امریکا میں بھارتی سفیر کی گرفتاری پر دونوں ممالک میں سفارتی تناؤ کے بعد بھارت نے رد عمل ظاہر کرتے ہوئے امریکی سفارت خانے کی سیکورٹی رکاوٹیں ہٹا دیں۔

امریکی محکمہ خارجہ کی ترجمان میری ہارف نے بریفنگ دیتے ہوئے کہا کہ بھارت کے اس رد عمل سے دونوں ممالک کے سفارتی تعلقات متاثرنہیں ہونگے۔

بھارتی حکام نے اظہارناراضگی کرتے ہوئے سفارتکاروں کو دی جانے والی دیگر استثنی بھی ختم کردیں، میری ہارف کا کہنا تھا کہ نئی دہلی میں امریکی سفارتکاروں نے بھارتی حکام کو سفارتکاری کے بین الاقوامی قوانین پرعملدرآمد کی یاد دہانی کرائی ہے۔

میری ہارف نے کہا کہ جواز پیش کرنے کے لیے بھارتی سفیر کے معاملے میں تمام شواہد اکھٹے کر رہے ہیں۔
       

سابق امریکی اہلکار ایڈورڈ سنوڈن نے برازیل کو پناہ دینے کی صورت میں امریکی جاسوسی میں تحقیقات کے لیے معاونت کی پیشکش کردی۔

برازیل کے اخبار میں شائع ہونے والے سنوڈن کے خط میں پیشکش کی گئی ہے کہ سنوڈن برازیل کی صدر ڈیلما روسوف کی جاسوسی کے معاملے میں برازیل کی معاونت کرسکتے ہیں۔

برازیل کو معاونت حاصل کرنے کی صورت میں سنوڈن کوتحفظ اور پناہ دینا ہوگی، اسنوڈن کے بیان پر برازیل کا کہنا ہے کہ پناہ حاصل کرنے کے لیے سنوڈن کی جانب سے باضابطہ درخواست موصول نہیں ہوئی۔

جس کے باعث اس معاملے پر غور نہیں کیا گیا، برازیل کے سینیٹر نے کہا ہے کہ برازیل حکومت سنوڈن کوپناہ دے اور امریکہ اقرار کرے کہ امریکہ نے حقوق کے تحفظ کی خلاف ورزی کی ہے۔
   

ترک پولیس نے بد عنوانی اور رشوت کے الزام میں وزرا کے بیٹوں کو گرفتار کر لیا۔ وزیراعظم رجب طیب اردگان کا کہنا ہے کہ کرپشن کو ملک بھر سے جڑ سے اکھاڑ پھینک دینگے۔

گرفتار ہونے والواں میں وزیرداخلہ ، معاشی امور کے وزیر اور وزیر ماحولیات وتعیمرانی منصوبہ بندی کے بیٹے شامل ہیں، گرفتار افراد پر الزام ہے کہ انہوں نے بینک سےقرض دینے کے بدلے رشوت وصول کی۔

میڈیا رپورٹس کا کہنا ہے پولیس نے ملک بھر میں بدعنوانی کے خلاف تحقیقات کر رہی ہے، وزیراعظم رجب طیب اردگان نے ملک سے کرپشن اور خاص طور پر تعمیراتی صنعت میں کرپشن کو جڑ سے اکھاڑ پھینکنے کا وعدہ کیا ہے۔

شمالی کوریا کے آنجہانی رہنما کم جونگ کی دوسری برسی پر عوام نے اپنے رہنما کے دیو قامت مجسموں کے قدموں میں پھول رکھ کر خراج تحسین پیش کیا۔

شمالی کوریا میں سابق رہنما کِم جونگ لی دوم کی دوسری برسی نہایت عقیدت و احترا م سے منائی گئی، برسی کی تقریب میں کم جونگ کے ہزاروں چاہنے والوں نے شرکت کی۔

