پشاور ہائی کورٹ نے ڈرون حملوں سے متعلق توہین عدالت کیس میں سیکریٹری فارن افیئرز کو نوٹس جاری کرتے ہوئے بیس روز میں جواب طلب کرلیا۔ ڈرون حملوں سے متعلق توہین عدالت کیس کی سماعت چیف جسٹس پشاور ہائی کورٹ کی سر براہی میں دو رکنی بنچ نے کی۔
عدالت نے سیکریٹری فارن افئیرز کو نوٹس جاری کرتے ہوئے بیس روز میں جواب طلب کرلیا۔ رٹ پٹیشن فاؤنڈیشن آف فنڈامینٹل رائٹس کی جانب سے دائر کی گئی ہے جس میں موقف اختیار کیا گیا ہے کہ ڈرون حملے بنیادی انسانی حقوق کی خلاف ورزی ہے۔
کراچی کے علاقے ناظم آباد گجر نالے کے قریب بلدیہ عظمیٰ کراچی کے ملازمین نے تنخواہوں کی عدم ادائیگی کے خلاف احتجاج کیا اس دوران مشتعل افراد نے ٹائر جلا کر روڈ بلاک کردیا جسکی وجہ سے ناظم آباد انڈر پاس اور اطراف کے علاقوں میں ٹریفک کی روانی معطل ہوگئ اور بعض مقامات پر گاڑیوں کی طویل قطاریں لگ گیئں جس کی وجہ سے شہریوں کو سخت مشکلات کا سامنا رہا۔
مظاہرے میں شریک ملازمین کا کہنا تھا کہ کئ ماہ گزر جانے کے باوجود تنخواہیں اور دیگر مراعات نہیں ملیں جس کی وجہ سے مہنگائی کے اس دور میں ان کے لئے گزر بسر کرنا مشکل ہوگیا ہے، ملازمین نے مطالبہ کیا کہ فوری طور پر تنخواہیں ادا کی جائیں بصورت دیگر احتجاج کا دائرہ وسیع کیاجائے گا اور ملازمین کام چھوڑ دیں گے۔
سپریم کورٹ کےحکم کے باوجود آئی جی ایف سی ایک بار پھر عدالت میں پیش نہیں ہوئے، چیف جسٹس نےاُنھیں ہرحال میں پیر کے روز پیش ہونےکا نوٹس جاری کردیا۔
آئی جی ایف سی توہین عدالت کیس کی سماعت چیف جسٹس کی سربراہی میں عدالتی بینچ کی، آئی جی ایف سی ایک بار پھر عدالت میں پیش نہیں ہوئے، جس پر چیف جسٹس تصدق جیلانی نے کہا کہ آئی جی ایف سی کا عدالت میں پیش نہ ہونا افسوسناک ہے، انھیں پیشی کی واضح ہدایت دی گئی تھی۔
چیف جسٹس نے آئی جی ایف سی کو دوبارہ نوٹس جاری کرتے ہوئے حکم دیا کہ وہ پیر کے روز ہر حال میں پیش ہوں، دوسری جانب ایڈیشنل اٹارنی جنرل نے قائم مقام آئی جی ایف سی کی تعیناتی کا نوٹیفکشن عدالت میں پیش کردیا، عدالت نے ایڈووکیٹ جنرل بلوچستان کو امن وامان کے حوالے سے رپورٹ جمع کرانے کی ہدایت کرتے ہوئے سماعت پیر تک ملتوی کردی۔
بھٹ میں شاہ عبداللطیف بھٹائی کے عرس کی تین روزہ تقریبات جاری ہے، دنیا بھرسے زائرین کی آمد کا سلسلہ جاری ہے، تقریبات کا آغازاسپیکر سندھ اسمبلی آغا سراج درانی اور شرمیلا فاروقی نے کیا۔
سندھ کے صوفی شاعر حضرت شاہ عبداللطیف بھٹائی کے دوسوسترواں عرس کی تقریبات جاری ہے، عرس کی تقریبات کا افتتاح مزار پر چادر چڑھا کر کیا گیا،عرس میں شرکت کے لیے ملک بھر سے زائرین کی آمد کا سلسلہ جاری ہے۔
