لیے کی جا رہی ہے۔

جج رچرڈ لیون نے ایجنسی کے اس موقف پر شکوک شبہات کا اظہار کیا، عوامی سطح پر بھی خفیہ پروگرام کی مخالفت کی گئی ہے، اسنوڈن نے برطانوی اخبار کو بیان دیتے ہوئے کہا کہ عدالتی فیصلہ خوش آئند ہے اور انہیں یقین تھا کہ خفیہ پروگرام آئین سے مطابقت نہیں رکھتا ہے۔
   

وائٹ ہاؤس کے ترجمان جے کارنی نے سابق امریکی اہلکار ایڈورڈ اسنوڈن کو خفیہ معلومات افشا کرنے پرعام معافی دینے کی تجویز مسترد کر دی ہے۔

امریکی خفیہ پروگرام کے نگران ریک لیگٹ کی جانب سے اسنوڈن کو معلومات فراہم کرنے پر معافی کی تجویز پیش کی گئی تھی، جے کارنی کا کہنا تھا کہ اسنوڈن کو امریکہ واپس آکر عائد الزامات کا سامنا کرنا ہوگا، امریکہ اس معاملے میں موقف تبدیل نہیں کرے گا، سابق امریکی اہلکار ایڈورڈ اسنوڈن پر خفیہ امریکی معلومات فاش کرنے اور غداری کے الزامات ہیں، ایڈورڈ اسنوڈن کو روس میں عارضی پناہ حاصل ہے اور خفیہ راز افشا کرنے کا بھی سلسلہ جاری ہے۔
   

روس نے امریکہ پر الزام عائد کیا ہے کہ امریکہ شام میں کیمیائی ہتھیاروں کے استعمال میں شامی حکومت کے ملوث ہونے کے شواہد فراہم نہیں کر رہا۔

اقوام متحدہ میں شام کے تنازعے پر سیکیورٹی کونسل کے اجلاس میں روس کے سفیر وَٹیلے چَرکِن نے بیان دیتے ہوئے کہا کہ امریکہ کی جانب سے ہتھیاروں کے استعمال میں شامی حکومت کے ملوث ہونے کا الزام عائد کیا گیا تھا، روس نے امریکہ سے کیمیائی ہتھیاروں کے استعمال میں بشارالاسد انتظامیہ کے ملوث ہونے کے شواہد فراہم کرنے کی اپیل کی تھی۔

تاہم امریکہ نے تاحال شواہد فراہم نہیں کیے ہیں، چرکن کا کہنا تھا کہ امریکہ شواہد فراہم کرنے کے معاملے کو نظر انداز کررہا ہے، اقوام متحدہ میں شامی سفیر بشر جعفری نے کہا کے شام کے کیمیائی ہتھیاروں کا تنازعہ حل ہونے کے قریب ہے، خطے کو کیمیائی ہتھیاروں سے بچانے کے لیے اسرائیل کے ہتھیاروں کے معاملے پر بات چیت کا آغاز کرنا ہوگا۔
   

شام کے شہر حلب میں فوج کی بمباری سے مرنے والوں کی تعداد ایک سو پچیس ہوگئی ہے، مرنے والوں میں بڑی تعداد میں بچے بھی شامل ہیں۔

غیر ملکی خبر رساں ادارے کے مطابق شام کی فوج کی جانب سے گذشتہ روز حلب میں شہریوں پر کی جانے والی بمباری نے بڑے پیمانے پر تباہی پھیلائی، بمباری کے نتیجے میں چھتیس بچوں سمیت تراسی افراد جاں بحق اور سیکڑوں زخمی ہوگئے، بمباری کی ذد میں آکر کئی مکانات بھی تباہ ہوگئے۔

امدادی کارکنوں کی جانب سے زخمیوں کو اسپتال منتقل کیا تھا، جہاں کئی زخمی دم توڑ گئے جبکہ اسپتال ذرائع کا کہنا ہے کہ کئی زخمیوں کی حالت تشویشناک ہے، جس کے باعث ہلاکتوں میں اضافے کا خدشہ ظاہر کیا جا رہا ہے، شامی فوج نے دعوی کیا ہے کہ اس نے حلب میں باغیوں کو نشانہ بنایا اور ان کے ٹھکانے تباہ کئے ہیں۔
    
   

روسی وزیر خارجہ سرگئی لاوروف کا کہنا ہے کہ یوکرائن میں جاری بحران کو حل کرنے کے لئے یورپی یونین، یوکرائن اور روس کے ممبران سہ فریقی اجلاس ہونا چاہیے۔

