روس میں بم دھماکوں کے واقعات کے بعد امریکہ نے روس میں ہونے والے اولمپکس گیمز کی سیکورٹی میں معاونت کی پیشکش کر دی۔

روس میں حالیہ بم دھماکوں کے بعد اگلے سال ہونے والے اولمپکس گیمز میں ممکنہ بم دھماکوں کا خدشہ ظاہر کیا جارہا ہے، جس سے اولمپکس گیمز متاثر ہونے کا امکان ہے۔

امریکہ نے روس میں سیکیورٹی صورتحال اور مہمان کھلاڑیوں کی حفاظت کے پیش نظر اولپکس گیمز میں کسی بڑے واقعے سے بچنے کے لیے معاونت کی پیشکش کی ہے۔

واضح رہے کہ رواں سال امریکہ کے جاسوسی پروگرام، سنوڈن کو پناہ دینے اور شام کے تنازعے پر اختلاف کے باعث دونوں ممالک کے تعلقات کشیدہ ہیں۔
   

عراق کے مغربی صوبہ الانبار میں سکیورٹی فورسز نے حکومت مخالف احتجاجی کیمپ کو بزور قوت خالی کرالیا ہے، کاروائی کے دوران تیرہ افراد جاں بحق اور گیارہ زخمی ہوگئے۔

پولیس ذرائع کے مطابق رمادی میں قائم احتجاجی کیمپ کو ختم کرنے کے لئے اسپیشل پولیس پر نامعلوم مسلح شخص پولیس پر فائرنگ کردی، جس کے باعث تصادم شروع ہوگیا۔

مسلح افراد کے حملے کے نتیجے میں چار پولیس گاڑیاں تباہ اور کم از کم تین پولیس اہلکار ہلاک ہوگئے، اسپتال ذرائع کے مطابق ہلاک پولیس اہلکاروں کے علاوہ مزید دس افراد کی لاشیں لائی گئیں۔

سکیورٹی فورسز نے حکومت مخالف احتجاجی کیمپ کو بزور خالی کرالیا ہے، وزیراعظم نوری المالکی کے ترجمان علی الموساوی نے اپنے جاری بیان میں کہا ہے کہ رمادی میں مظاہرین کو اب بھی احتجاج کا حق حاصل ہے لیکن انھیں خیمے لگانے اور سڑکیں بند کرنے کی اجازت نہیں ہوگی۔
   

بنگلہ دیش میں اپوزيشن اور حکمراں جماعت کے حامیوں کے درمیان تصادم کے نتیجے میں متعدد افراد معمولی زخمی ہوگئے۔

بنگلہ دیش میں حکومت مخالف مظاہرے جاری ہیں،  تازہ واقعے میں حکمران جماعت اور حزب اختلاف کے حامیوں کے درمیان تصادم اس وقت ہوا، جب حکمران جماعت کی ریلی کا اپوزیشن کی ریلی سے آمنا سامنا ہوگیا۔

دونوں جانب سے ایک دوسرے پر ڈنڈوں اور پتھروں کا آزادانہ استعمال ہوا، بنگلہ دیش میں پانچ جنوری کو ہونیوالے انتخابات کا اپوزیشن اور اتحادیوں نے انتخابات کے بائیکاٹ کا اعلان کیا ہے، اپوزیشن کی جانب سے وزیراعظم حسینہ واجد کے مستعفی ہونے کا مطالبے کو حکومت نے مسترد کردیا۔
   

لاطینی امریکا کے ملک وینزویلا میں افراط زر کی شرح پچاس فیصد سے بھی بڑھ گئی۔

وینزویلا میں افراط زر اور مہنگائی بام عروج پر پہنچ گئی اور پچھلے تمام ریکارڈ توڑتے ہوئے سال دو ہزار تیرہ میں چھپن اعشاریہ چھ فیصد تک پہنچ گئی۔

وینزویلا کے صدر میڈورو کا بڑھتی ہوئی افراط زر کے بارے میں کہنا تھا کہ امریکی سازشوں کے باعث آج ملک کی معاشی حالت ابتر ہے، تاہم وہ اور انکی حکومت ماضی کی طرح اب بھی ماسکو کے ساتھ ہی اتحادی کی حیثیت سے رہے گی اور معاشی بدحالی کے اس موقع پر روس کی جانب سے تعاون کے خواہاں ہیں۔
   

سانتا کلاز کرسمس کے موقع پر بچوں میں تحائف تقسیم کرنے کے لئے مشہور ہے لیکن سربیا کے شہر بلغراد میں سانتا کلاز نے ایک نیا کام کیا۔

سربیا کے دارالحکومت میں سانتا کلاز کا روپ دھارے افراد کے درمیان دوڑ کا مقابلہ بلغراد کی گلیوں اور سڑکوں پر ہوا، جسے دیکھ کر بچے اور بڑے سب ہی بہت محظوظ ہوئے، اس ریس کا مقصد لاوارث بچوں کے لئے فنڈز اکٹھا کرنا تھا۔

سن دو ہزار گیارہ کی ریس کے فاتح اور دوہزار بارہ میں رنر اپ رہنے والے ساسا اسٹولک نے اس موقع پر کہا کہ ہر سال کرسمس کے موقع پر سانتا کلاز کا روپ دھار کر ریس میں حصہ لینا اور جیتنا ان کے لئے ایک اعزاز کی بات ہے۔
   

اب ڈرون طیارے ڈرانے نہیں بلکہ لوگوں کو سہولیات پہچانے کے لئے مختلف کام سر انجام دیتے نظرآئیں گے، امریکی ادارے نے ڈرون طیاروں کی مدد سے تحقیقاتی مقاصد سر انجام دینے کا تجرباتی منصوبہ بنایا ہے۔

امریکی ہوابازی کے ادارے نے دو ہزار پندرہ سے ڈرونز کو سول مقاصد کے لئے استعمال کرنے کا اعلان کیا ہے، ادارے کی جاری کردی رپورٹ کے مطابق سات ہزار سے زائد ایسے طیارے بنائے جائیں گے، جو صرف تحقیقی اور نجی مقاصد کے لئے استعمال ہونگے۔

رپورٹ کے مطابق امریکی ریاستوں نیویارک، ڈکوٹا، نیواڈا الاسکا، ٹیکساس اور ورجینیا میں بنائے گئے چھ ٹیسٹ مقامات پر اگلے تین مہینے میں تجرباتی پروازوں کا آغاز کردیا جائے گا۔

واضح رہے کہ اس سے قبل برطانیہ میں ڈرون کے ذریعے پیزا ڈلیوری کا بھی باقاعدہ آغاز کیا جاچکا ہے، اب دیکھنا یہ ہے کہ یہ ٹیکنالوجی مزید کیا گل کھلاتی ہے۔