پاکستان کرکٹ بورڈ نے قومی ٹیم کے طویل القامت فاسٹ بائولر محمد عرفان کو فٹنس بہتر بنانے کے لئے دبئی بھیجنے کا فیصلہ کیا ہے۔
پی سی بی کے ترجمان کے مطابق محمد عرفان اٹھائیس دسمبر کو دبئی کے لئے روانہ ہوں گے۔ جہاں وہ قومی کرکٹ ٹیم کے غیر ملکی فزیو اور ٹرینر ڈیل نیلر اور پی سی بی کے ڈاکٹر فیصل کی زیر نگرانی تربیت حاصل کریں گے۔ محمد عرفان جنوبی افریقہ کے دورے کے دوران کولہے کی ہڈی میں فریکچر کے باعث ان فٹ ہو گئے تھے۔ جس کے بعد ڈاکٹرز نے انہیں چھ ہفتے کے آرام کا مشورہ دیا تھا۔
سری لنکا کے خلاف ٹیسٹ سیریز کے لئے پاکستان کے پندرہ رکنی اسکواڈ کا اعلان کردیا گیا، ون ڈے سیریز میں عمدہ کارکردگی کی بدولت محمد حفیظ اسکواڈ میں جگہ بنانے میں کامیاب ہوگئے۔
پاکستان اور سری لنکا کے درمیان تین ٹیسٹ پر مشتمل سیریز کا آغاز اکتیس دسمبر سے ابو ظہبی میں کھیلے جانے والے میچ سے ہوگا۔ ٹیسٹ سیریز کے لئے پاکستان کے پندرہ رکنی اسکواڈ کا اعلان کردیا گیا ہے۔
ٹیم کی قیادت مصباح الحق ہی کریں گے، ون ڈے سیریز میں عمدہ کارکردگی کی بدولت محمد حفیظ کی ٹیسٹ اسکواڈ میں واپسی ہوئی ہے۔ تجربہ کار بیٹسمین یونس خان اور وکٹ کیپر عدنان اکمل بھی اسکواڈ کا حصہ ہیں۔ دیگر کھلاڑیوں میں احمد شہزاد، خرم منظور، شان مسعود، اظہر علی، اسد شفیق، جنید خان، سعید اجمل، عبدالرحمن، عمر گل، راحت علی اور محمد طلحہ شامل ہیں۔
پاکستانی نژاد برطانوی باکسر عامر خان نے لاہور میں اپنی فیملی کے ساتھ مصروف دن گذارا، سید علی ہجویری المعروف داتاگنج بخش کے مزار پر حاضری دی اور واہگہ بارڈر پر رینجرز کی پریڈ دیکھی۔
عامر خان اپنی فیملی کے ساتھ داتا دربار پہنچے جہاں انھوں نے دربارپر حاضری کے ساتھ ساتھ اپنے اگلے مقابلے میں کامیابی کے لئے دعا بھی مانگی ، عامر خان اپنے والدین ، بیگم اور بھائی کے ہمراہ واہگہ بارڈر پہنچے تو رینجرز کے جوانوں اور عوام نے انکا استقبال کیا ۔
عامرنے اس موقع پر واہگہ بارڈر پر رینجرز کی پریڈ کو بھی بہت پسند کیا اور کہا کہ پاک فوج کے جوانوں میں وہ خود کو بہت مضبو ط اور طاقتور محسو س کررہے ہیں، عامر خان کا کہنا تھا کہ پاکستان میں باکسنگ کا بڑا ٹیلنٹ موجود ہے، پاکستانی باکسرز کی تربیت کیلئے وہ جلداپنی باکسنگ اکیڈمی کھولنے کے خواہش مند ہیں، عامر خان نے کہا کہ پاکستان پرامن اور خوبصورت ملک ہے جہاں انہیں ہمیشہ پاکستانی عوام سے بے حد محبت وپیار ملا۔
