اٹلی میں طلباء حکومت کے خلاف گلی کوچوں میں نکل آئے، پولیس سے جھڑپوں میں متعدد زخمی ہوگئے۔
غیر ملکی ذرائع ابلاغ کے مطابق اٹلی کے شہر میلان میں طلباء حکومتی پالیسیوں کے خلاف سڑکوں پر نکل آئے، طلباء کا کہنا تھا کہ حکومت اپنے اخراجات میں کمی لائے اور شعبہ تعلیم کے بجٹ میں اضافہ کرے، پولیس نے طلباء کو منتشر کرنے کے لیے لاٹھی چارج اور آنسو گیس کا استعمال کیا، جس کی زد میں آکر کئی طلباء زخمی بھی ہوئے۔
ہسپتال میں استعمال ہونے والی مصنوعات اور سازوسامان سے متعلقہ بین الاقوامی تجارتی نمائش ”ہاسپیٹلر“ آئندہ سا ل مئی میں برازیل کے شہر ساؤ پاؤلو میں منعقد ہوگی، جس میں شرکت کیلئے ٹریڈ ڈویلپمنٹ اتھارٹی( ٹی ڈی اے پی ) نے درخواستیں طلب کر لی ہیں ، ٹی ڈی اے پی کے ایک ترجمان کے مطابق برازیل کے شہر ساؤ پاؤلو میں منعقد ہونے والی ”پاسپیٹلر“عالمی تجارتی نمائش میں شرکت کے خواہشمند ادارے 20 دسمبر 2013ء تک درخواستیں جمع کراسکتے ہیں-
حکام کے مطابق عالمی تجارتی میلہ 20 تا 23 مئی 2014ء کو منعقد ہوگا ، جس میں ہسپتال کے آلات، آلات جراحی، ایمرجنسی آلات سمیت علاج معالجے میں استعمال ہونے والے آلات تیار اور برآمد کرنے والے ادارے شرکت کرسکتے ہیں، عالمی نمائش میں شرکت کے ذریعے اپنے کاروبار کو وسعت دی جاسکتی ہے جبکہ اس حوالے سے تفصیلات اتھارٹی کی ویب سائٹ سے بھی حاصل کی جاسکتی ہیں۔
رومانیہ کے دارالحکومت بخارسٹ میں ہزاروں لوگوں نے پارلیمینٹیرینز کے خلاف شدید احتجاج کیا۔
رومانیہ کے عوام پارلیمینٹیرینز کی جانب سے لائے گئے بل کے خلاف احتجاج کررہے تھے، بل کے مطابق ممبران پارلیمینٹ کو کرپشن کے الزامات میں تفتیش سے استثناء قرار دیا گیا ہے، احتجاجی مظاہرین حکومت کے خلاف نعرے لگاتے ہوئے سرکار ی عمارتوں کے باہر جمع ہوگئے، جہاں انہیں منتشر کرنے کے لئے پولیس نے طاقت کا استعمال کیا، جس کی وجہ سے تین مظاہرین زخمی ہوگئے جبکہ چار مظاہرین کو کو گرفتار کرلیا گیا ہے۔
مصری پولیس نے قاہرہ میں عین شمس یونیورسٹی کے طالب علموں کو منتشر کرنے کے لئے آنسو گیس کا بھرپور استعمال کیا۔
سیکیورٹی ذرائع کا کہنا ہے کہ مصر میں قاہرہ کے عین شمس یونیورسٹی کے باہر فوج کی حمایت یافتہ حکومت کے خلاف احتجاج کرنے والے طلبہ کو منتشر کرنے کے لئے پولیس نے مظاہرین کے خلاف آنسو گیس کا بھرپور استعمال کیا اور ان کے خلاف سخت کاروائی کی۔
طالب علموں نے پولیس پر جوابی کاروائی کے دوران آنسو گیس کے شیل اور پتھروں کا بھرپور استعمال کیا، مظاہرین نے یونیورسٹی کے کیمپس کے باہر حکومت کے خلاف نعرے بازی کی اور کئی گھنٹے سڑک کو بلاک کردیا، واضح رہے کہ یونیورسٹی کے طالبعلم نے رواں ہفتے کے شروع سے مظاہروں کا سلسلہ جاری رکھے ہوئے ہیں اور انہیں سیکیورٹی فورسز کی سخت مداخلت کا سامنا ہے۔
دنیا میں جہاں آئے دن نت نئی ٹیکنالوجیز متعارف کرائی جاتی ہیں تو وہیں جمہوری وسطی افریقہ میں جاری تنازعہ کے باعث ایک چوتھائی آبادی کو خوراک کی کمی کا سامنا ہے، جس کے باعث ہزاروں افراد کی زندگیوں کو خطرہ لاحق ہے۔