برسلز میں صحافیوں کے ساتھ ایک ملاقات میں روسی وزیرخارجہ سرگئی لاوروف کا کہنا تھا کہ روس یوکرائن میں جاری بحران کو بات چیت کے ذریعے حل کرنے کا خواہش مند ہے، روسی وزیر خارجہ نے زور دیا کہ یوکرائن میں جاری بحران کو فوری طورحل کرنے کے لئے سہ فریقی اجلاس بلایا جائے تاکہ اس مسئلے کوجلد حل کرلیا جائے، ان کا کہنا تھا کہ یورپی یونین اور روس یوکرائن کے سب بڑے تجارتی شراکت دار ہیں۔
   

اقوام متحدہ کے سیکریٹری جنرل بان کی مون نے شام کے کیمیائی اور جوہری ہتھیاروں کو تلف کرنے کے لئے کی جانے والی روس کی کوششوں کوسراہا ہے، اس سے قبل روس کے بحری جہاز شام کے کیمیائی ہتھیاروں کو سمندر کے وسط میں لے جاکر تلف کرنے کے لئے شام کے ساحل پر پہنچ گئے، تاہم ابھی تک اس بارے میں کوئی فیصلہ نہیں کیا گیا کہ سمندر کے کس حصے میں ان ہتھیاروں کو تلف کیا جائے گا۔

یاد رہے کہ پچھلے دنوں دمشق کےمضافات میں ایک کیمیائی حملے میں سینکڑوں افراد کی ہلاکت کے بعد عالمی طاقتوں کیجانب سے جارحیت کے خطرے کے پیش نظر شام نے اپنے تمام کیمیائی اور جوہری ہتھیاروں کو تلف کرنے پر رضا مندی ظاہر کردی تھی اور ایک معاہدے کے مطابق اگلے سال کے وسط تک اپنے تمام کیمیائی اور جوہری ہتھیار تلف کرنے کا پابند ہے۔
   

جنوبی سوڈان میں اقتدار پر قبضے کی کوشش ناکام بنا دی گئی، صدر کی جانب سے ملک میں کرفیو نافذ کر دیا گیا ہے۔

غیر ملکی خبر رساں ادارے کے مطابق جنوبی سوڈان کے صدر سلوا کیر نے تختہ الٹنے کا الزام اپنے حریف سابق نائب صدر ریک مچھر کے گروپ پر عائد کیا ہے، جنوبی سوڈان کے صدر سلوا کیر نے اپنے بیان میں کہا ہے کہ بغاوت کی کوشش سابق نائب صدر کے وفادار فوجیوں کی جانب سےکی گئی۔

اپنے بیان میں مزید کہا کہ ہم نے اقتدار پر قبضے کی کوشش کو ناکام بنا دیا ہے اور سیکیورٹی صورتحال حکومت کے مکمل کنٹرول میں ہے، جنوبی سوڈان کے دارلحکومت جوبا میں شام چھ بجے سے صبح چھ بجے تاحکم ثانی کرفیو عائد کر دیا گیا۔
   

عراق ان دنوں بدترین دہشت گردی کی لپیٹ میں ہے، عراق میں جاری دہشت گردی کی تازہ لہر میں اڑسٹھ افراد جاں بحق اور چوراسی کے قریب زخمی ہوئے۔

غیر ملکی ذرائع کا کہنا ہے کہ عراق میں جاں بحق ہونے والوں کی سب سے ذیادہ تعداد بغداد کے جنوبی شہر راشد کے علاقے میں ہوئیں، جہاں دو کار بم دھماکوں میں کم از کم چوبیس افراد جاں بحق جبکہ پچاس سے زائد زخمی ہو گئے، پولیس ذرائع کے مطابق دارالحکومت بغداد میں ایک کار بم دھماکے اور سڑک کے کنارے نصب بم سے بارہ افراد جاں بحق اور چونتیس کے قریب زخمی ہوگئے۔

ملک بھر میں ہونے والے حملوں کی تعداد ہر آنے والے دن میں اضافہ ہوتا جا رہا ہے، عراق میں ہونے والے تازہ حملوں کی کسی گروپ نے فوری طور پر ذمہ داری قبول نہیں کی ہے، اقوام متحدہ اورعراقی حکومت کے اعداد و شمار کے مطابق سینکڑوں افراد گذشتہ ماہ جاں بحق ہوچکے ہیں۔