خیبر پختونخوااور کراچی کے بعد بلوچستان میں بھی جماعت اسلامی تحریک انصاف نے نیٹو سپلائی اور ڈرون حملوں کے خلاف دھرنا دیا ، ڈرون حملوں اور نیٹو سپلائی کے خلاف جماعت اسلامی اور پاکستان تحریک انصاف کے کارکنوں نے کوئٹہ کے علاقے مغربی بائی پاس خیزی چوک پر دھرنا دے کر چمن جانے والی بین الاقوامی شاہراہ کو ٹریفک کی آمد ورفت کیلئے بند کردیا ۔
جماعت اسلامی کی صوبائی قیادت نے افغانستان میں مداخلت کے خاتمہ کا مطالبہ کرتے ہوئے کہا کہ نیٹو کی آڑ میں افغانیوں کے قتل عام کا سامان لے جانے کی اجازت قطعاً نہیں دیں گے دھرنے میں امریکہ مخالف مذہبی جماعت جمعیت علماء اسلام نظریاتی نے بھی شرکت کی اور یکجہتی کا بھرپور اظہار کرتے ہوئے امریکہ کے خلاف مشترکہ جدوجہدکو وقت کی اہم ضرورت قرار دیا ۔
کوئٹہ میں دیئے جانے والے دھرنے میں پاکستان تحریک انصاف کے کارکنان نے بھی بڑی تعداد میں شرکت کی ڈرون حملوں کو پاکستان کی خود مختاری پر حملہ قرار دیتے ہوئے مطالبہ کیا گیا کہ ڈرون حملے بند کئے جائیں تحریک انصاف نے جعفر آباد نصیر آباد اور چمن میں بھی نیٹو سپلائی اور ڈرون حملوں کے خلاف دھرنا دینے کا اعلان کیا امریکہ مخالف اتحادی جماعتوں کی جانب سے فیصلہ کیا گیا کہ امریکہ کی مداخلت کے مکمل خاتمہ تک احتجاج جاری رکھا جائے گا۔
مسلم لیگ ن کے رہنما حمزہ شہباز نے کہاکہ کسی کے پاس جادو کی چھڑی نہیں کہ راتوں رات مسائل حل ہوجائیں، خواجہ آصف کا کہنا ہے کہ چھ سالوں میں عدلیہ ارتقائی عمل سے گزری ہے۔
خواجہ محمد رفیق کی اکتالیس ویں برسی کے موقع پر مسلم لیگ ن کے رہنما حمزہ شہباز کا کہنا تھا کہ وقت بدل گیا ہے کل کا ہائی جیکر آج ملک کا وزیر اعظم ہے۔
حمزہ شہباز نے مزید کہا کہ کسی کے پاس جادو کی چھڑی نہیں کے مسائل راتوں رات حل ہوجائیں، اس موقع پر خطاب کرتے ہوئے خواجہ آصف کا کہنا تھا کہ چھ سالوں میں عدلیہ ارتقائی عمل سے گزری ہے، ان کا کہنا تھا کہ خواجہ سعد رفیق نے والد کی قربانیوں سے نوجوانوں کو روشناس کرایا۔
تحریک انصاف اورجماعت اسلامی نے خیبر پختون خوا کے بلدیاتی انتخابات میں اتحاد کا فیصلہ کیا ہے ، پاکستان تحریک انصاف پشاور کے صدر یاسین خان نے پشاور میں پریس کانفرنس سے خطاب میں کہا کہ بلدیاتی انتخابات میں دونوں جماعتیں مشترکہ امیدوار نامزد کریں گی ۔
ان کا کہنا تھا کہ پاکستان تحریک انصاف کے دروازے قومی وطن پارٹی کے لئے بھی کھلے ہیں، اس موقع پر جماعت اسلامی کے ضلعی امیرکاکہنا تھا پی ٹی آئی اور جماعت اسلامی کے اتحاد میں دیگرجماعتیں بھی شامل ہوسکتی ہیں۔
جماعت اسلامی کے سیکریٹری جنرل لیاقت بلوچ نے کہا ہے کہ بلاول بھٹوکی مسیحی وزیر اعظم کی خواہش آئین کے خلاف ہے ۔