جمہوری وسطی افریقہ میں جاری تنازعہ نے جہاں ہزاروں افراد کو گھر بار چھوڑنے پر مجبور کردیا ہے تو وہیں پانچ اعشاریہ دو ملین کی ایک چوتھائی سے زائد آبادی غذائی قلت کے باعث بھوک کا شکار ہے، رپورٹ کے مطابق اٹھارہ ہزار افراد کو خوراک کی فراہمی کیلئے اسی ہزار ٹن خوراک کا ذخیرہ رہ گیا ہے، جو دس روز تک کیلئے ہے۔
ماہرین کا کہنا ہے کہ کہ تقسیم کے دوران فسادات کے ڈر سے ہمیں مشکلات کا سامنا کرنا پڑرہا ہے اور پانچ دسمبر کے تشدد اور ہلاکتوں کے بعد سے خوراک کا یہ ذخیرہ غیر محفوظ ہوگیا ہے، جس پر ہمیں تحفظات ہیں، بھوک کے شکار لوگوں کا کہنا ہے کہ خوراک کی تقسیم ایک خوش آئند عمل ہے، مگر ہم اس طرح کیمپوں میں نہیں رہنا چاہتے اور نہ ہی یہاں کوئی ہمیں تحفظ فراہم کرنے کو تیار ہے۔
ملک میں جاری افراتفری کے باعث ہم عدم تحفظ کا شکار ہوگئے ہیں اور ایسی زندگی کسی کو پسند نہیں، دوسری جانب مقتدر حلقے خوراک کی کمی اور تشدد کے ذمہ دار جنگجو گروپوں کو گردانتے ہیں۔
دو برطانوی استاد ٹک ٹک رکشے پر دنیا کی سیر کو نکل پڑے، سیر کا مقصد دنیا کو تعلیم کے زیور سے آراستہ کرنا ہے۔
برطانیہ سے تعلق رکھنے والے نک اور رچ دنیا میں تعلیم کی اہمیت کو اجاگر کرنے اور ترقی پزیر ممالک میں تعلیم کے فروغ کیلئے چندہ جمع کرنے کیلئے دنیا کی سیر کو نکل پڑے ہیں لیکن یہ کوئی عام سیر نہیں اور نہ ہی سواری کوئی معمولی ہے، دو استادوں کی سواری تین پہیوں کی ہے۔
انہوں نے سفر کا آغاز اگست دو ہزار بارہ میں کیا تھا اور اب وہ دونوں یورپ، افریقہ، ایشیا اور جنوبی امریکہ میں بیالس ہزار کلومیٹر کا سفر طے کرتے ہوئے بیونس آئرس پہنچے ہیں، اس سفر کیلئے دونوں نے چار سال تک منصوبہ بندی اور رقم جمع کی، انکا کہنا ہے کہ سفر کے ذریعے وہ دنیا میں تعلیم کو درپیش مسائل کی جانب لوگوں کی توجہ مبذول کروانا چاہتے ہیں۔،
اقوام متحدہ کے ملینیم ڈیولپمنٹ گول کے برعکس اب بھی ستاون ملین بچے اسکولوں سے محروم ہے جو کہ ایک بڑی تعداد ہے، تعلیم کی اہمیت کو اجاگر کرنے کیساتھ انکا مقصد ٹک ٹک میں سب سے لمبے سفر کا ریکارڈ بنانا ہے، اپنے سفر کے دوران دونوں تعلیم کیلئے چندہ جمع کر رہے ہیں، جو ٹک ٹک ایجوکیشنل ٹرسٹ کے ذریعے ترقی پذیر ممالک میں علم کے فروغ کیلئے استعمال ہوگا۔
وفاقی وزیرخزانہ اسحاق ڈار نے کہا کہ بینکوں کی طرح حکومت اُوورسیز پاکستانیوں اور مقامی سرمایہ کاروں کیلئے قرضوں کی مارکیٹ تشکیل دینے میں کوشاں ہے۔ سیکیورٹیز اینڈ ایکسچینج کمیشن میں ایک اجلاس کی صدارت کرتےہوئے اسحاق ڈارکا کہنا تھاکہ حکومت نے اُوورسیز پاکستانیوں کیلئے اسلام آبادمیں دوسیکٹربنانےکافیصلہ کیا ہے۔ جہاں یہ مارکیٹ بننے سے چھوٹےاُوربڑےتمام سرمایہ کارقرضوں کی مارکیٹ میں سرمایہ کاری کرسکیں گے۔
قائم مقام چیئرمین ایس ای سی پی طاہر محمود نے بریفنگ دیتےہوئے بتایا کہ تارکین وطن ان سیکٹرزمیں پلاٹ فارن کرنسی میں خرید سکیں گے۔ اس کےعلاوہ پاکستان سرمایہ کاری بانڈ اورٹی بلزجلداسٹاک مارکیٹس میں لانچ کردیئے جائیں گےاورفروری 2014 کے بعد سےاِن کی وہاں تجارت شروع ہوجائیگی۔
سان ڈیاگو کے چڑیا گھر میں شیر کے نومولود بچوں کی آمد سے شہریوں کے چہرے کھل اٹھے۔
