سوئی سدرن گیس کمپنی نے موسم سرما کیلئے گیس لوڈ مینجمنٹ پلان تیار کر لیا ہے، کے ای ایس سی کو گیس سپلائی کم کرنے کے علاوہ صنعتوں کو دو روز اور سی این جی سیکٹر کو چار روز گیس کی بندش برداشت کرنا پڑے گی۔

کمپنی زرائع کے مطابق گھریلو صارفین کو گیس کی بلا تعطل فراہمی کیلئے صنعتوں کو ہفتے میں دو دن اور سی این جی سیکٹر کو چار دن گیس سپلائی بند رکھنے کا فیصلہ کیا گیا ہے۔

سوئی سدرن نے کے ای ایس سی کو گیس کی سپلائی بھی کم کردی ہے، کراچی الیکٹرک سپلائی کمپنی کے مطابق گیس کی فراہمی ایک سو پچاس ایم ایم سی ایف ڈی سے کم ہوکر اسی ایم ایم ایف سی ڈی پر آگئی ہے۔

سوئی سدرن گیس کمپنی کے مطابق گیس لوڈ مینجمنٹ پلان کے تحت فوجی فرٹیلائزر بن قاسم کو بھی اگلے ہفتے گیس کی فراہمی بند کرنے کا امکان ہے، حکام کے مطابق موسم سرما کی گیس کی طلب و رسد کے فرق کو دیکھتے ہوئے سوئی سدرن نے نیا لوڈ مینجمنٹ پروگرام ترتیب دیا ہے۔
    
   

   مشیرخارجہ سرتاج عزیز نے کہا ہے قومی سلامتی پالیسی تشکیل دینےپرکام کررہے ہیں،اگلے سال افغانستان سےافواج کے انخلاء کے بعد غیر یقینی صورتحال پاکستان کیلئے بڑاچیلنج ہوگی، سیاسی اور عسکری قیادت کو ہم خیال بنانے کی کوشش کر رہے ہیں۔

قومی سلامتی سے متعلق سیمینار سے خطاب میں مشیرخارجہ کا کہنا تھا کہ خطے کے تمام ممالک امن کے خواہاں ہیں، جنوبی ایشیا ممالک وسطی ایشیا سے توانائی حاصل کرسکتے ہیں، حکومت جامع قومی سلامتی پالیسی تشکیل دینے پرکام کررہی ہے، دو ہزار چودہ کے بعد امریکا کے ساتھ اپنے تعلقات معاشی بنیادوں پر بڑھانا ہوگا۔

انھوں نے کہا کہ اسلامی ممالک کیساتھ تعلقات بڑھانے کی ضروت ہے، پاکستان کو دہشتگردی، انتہا پسندی اور اندرونی چیلنجز کا سامنا ہے، پاکستان نے قومی سلامتی پر کیبنٹ بنائی ہے،انھوں نے کہا کہ اندرونی چیلنجز پر قابو پالیں تو بیرون چیلنجزسے آسانی سے نمٹ سکتے ہیں، ایران گیس پائپ لائن منصوبے میں فنڈز کے حصول کیلئے مشکلات کا سامنا ہے۔