لوگوں نے دارالحکومت پیانگ یانگ نصب مجسموں کے سامنے پھول رکھ کر آنجہانی رہنما سے محبت کا اظہار کیا، کم جونگ نے سترہ برس تک شمالی کوریا پر حکمرانی کی، اس موقع پر گذشتہ ہفتے پھانسی پانے والے رہنما جونگ سونگ تیک کے خلاف مظاہرہ کیا گیا اور ان کے پتلے بھی نذرآتش کئے گئے۔
   

فنکار ہردورمیں اپنے فن سے معاشرے کی عکاسی کرتا ہے، شامی نوجوان آرٹسٹ نے شام میں جاری خانہ جنگی سے ہونے والی تباہی کے مناظر کو اپنی تصاویر میں سمو دیا۔

دبئی میں مقیم نوجوان آرٹسٹ طمام اعظم شام میں جنگ کے آغاز پر اپنے فن اور کینوس چھوڑ کر فرار ہونے پر مجبور ہوئے، آرٹسٹ نے ملک میں ہونے والی تباہی کے مناظر کو ڈیجیٹل آرٹ اور مغربی امتزاج کے ساتھ منفرد اور نئی جدت سے ہمکنار کیا۔

آرٹسٹ کا کہنا تھا کہ شام میں موت کا رقص جاری ہے، وہاں کے لوگ ان تصایر سے متاثر نہیں ہوں گے لیکن ان فن پاروں کا مقصد دنیا کو شام میں ہونے والی تباہی سے آشکار کرنا اور ملک سے باہر مصائب برداشت کرنے والے شامی باشندوں میں سمجھ اور امید پیدا کرنا ہے۔

چین کی بڑھتی ہوئی طاقت سے خائف جاپان نے نئے سیکیورٹی پلان کی منظوری دے دی، نئے پلان کا مقصد خطے میں چین کے بڑھتے ہوئے فوجی اثر و رسوخ کو روکنا ہے۔

غیر ملکی خبر رساں ادارے کے مطابق نئی پالیسی کے تحت جاپان کی کابینہ نے قومی سلامتی کی حکمت عملی اور دفاعی بجٹ میں اضافے کی منظوری دی ہے، نئی جاپانی سیکیورٹی پالیسی کےنتیجےمیں جاپان اگلے پانچ برس میں فوجی سازو سامان خریدے گا جس میں ڈرون، ہوائی جہاز اور خشکی اور پانی پر چلنے والی گاڑیاں شامل ہیں۔

جاپان نیا فوجی یونٹ بھی تیار کرے گا جس کے پاس جزیروں پر قبضہ کرنیکی صلاحیت ہو گی۔ نئی قومی سلامتی کی منظوری ایسے وقت دی گئی جب چند ہی ہفتے قبل چین نے خطے کے متنازع علاقے میں نئی دفاعی حد بندیاں کی تھیں، جنھیں امریکہ اور جاپان دونوں نے قبول کرنے سے انکار کر دیا تھا۔

نئی حد بندیوں کا اعلان کرتے ہوئے چین نے کہا تھا کہ اس علاقے پر سے گزرنے والے جہازوں کو اپنے فلائٹ پلان کی پیشگی اطلاع دینی ہوگی اور اپنی شناخت کروانی ہوگی ورنہ ان کے خلاف ہنگامی دفاعی اقدامات کیے جائینگے۔

خبر رساں ادارے کے مطابق نئی قومی سکیورٹی پالیسی میں جاپانی کابینہ نے اگلے پانچ سال میں دفاعی شعبے کے اخراجات میں پانچ فیصد اضافے کی منظوری بھی دی ہے۔

ہولوکاسٹ پر لکھی گئی جرمن ڈکٹیٹر ایڈولف ہٹلر کے معاون روزن برگ کی ڈائری یوایس ہولوکاسٹ میوزیم کے ہاتھ لگ گئی۔

ستر سال کی تلاش کے بعد بالاخر امریکی امیگریشن اور کسٹم ان فورس منٹ ایجنٹس نے انیس سو چھیالیس کے بعد گم ہو نے والی الفریڈ روزن برگ کی چار سو صفحات پر مشتمل ڈائری رواں سال ڈھونڈ نکالی، میوزیم میں رکھی گئی اس ڈائری کے صفحات اپنی عمر کے ساتھ ساتھ پیلے پڑگئے ہیں۔