سفاری پارک میں پیدا ہونے والے شیر کے ان ننھے بچوں کے جوڑے کو انتہائی نگہداشت میں رکھا گیا ہے، ماں کی جانب سے عدم توجہ کے شکار ان دونوں بہن بھائیوں کو بوتل کے ذریعے دودھ پلایا جارہا ہے، بلی کی طرح نظر آنے والے دونوں بچوں کی نگہداشت پر مامور جنیفر بہت خوش ہیں ۔
جنیفر کے مطابق دونوں بچے ایک دوسرے سے الگ نہیں رہ سکتے، دونوں کو ایک مختصر مدت تک کیلئے جانوروں کے انتہائی نگہداشت سینٹر میں رکھا گیا، جہاں یہ بالغ شیروں کی طرح بیس گھنٹے تک نیند کے مزے بھی لوٹ رہے ہیں۔
ہالی ووڈ باکس آفس پر جادوئی بونوں کا راج ہے، فلم دی ہوبٹ نے دوسرے ہفتے بھی اجارہ داری قائم رکھی ہے۔
ہالی ووڈ کی فلمی دنیا پر چھوٹے چھوٹے بونوں کا راج ہے، یہ بونے خطرناک پہاڑی علاقے میں خزانے کی تلاش میں نکلتے ہیں، ان کے راستے میں سماگ نام کا ڈریگن مشکلات کھڑی کردیتا ہے، چھوٹے سے قد کے بونے دیوہیکل آگ برساتے ڈریگن سے مقابلہ کرتے ہیں، ان کی یہی جرات شائقین فلم کو بے حد پسند آئی اور فلم نے دوسرے ہفتے بھی لگاتار تہتر ملین ڈالرز کا شاندار بزنس کرکے باکس آفس پر حکمرانی قائم رکھی۔
برطانوی مصنف جے آر ٹولکن کے ناول سے ماخوذ فلم دی ہوبٹ آسکر ایوارڈ یافتہ ہدایتکار پیٹر رابرٹ جیکسن کی پیشکش ہے، اس ہفتے باکس آفس پر دوسری پوزیشن حاصل کی، کارٹون فلم فروزن نے دوسرے ہفتے بائیس ملین ڈالرز کا بزنس کیا، فلم کی کہانی دو بہنوں کے گرد گھومتی ہے، بڑی بہن اپنے جادوئی طاقت کے زعم میں اپنی سلطنت کو برف میں ڈھانپ دیتی ہے اور کہیں چھپ جاتی ہے۔
اپنی وادی کو جادو سے آزاد کروانے کے لئے چھوٹی بہن بڑی بہن کی تلاش میں ماری ماری پھرتی ہے، فلم نے دوسرے ہفتے بائیس ملین ڈالرز کے بزنس کے بعد ٹوٹل ایک سو باسٹھ ملین ڈالرز کا بزنس کرلیا۔
وزیراعظم نواز شریف نے وفاقی کابینہ کی قومی سلامتی کمیٹی کا اجلاس آج طلب کرلیا ہے، اجلاس میں طالبان سے مذاکرات اور قومی سلامتی کے امور پر غور کے علاوہ قومی سیکیورٹی پالیسی کے مسودے کی منظوری بھی دی جائے گی۔
وفاقی کابینہ کی قومی سلامتی کمیٹی کا اجلاس وزیراعظم کی زیر صدارت آج اسلام آباد میں ہوگا، اجلاس میں وزارت داخلہ کی تیار کردہ نئی قومی سلامتی سیکورٹی پالیسی کا ڈرافٹ زیر غور لایا جائے گا، اجلاس میں متوقع طور پر طالبان کیساتھ ممکنہ مذاکرات کی حکمت عملی اور اندرونی و بیرونی سیکورٹی صورتحال پر تفصیلی غور کیا جائے گا۔
اجلاس میں وزیر داخلہ چودھری نثار علی خان، وزیراطلاعات پرویزرشید، وزیردفاع خواجہ محمد آصف، چیئرمین جوائنٹ چیفس آف اسٹاف کمیٹی، تینوں مسلح افواج کے سربراہان، ڈی جی آئی ایس آئی لیفٹیننٹ جنرل ظہیرالسلام اور ڈی جی آئی بی سمیت وزیراعظم کے مشیر سلامتی سرتاج عزیز بھی شریک ہوں گے۔
وفاقی وزیرداخلہ چوہدری نثار علی خان کا کہنا تھا کہ تین حصوں پر مشتمل قومی سلامتی پالیسی کا مسودہ تیار ہے، کابینہ سے منظوری کے بعد اس کا باضابطہ اعلان کیا جائے گا، وزیر داخلہ کا کہنا تھا کہ امن کیلئے مذاکرات پہلی ترجیح ہوں گے، انکا مزید کہنا تھا کہ ہر پالیسی کا ٹائم فریم دیا گیا ہے، ایک سال میں آپریشنل نیٹ ورک کو فعال کرنے کی مکمل کوشش کریں گے۔
