رواں مالی سال کے پہلے پانچ ماہ میں بینکوں نے ایک سو اٹھارہ ارب روپے کے زرعی قرضے جاری کئے۔ زرعی قرضوں کے اجرا میں گیارہ فیصد کا اضافہ ریکارڈ کیا گیا۔
رواں مالی سال جون دو ہزار چودہ تک زرعی قرضوں کی تقسیم کا عبوری ہدف 360 ارب روپے رکھا گیا ہے۔ بینکوں نے جولائی سے نومبر کے دوران 118 ارب روپے کے قرضے کاشت کاروں کو جاری کیے ہیں جو کہ ہدف کا 33 فیصد بنتے ہیں۔ پانچ بڑے بینکوں نے مجموعی طور پر 70 ارب ساٹھ کروڑ روپے کے زرعی قرضے رواں مالی سال کے پہلے پانچ ماہ میں جاری کئے ہیں
بین الاقومی تجارتی میلے ہوم ٹیکسٹائل فرینکفرٹ جرمنی میں آئندہ سال پاکستان سمیت 60ممالک کے دو ہزار سے زائدنمائش کنندگان حصہ لے رہے ہیں۔
میسی فرینکفرٹ ہوم ٹیکسٹائل کے پاکستان میں نمائندے ھادی صلاح الدین کا کہنا ہے کہ پاکستان کادو سو ساٹھ سے زائد امپورٹرز اور ایکسپورٹرز کاتجارتی وفد بین الاقوامی تجارتی میلے شرکت کررہا ہے ۔ 2013ء میں 134ملکوں کے ساٹھ ہزار سے زائد تجارتی مندوبین نے شرکت کی تھی ۔
ھادی صلاح الدین کے مطابق پاکستان کوجی ایس پی پلس کا درجہ ملنے کے بعدہوم ٹیکسٹائل فرینکفرٹ جرمنی کے تجارتی میلے ٹیکسٹائل کی مصنوعات متعارف کرانے کا بہترین ذریعہ ثابت ہو گی۔یورپی ممالک کی مارکیٹوں تک ڈیوٹی فری رسائی کے ساتھ ہوم ٹیکسٹائل میں پاکستان کی شرکت برآمد ات میں اضافہ کرنے میں مدد ملے گی۔
جی ایس پی پلس کا درجہ ملنے کے بعد پاکستان یورپی منڈیوں تک رسائی حاصل کرے گا بلکہ تجارتی سرگرمیوں میں بھی اضافہ ہو گا ۔ہوم ٹیکسٹائل ڈیوٹی فری سے یورپی یونین کی مارکیٹوں تک مفت رسائی دینے کے ساتھ روزگار کے مواقع پیدا ہونے سے سالانہ ایک ارب ڈالر کی ٹیکسٹائل برآمدات کااضافہ حاصل ہوگا۔
سابق صدر پرویز مشرف نےغداری کا مقدمہ فوجی عدالت منتقل کرنے کیلئے درخواست دائرکردی، اسلام آباد ہائیکورٹ نے خصوصی عدالت کے خلاف دائردرخواستیں مسترد کردیں، سندھ ہائی کورٹ کا کہنا ہے کہ پرویزمشرف ای سی ایل سےنام نکلوانے کیلئےحکومت سے رابطےکریں۔
سابق صدرپرویزمشرف کے وکلا نے غداری کا مقدمہ فوجی عدالت منتقل کرنے کیلئے خصوصی عدالت میں نئی درخواست دائر کردی، درخواست میں وفاق، سیکرٹری قانون، وزیراعظم ، آرمی چیف کو فریق بنایا گیا ہے، درخواست میں مؤقف اختیارکیا گیا ہے کہ مقدمہ خصوصی عدالت کے دائرہ اختیارمیں نہیں آتا۔
اسلام آباد ہائی کورٹ نے غداری کیس کی سماعت کیلئے تشکیل دی گئی خصوصی عدالت کے خلاف پرویزمشرف کی جانب سے دائر تینوں درخواستیں مسترد کردی گئی ہیں، پرویز مشرف نے خصوصی عدالت کی تشکیل کے طریقہ کار اور اسپیشل پراسیکیوٹر کی تعیناتی کے خلاف درخواستیں دائر کی تھیں۔