بلاول بھٹو کےبیان پر لیاقت بلوچ کا کہنا تھاکہ مسیحی وزیر اعظم کی خواہش آئین سےمتصادم ہے، آئین کےمطابق پاکستانی وزیر اعظم کاختم نبوت،اسلام پرایمان لازمی ہے،لیاقت بلوچ نے کہا کہ آئین پاکستان کےتحت مسیحی وزیراعظم نہیں ہوسکتا۔
کراچی میں گیس کے پریشر میں اچانک کمی آنے سے نہ صرف گھروں کو گیس کی فراہمی منقطع ہو گئی بلکہ پراسسنگ یونٹس بھی بند ہو گئے، کراچی میں گیس کے دبائو میں کمی کےباعث شہرکےمختلف علاقوں میں گیس کی فراہمی بند ہو گئی ،نارتھ کراچی ،لیاری ،کو رنگی،صدر،پی ای سی ایچ ایس میں گیس نہ آنے سے لوگوں کو کھانا پکانے میں شدیدمشکلات کا سامنا کرنا پڑا جبکہ ڈیفنس سوسائیٹی اور صنعتی علاقوں میں بھی گیس کا بحران پیدا ہوگیا،سائٹ،نارتھ کراچی اورکورنگی میں گیس پریشرمیں کمی کےباعث پراسسنگ یونٹ بندہوگئے۔
قومی اسمبلی کی قائمہ کمیٹی برائے پارلیمانی امور نے سندھ اور پنجاب میں بلدیاتی انتخابات مارچ میں کرانے کی سفارش کردی ہے، الیکشن کمیشن حکام نے قومی اسمبلی کی قائمہ کمیٹی برائے پارلیمانی امور کو بلدیاتی انتخابات سے متعلق بریفنگ میں بتایا ہے کہ پنجاب میں تیس کروڑ بیلٹ پیپر کی چھپائی تیس جنوری تک ممکن نہیں۔
الیکشن کمیشن کے حکام نے بتایا کہ نئی حلقہ بندیوں کے خلاف بھی چار ہزار کے قریب اپیلیں دائر کی گئی ہیں، الیکشن کمیشن حکام کی بریفنگ کے بعد قائمہ کمیٹی برائے پارلیمانی امور نے سندھ اور پنجاب میں بلدیاتی انتخابات کا انعقاد شیڈول کے مطابق ناممکن قرار دے دیا اور دونوں صوبوں میں بلدیاتی انتخابات مارچ میں کرانے کی سفارش کردی ۔
حیدرآباد میں دو اداروں کی لڑائی نے شہریوں کو پانی کی بوند بوند کیلئے ترسا دیا، حیسکو کی جانب سے واسا کے پینتیس فلٹر پلانٹس کی بجلی منقطع کئے جانے کے باعث شہر میں پانی کا بحران شدت اختیار کرگیا ، حیدرآباد کے باسی پانی کو ترس گئے،دو اداروں کی لرائی نے حیدرآباد کے مکینوں کو پانی کی بنوند کیلئے ترسا دیا۔
حیسکونے سرکاری اداروں پر چھ ارب کے واجبات کی عدم ادائیگی کی بنا پر واسا کےپینتیس فلٹر پلانٹس کے کنکشنز منقطع کردیئے جس کے بعد شہر میں پانی کی سپلائی معطل ہوگئی، لیاقت کالونی اور حیدر آباد کے دیگر علاقوں میں پانی ناپید ہوگیا لوگ پانی کی بوند بوند کو ترس گئے۔
حیسکو ترجمان کا کہناہے کہ سرکاری اداروں پر چھ ارب روپے کے واجبات ہیں، عدم ادائیگی کی بنا پر واسا کے فلتر پلانٹس کی بجلی منقطع کی گئی، پانی کی عدم فراہمی پر شہریوں کی جانب سے احتجاج کا سلسلہ شروع ہوگیا ہے، کئی مقامات پر شہریوں نے احتجاج کیا۔
