شام کے شہر حلب میں فوج کی بمباری سے مرنے والوں کی تعداد ایک سو پچیس ہوگئی ہے، مرنے والوں میں بڑی تعداد میں بچے بھی شامل ہیں۔

غیر ملکی خبر رساں ادارے کے مطابق شام کی فوج کی جانب سے گذشتہ روز حلب میں شہریوں پر کی جانے والی بمباری نے بڑے پیمانے پر تباہی پھیلائی، بمباری کے نتیجے میں چھتیس بچوں سمیت تراسی افراد جاں بحق اور سیکڑوں زخمی ہوگئے، بمباری کی ذد میں آکر کئی مکانات بھی تباہ ہوگئے۔

امدادی کارکنوں کی جانب سے زخمیوں کو اسپتال منتقل کیا تھا، جہاں کئی زخمی دم توڑ گئے جبکہ اسپتال ذرائع کا کہنا ہے کہ کئی زخمیوں کی حالت تشویشناک ہے، جس کے باعث ہلاکتوں میں اضافے کا خدشہ ظاہر کیا جا رہا ہے، شامی فوج نے دعوی کیا ہے کہ اس نے حلب میں باغیوں کو نشانہ بنایا اور ان کے ٹھکانے تباہ کئے ہیں۔
    
   

روسی وزیر خارجہ سرگئی لاوروف کا کہنا ہے کہ یوکرائن میں جاری بحران کو حل کرنے کے لئے یورپی یونین، یوکرائن اور روس کے ممبران سہ فریقی اجلاس ہونا چاہیے۔

برسلز میں صحافیوں کے ساتھ ایک ملاقات میں روسی وزیرخارجہ سرگئی لاوروف کا کہنا تھا کہ روس یوکرائن میں جاری بحران کو بات چیت کے ذریعے حل کرنے کا خواہش مند ہے، روسی وزیر خارجہ نے زور دیا کہ یوکرائن میں جاری بحران کو فوری طورحل کرنے کے لئے سہ فریقی اجلاس بلایا جائے تاکہ اس مسئلے کوجلد حل کرلیا جائے، ان کا کہنا تھا کہ یورپی یونین اور روس یوکرائن کے سب بڑے تجارتی شراکت دار ہیں۔
   

اقوام متحدہ کے سیکریٹری جنرل بان کی مون نے شام کے کیمیائی اور جوہری ہتھیاروں کو تلف کرنے کے لئے کی جانے والی روس کی کوششوں کوسراہا ہے، اس سے قبل روس کے بحری جہاز شام کے کیمیائی ہتھیاروں کو سمندر کے وسط میں لے جاکر تلف کرنے کے لئے شام کے ساحل پر پہنچ گئے، تاہم ابھی تک اس بارے میں کوئی فیصلہ نہیں کیا گیا کہ سمندر کے کس حصے میں ان ہتھیاروں کو تلف کیا جائے گا۔

یاد رہے کہ پچھلے دنوں دمشق کےمضافات میں ایک کیمیائی حملے میں سینکڑوں افراد کی ہلاکت کے بعد عالمی طاقتوں کیجانب سے جارحیت کے خطرے کے پیش نظر شام نے اپنے تمام کیمیائی اور جوہری ہتھیاروں کو تلف کرنے پر رضا مندی ظاہر کردی تھی اور ایک معاہدے کے مطابق اگلے سال کے وسط تک اپنے تمام کیمیائی اور جوہری ہتھیار تلف کرنے کا پابند ہے۔
   

جنوبی سوڈان میں اقتدار پر قبضے کی کوشش ناکام بنا دی گئی، صدر کی جانب سے ملک میں کرفیو نافذ کر دیا گیا ہے۔

غیر ملکی خبر رساں ادارے کے مطابق جنوبی سوڈان کے صدر سلوا کیر نے تختہ الٹنے کا الزام اپنے حریف سابق نائب صدر ریک مچھر کے گروپ پر عائد کیا ہے، جنوبی سوڈان کے صدر سلوا کیر نے اپنے بیان میں کہا ہے کہ بغاوت کی کوشش سابق نائب صدر کے وفادار فوجیوں کی جانب سےکی گئی۔

اپنے بیان میں مزید کہا کہ ہم نے اقتدار پر قبضے کی کوشش کو ناکام بنا دیا ہے اور سیکیورٹی صورتحال حکومت کے مکمل کنٹرول میں ہے، جنوبی سوڈان کے دارلحکومت جوبا میں شام چھ بجے سے صبح چھ بجے تاحکم ثانی کرفیو عائد کر دیا گیا۔
   

عراق ان دنوں بدترین دہشت گردی کی لپیٹ میں ہے، عراق میں جاری دہشت گردی کی تازہ لہر میں اڑسٹھ افراد جاں بحق اور چوراسی کے قریب زخمی ہوئے۔