درخواستوں میں مؤقف اختیارکیا گیا تھا کہ عدالت کے تینوں جج پرویز مشرف کے تین نومبر کے اقدام سے متاثر ہوئے تھے، مقدمے کی منصفانہ کاروائی ہوتی نظر نہیں آتی، وکیلِ استغاثہ اکرم شیخ بھی جانبدار شخصیت ہیں، ان سے انصاف کے تقاضے پورے کرنے کی امید نہیں۔
پرویز مشرف کے وکیل خالد رانجھا نے موقف اختیارکیا کہ اْن کے موکل نے ایمرجنسی متعلقہ افراد کے ساتھ مشاورت سے لگائی، وہ اقدام بطور آرمی چیف تھا، ان کے خلاف کاروائی بھی آرمی ایکٹ کے سیکشن بانوے کے تحت ہی کی جا سکتی ہے۔
ادھرسندھ ہائی کورٹ نے سابق صدر پرویزمشرف کانام ای سی ایل سےنکالنے کی درخواست نمٹاتے ہوئے پرویزمشرف کا اس سلسلے میں حکومت سے رابطہ کرنے کی ہدایت کردی۔
عراقی ٹیلی ویژن اسٹیشنز کی عمارت پر خودکش حملوں اور دھماکوں میں پانچ صحافیوں سمیت سترہ افراد جاں بحق اور متعدد ذخمی ہوگئے۔
عراقی پولیس ذرائع کے مطابق خود کش حملہ بغداد کے شمال میں واقع عراقی ٹی وی کے ہیڈ کوارٹر پر کیا گیا، جس میں پانچ صحافی جاں بحق اور پانچ زخمی ہوگئے۔
عراقی حکام کے مطابق چوبیس گھنٹوں کے دوران عراق میں پرتشدد واقعات میں سترہ سے زائد افراد ہلاک ہوئے، جاں بحق افراد میں ذیادہ تعداد بغداد کے شہر تکریت اور بعقوبہ میں ہوئیں، جہاں نو افراد جاں بحق دس زخمی ہوگئے۔
عراق کے دیگرشہروں سے بھی مزید جاں بحق افراد کی اطلاعات موصول ہوئیں ہیں، فوری طور پر کسی گروپ نے ان حملوں کی ذمہ داری قبول نہیں کی،عراق میں اس سال اب تک پرتشدد واقعات میں چھ ہزار چھ سو سے زائد افراد جاں بحق ہوچکے ہیں۔
جولائی سے نومبر تک پاکستانی اشیائے خورد ونوش کی برآمدات میں دو اعشاریہ چھ تین فیصد اضافہ ہوا ہے۔ پاکستان بیوروشماریات کے مطابق برآمداد ایک ارب اکسٹھ کروڑ پچاس لاکھ گیارہ ہزار ڈالر تک پہنچ گئی ہیں۔ گزشتہ پانچ ماہ میں فوڈ گروپ میں چاول کی برآمد میں اٹھارہ فیصد اضافہ ہوا۔
مچھلی میں سولہ ، پھلوں میں چالیس، سبزیوں میں تینتیس، دالوں میں ایک سوستاسی اور تمباکو میں انتیس فیصد اضافہ ہوا جبکہ گندم، چینی، اورمصالحہ جات کی برآمد میں کمی ہوئی ۔
متحدہ عرب امارات میں امریکی شہری پر سائبر کرائم ثابت ہونے پر جیل بھیج دیا گیا۔
جیل بھیجے جانے والوں میں امریکی شہری سمیت کینیڈین اور برطانوی خاتون اور دو بھارتی باشندے بھی شامل ہیں، انتیس سالہ امریکی شہری شیزان قاسم پر اماراتی نوجوانوں کی مضحکہ خیز ویڈیو بنانے اوریو ٹیوب پر اپ لوڈ کرنے کا الزام ہے۔
انیس منٹ کی ستوا کامیڈی اسکول نامی ویڈیو میں دبئی کےضلع ستوا میں واقع اسکول کے طلبہ کو مذاق کا نشانہ بنایا گیا تھا، اماراتی عدالت نے ایک سال قید سمیت ان ملزمان پر پانچ سے دس ہزار درہم جرمانہ بھی عائد کیا ہے۔
سابق صدر ارجنٹائن ڈی لا رُوا رشوت خوری کے الزامات ثابت نہ ہونے پر بری کردیئے گئے۔