مزار کے احاطے میں شاہ کے فقیر اْن کا کلام لوگوں کوسنا رہے ہیں، محکمہ اوقاف کی جانب سے زائرین کے لیے لنگر کاانتظام بھی کیا گیا ہے، عرس کے موقع پر زرعی نمائش، ادبی کانفرنس اورسندھ کی روایتی کْشتی ملاکھڑا کے مقابلے بھی ہوں گے۔
عرس کے تیسرے اور آخری روز موسیقی کا پروگرام اور ایوارڈز کی تقریب ہوگی عرس کے موقع پر سکیورٹی کے سخت انتظامات کیے گئے ہیں، مزار کے داخلی راستوں پر واک تھرو گیٹ بھی نصب ہیں۔
کوئٹہ کے نواحی علاقے قمبرانی روڈ پر گھر کے کمرے میں گیس بھر جانے سے دھماکے کے نتیجے میں بچہ اور خاتون سمیت تین افراد زخمی ہوگئے۔
ریسکیو ذرائع کے مطابق قمبرانی روڈ کے کلی بیڑﺅمیں اہل خانہ رات کو سوتے وقت گیس کاچولہا بند کرنا بھول گئے تھے صبح جب نماز کی تیاری کے لئے اٹھے اور ماچس کی تیلی جلائی تو کمرے میں موجود گیس کے باعث دھماکہ ہوا جس سے کمرے کی چھت اڑ گئی ۔
آگ کے شعلے بھڑک اٹھنے سے خاتون اور بچہ سمیت ایک شخص شدید زخمی ہوگیا ، مقامی لوگوں نے اپنی مدد آپ کے تحت آگ پر قابو پالیا، زخمیوں کو بولان میڈیکل کمپلیکس منتقل کردیا گیاہے۔
اقوام متحدہ کی جنرل اسمبلی نے ڈرون حملوں کے خلاف قرارداد متفقہ طور پر منظور کر لی ہے، قرارداد میں مطالبہ کیا گیا ہے کہ ڈرون حملوں کے استعمال کو بین الاقوامی قوانین کے مطابق بنایا جائے پہلی مرتبہ اقوام متحدہ میں ڈرون حملوں کے خلاف قرارداد پیش کی گئی ہے جسے متفقہ طور پر منظور کرلیا گیا ہے۔
دفتر خارجہ سے جاری بیان کے مطابق پاکستان نے ہم خیال ممالک کے ساتھ مل کر یہ قرارداد اقوام متحدہ کی جنرل اسمبلی میں پیش کی، قرارداد میں ممبر ممالک سے کہا گیا ہے کہ وہ اس بات کو یقینی بنائیں کہ انسداد دہشتگردی کے لیے استعمال کیے جانے والے ڈرونز بین الالقوامی قوانین، اقوام متحدہ کے چارٹر اور بین الاقوامی انسانی حقوق کے مطابق ہوں۔
قرارداد میں اس بات پر زور دیا گیا ہے کہ ڈرون حملوں کی قانونی حیثیت پر مختلف ممالک کے مابین معاہدے کیے جائیں، وزارت خارجہ کے مطابق اگلے برس مارچ میں اقوام متحدہ کی انسانی حقوق کونسل میں بحی ڈرون حملوں کا معاملہ اٹھایا جائے گا۔
اسماعیلی جماعت کے روحانی پیشوا اور آغا خان یونیورسٹی کے چانسلر پرنس کریم آغا خان نے کہا ہے کہ اعلیٰ تعلیم کیلئے وسیع ترمواقع فراہم کرنا اُن کے ادارے کا مشن ہے۔
آغا خان یونیورسٹی کے کانووکیشن سے خطاب کرتے ہوئے پرنس کریم آغا خان کا کہنا تھا کہ مستقبل میں مزید سات نئے گریجوٹ انسٹی ٹیوٹ قائم کیے جائینگے ،جس میں میڈیا کمیونیکیشن ، ماحولیات ، اقتصادیات، گلوبل سائنس، لبرل آرٹس سمیت دیگر شعبے شامل ہوں گے۔