غیر ملکی ذرائع کا کہنا ہے کہ عراق میں جاں بحق ہونے والوں کی سب سے ذیادہ تعداد بغداد کے جنوبی شہر راشد کے علاقے میں ہوئیں، جہاں دو کار بم دھماکوں میں کم از کم چوبیس افراد جاں بحق جبکہ پچاس سے زائد زخمی ہو گئے، پولیس ذرائع کے مطابق دارالحکومت بغداد میں ایک کار بم دھماکے اور سڑک کے کنارے نصب بم سے بارہ افراد جاں بحق اور چونتیس کے قریب زخمی ہوگئے۔

ملک بھر میں ہونے والے حملوں کی تعداد ہر آنے والے دن میں اضافہ ہوتا جا رہا ہے، عراق میں ہونے والے تازہ حملوں کی کسی گروپ نے فوری طور پر ذمہ داری قبول نہیں کی ہے، اقوام متحدہ اورعراقی حکومت کے اعداد و شمار کے مطابق سینکڑوں افراد گذشتہ ماہ جاں بحق ہوچکے ہیں۔
   

اٹلی میں طلباء حکومت کے خلاف گلی کوچوں میں نکل آئے، پولیس سے جھڑپوں میں متعدد زخمی ہوگئے۔

غیر ملکی ذرائع ابلاغ کے مطابق اٹلی کے شہر میلان میں طلباء حکومتی پالیسیوں کے خلاف سڑکوں پر نکل آئے، طلباء کا کہنا تھا کہ حکومت اپنے اخراجات میں کمی لائے اور شعبہ تعلیم کے بجٹ میں اضافہ کرے، پولیس نے طلباء کو منتشر کرنے کے لیے لاٹھی چارج اور آنسو گیس کا استعمال کیا، جس کی زد میں آکر کئی طلباء زخمی بھی ہوئے۔

مصری پولیس نے قاہرہ میں عین شمس یونیورسٹی کے طالب علموں کو منتشر کرنے کے لئے آنسو گیس کا بھرپور استعمال کیا۔

سیکیورٹی ذرائع کا کہنا ہے کہ مصر میں قاہرہ کے عین شمس یونیورسٹی کے باہر فوج کی حمایت یافتہ حکومت کے خلاف احتجاج کرنے والے طلبہ کو منتشر کرنے کے لئے پولیس نے مظاہرین کے خلاف آنسو گیس کا بھرپور استعمال کیا اور ان کے خلاف سخت کاروائی کی۔

طالب علموں نے پولیس پر جوابی کاروائی کے دوران آنسو گیس کے شیل اور پتھروں کا بھرپور استعمال کیا، مظاہرین نے یونیورسٹی کے کیمپس کے باہر حکومت کے خلاف نعرے بازی کی اور کئی گھنٹے سڑک کو بلاک کردیا،  واضح رہے کہ یونیورسٹی کے طالبعلم نے رواں ہفتے کے شروع سے مظاہروں کا سلسلہ جاری رکھے ہوئے ہیں اور انہیں سیکیورٹی فورسز کی سخت مداخلت کا سامنا ہے۔
   

دنیا میں جہاں آئے دن نت نئی ٹیکنالوجیز متعارف کرائی جاتی ہیں تو وہیں جمہوری وسطی افریقہ میں جاری تنازعہ کے باعث ایک چوتھائی آبادی کو خوراک کی کمی کا سامنا ہے، جس کے باعث ہزاروں افراد کی زندگیوں کو خطرہ لاحق ہے۔

جمہوری وسطی افریقہ میں جاری تنازعہ نے جہاں ہزاروں افراد کو گھر بار چھوڑنے پر مجبور کردیا ہے تو وہیں پانچ اعشاریہ دو ملین کی ایک چوتھائی سے زائد آبادی غذائی قلت کے باعث بھوک کا شکار ہے، رپورٹ کے مطابق اٹھارہ ہزار افراد کو خوراک کی فراہمی کیلئے اسی ہزار ٹن خوراک کا ذخیرہ رہ گیا ہے، جو دس روز تک کیلئے ہے۔

ماہرین کا کہنا ہے کہ کہ تقسیم کے دوران فسادات کے ڈر سے ہمیں مشکلات کا سامنا کرنا پڑرہا ہے اور پانچ دسمبر کے تشدد اور ہلاکتوں کے بعد سے خوراک کا یہ ذخیرہ غیر محفوظ ہوگیا ہے، جس پر ہمیں تحفظات ہیں، بھوک کے شکار لوگوں کا کہنا ہے کہ خوراک کی تقسیم ایک خوش آئند عمل ہے، مگر ہم اس طرح کیمپوں میں نہیں رہنا چاہتے اور نہ ہی یہاں کوئی ہمیں تحفظ فراہم کرنے کو تیار ہے۔

ملک میں جاری افراتفری کے باعث ہم عدم تحفظ کا شکار ہوگئے ہیں اور ایسی زندگی کسی کو پسند نہیں، دوسری جانب مقتدر حلقے خوراک کی کمی اور تشدد کے ذمہ دار جنگجو گروپوں کو گردانتے ہیں۔