سابق صدر پر دوہزار گیارہ میں رشوت خوری کے الزامات عائد کئے گئے تھے، جس کے بعد انہیں عہدے سے برخاست کر دیا گیا تھا، تاہم دو سال سے جاری مقدمے کے دوران گواہوں کے بیانات میں تضاد اور مضبوط پراسکیوشن کے باعث عدالت نے انہیں الزامات سے بری کر دیا۔
سابق صدر نے احاطہ عدالت میں میڈیا سے گفتگو کرتے ہوئے کہا کہ ان پر مقدمات سیاسی مخاصمت کی وجہ سے قائم کئےگئے، جن کا کوئی وجود نہیں تھا۔
لاہور میں پاک ترک بزنس فورم سے خطاب میں وزیراعظم پاکستان اور ترک وزیراعظم نے دو طرفہ تجارت میں توسیع کے مواقع پر کھل کر بات کی۔
لاہور میں پاک ترک بزنس فورم سے خطاب میں وزیراعظم نواز شریف نے ترک وزیراعظم رجب طیب اردگان کا خیر مقدم کرتے ہوئے کہا کہ پاک ترک اقتصادی تعلقات بڑھانے کے وسیع مواقع موجود ہیں۔
نواز شریف نے اس یقین کا اظہار کیا کہ ترکی کے تاجر پاکستان میں مزید سرمایہ کاری کریں گے، ترک تاجروں کے دورہ سے دونوں ملکوں کے درمیان تجارت کا نیا باب کھلے گا، اور مستقبل میں پاک ترک تعلقات کومزید فروغ حاصل ہوگا۔
ترک وزیراعظم نے کہا کہ ترکی اور پاکستان کے ساتھ تجارت کے حجم کو مزید بڑھانا چاہتا ہے اور وہ وزیراعظم نواز شریف کے ساتھ کندھے سے کندھا ملا کر چلنا چاہتے ہیں۔
روپے کے مقابلے میں ڈالر کی اڑان مزید کمزور ہوگئی۔ اوپن مارکیٹ میں ڈالر ایک سو چھ روپے کی سطح پرفروخت ہورہا ہے,ڈالر کے مقابلے میں روپے نے اپنی گرتی ہوئی ساکھ کو کسی حد تک بحال کیا ہے۔
اوپن مارکیٹ میں ڈالر ایک سو چھ روپے کی سطح پر فروخت ہو رہا ہے اور گزشتہ دو دونوں میں ڈالر کی قدر میں کوئی رد وبدل نہیں آیا ہے ۔ وزیرخزانہ اسحاق ڈار کے ڈالر کو کیش کرانے کے بیان کے بعد لوگوں نے تیزی سے ڈالر کیش کرانا شروع کردیے ہیں جس کے باعث اب ڈالر کی قدر میں کمی ہوئی ہے۔
روپے کے مقابلے ڈالرچارماہ کی نچلی سطح پر پہنچ گیا ہے۔ دوسری جانب بینکوں کے درمیاں لین دین میں بھی روپے کی قدر میں استحکام ریکارڈ کیا جا رہا ہے۔ انٹر بینک مارکیٹ میں ڈالر ایک سو چھ روپے تیس پیسے میں فروخت ہو رہا ہے۔
بلوچستان میں خالی سیٹس پر بلدیاتی الیکشن کے لئے شیڈول کا اعلان کر دیا گیا ہے۔
الیکشن کمیشن کے مطابق بلوچستان کی خالی بلدیاتی سیٹوں پر انتخابات کے لئے کاغذات نامزدگی ستائیس اور اٹھائیس دسمبر تک جمع کروائے جاسکیں گے، تیس اور اکتیس دسمبر کو کاغذات نامزدگی کی جانچ پڑتال کی جائے گی۔
یکم اور دو جنوری کو امیدوار اعتراضات جمع کرواسکیں گے، تین اور چار جنوری کو اعتراضات نمٹائے جاسکیں گے، امیدوار پانچ جنوری کو کاغذات واپس لے سکیں گے۔
امیدواروں کی حتمی فہرست چھ جنوری کو جاری کی جا ئے گی، انتخابات کے لئے پولنگ انیس جنوری کو ہوگی اور انتخابی نتائج رئیٹنگ آفسران اکیس جنوری کو جاری کریں گے۔