آغا خان یونیورسٹی کے کانووکیشن سے یونیورسٹی کے صدر فیروز رسول، گورنرسندھ ڈاکٹرعشرت العباد خان، وزیراعلیٰ سندھ سید قائم علی شاہ نے بھی خطاب کیا، اس موقع پر گریجوٹ اور اعلیٰ کارکردگی کا مظاہرہ کرنے والے طلبا میں گولڈ میڈل، اور اسناد تقسیم کی گئیں۔
شمالی وزیرستان میں سیکیورٹی فورسز سے جھڑپوں کے دوران تئیس شدت پسند مارے گئے جبکہ تین جوان زخمی ہوئے۔
عسکری حکام کے مطابق بدھ کی شب دہشت گردوں کے ایک گروپ نے کھجوری چیک پوسٹ سے واپس آنے والے سیکیورٹی فورسز کے قافلے کو نشانہ بنانے کی کوشش کی، جس پردونوں جانب سے فائرنگ کا تبادلہ ہوا، فورسزکی موثر کاروائی میں تئیس شدت پسند مارے گئے جبکہ تین سکیورٹی اہلکار زخمی ہوگئے۔
سکیورٹی فورسز کا قافلہ ان زخمی جوانوں کو واپس لے کر آرہا تھا، جو بدھ کے روز ایک مسجد میں دوران نماز شدت پسندوں کے حملے میں زخمی ہوئے تھے، اس حملے میں اہلکار شہید بھی ہوئے تھے، اطلاعات کے مطابق اردگردکےعلاقوں میں سرچ آپریشن بھی کیا گیا ہے۔
چئیرمین پیمرا نے بحالی کے حکم پرعمل نہ ہونے پرتوہین عدالت کی درخواست دائرکردی، اسلام آباد ہائی کورٹ کے جسٹس ریاض نے چیئرمین پیمرا کی برطرفی کے خلاف سماعت کی دوسری درخواست منظورکرتے ہوئے کہا کہ حکم واضح ہے۔
اسلام آباد ہائی کورٹ میں چیئرمین پیمرا چوہدری رشید کی جانب سے توہین عدالت کی درخواست دائر کردی گئی، جس میں موقف اختیار کیا گیا ہے کہ عدالتی عبوری حکم کو نہیں مانا جارہا، چیرمین پیمرا کی برطرفی کے خلاف سماعت کے لیے دائر ایک اور درخواست بھی اسلام آباد ہائی کورٹ نے منظور کرلی۔
درخواست میں کہا گیا ہے کہ عدالت نے چیرمین چوہدری رشید کی برطرفی کا نوٹیفیکیشن معطل کیا مگر نئے مقرر کیے گئے چیرمین کا نوٹیفیکیشن تاحال برقرار ہے، اس طرح عملی طور پر ادارے میں دو چیرمین کام کر رہے ہیں، کیس کی سماعت جسٹس ریاض احمد خان نے جنوری کے دوسرے ہفتے تک ملتوی کردی۔
چیئرمین پیمرا کی برطرفی کے خلاف سماعت کے لیے درخواست اسلام آباد ہائی کورٹ کے جسٹس ریاض احمد خان نے سماعت کے لیے منظور کر لی ہے, درخواست پیمرا کی جانب سے دائر کی گئی ہے ۔
درخواست میں کہا گیا ہے کہ عدالت نے چیئرمین چوہدری رشید کی برطرفی کا نوٹیفیکیشن معطل کیا مگرنئے مقرر کیے گئے چیئرمین کا نوٹیفیکیشن تاحال برقرار ہے اس طرح عملی طور پر ادارے میں دو چیرمین کام کر رہے ہیں۔
کیس کی سماعت جسٹس ریاض احمد خان نے جنوری کے دوسرے ہفتے تک ملتوی کردی۔ جسٹس ریاض احمد نے ریمارکس دیتے ہوئے کہا کہ عدالتی حکم واضح ہے۔