روزن برگ نے نازی اسٹیٹ کی تعمیر اور منصوبہ بندی کے ساتھ ساتھ جنگ عظیم دوئم میں بھی اہم کردار ادا کیا تھا، روزن برگ ہولوکاسٹ کے اس علاقے کا انچارج تھا جس میں عورتوں اور بچوں کو بھی نشانہ بنایا گیا۔

روزن برگ نے انیس سو پینتالیس، چھیالیس میں نیرم برگ جرمنی میں اپنے خلاف قائم مقدمےکے دفاع کے دوران اپنی غلطیوں کا اعتراف بھی کیا، جس پر انہیں جنگی جرائم کے مقدمے میں سولہ اکتوبر انیس سو چھیالیس میں پھانسی دے دی گئی تھی۔
   

نیویارک شہر میں ایک ہفتے کے دوران دوسری مرتبہ برف باری سے شہر کی عمارتوں نے سفید چادر اوڑھ لی۔

شہریوں کے علاوہ سیاحوں کی بڑی تعداد نے خوشگوار موسم سے لطف اندوز ہونے کے لیے سینٹرل پارک کا رخ کیا، میامی سے تعلق رکھنے والی ایک خاتون سیاح کے مطابق یہ ان کیلئے کسی جادو سے کم نہیں وہ نیویارک کے موسم کا مزہ لے رہے ہیں اور انہیں بہت اچھا محسوس ہورہا ہے۔

نیویارک کے رہائشیوں کا کہنا ہے کہ وہ کرسمس کے موقع پر شہر میں برفباری سے بہت خوش ہیں۔ نیویارک سے باہر شدید برف باری کے بعد محکمہ موسمیات کا کہنا ہےکہ آج شام تک نیوانگلینڈ کے ساحلی علاقوں میں بھی شدید برف باری کا امکان ہے۔

دنیا بھر میں موسلادھار بارشوں اور برف باری کا سلسلہ جاری ہے، کئی امریکی ریاستوں میں شدید برفباری سے معمولات زندگی متاثر ہیں تو مصر میں سوسال بعد ہونے والی برفباری کو مصریوں نے خوب انجوائے کیا۔

دنیا کے کئی ممالک میں موسم سرما اپنے رنگ دکھا رہا ہے، کہیں برفباری تو کہیں ژالہ باری اور کہیں موسلا دھار بارشوں نے معمول کی زندگی کو درہم برہم کردیا ہے، امریکا کی سترہ ریاستوں میں برفباری سے معمولات زندگی مفلوج ہوگئے ہیں اور شمال مشرق کے ساحلی علاقوں نے برف کی چادر اوڑھ لی ہے ،پروازیں منسوخ اور ٹریفک حادثات میں بھی اضافہ ہوگیا ہے۔

شدید سرد موسم کا یہ سلسلہ اگلے ہفتے تک جاری رہنے کا امکان ہے، مصر میں سو سال بعد ہونے والی برفباری کا لوگوں نے دل کھول کر لطف اٹھایا، شمالی شام اور لبنان میں موسلادھار بارش اور برفباری نے شامی مہاجرین کی مشکلات بڑھادیں، مقبوضہ بیت المقدس میں بیس انچ برف پڑ چکی ہے، غزہ شہر میں شدید بارش کے باعث کئی گھروں کو نقصان پہنچا، درخت گر گئے۔

سیلاب میں گھیرے سیکڑوں خاندانوں کو محفوظ مقامات پر منتقل کردیا گیا ہے، اسرائیل میں پچاس سالوں کی شدید برفباری نے ٹریفک کا پہیہ  جام کردیا ہے، ترکی اور اردن میں بھی تین روز سے برفباری جاری ہے، مشرق وسطیٰ میں بھی تیز بارشوں کے بعد صورتحال گھمبیر ہوگئی ہے۔