ملک کے مختلف شہروں میں شدید دھند کا راج ہے، حد نگاہ انتہائی کم ہونے کے باعث ٹریفک حادثات میں چار افراد جان سے ہاتھ دھو بیٹھے۔

لاہور سمیت پنجاب کے مختلف شہروں میں شدید دھند کے ڈیرے ہیں، شدید دھند کے باعث موٹروے پر حد نگاہ صفر ہوگئی ہے، جس کے بعد موٹروے کو پشاور سے صوابی تک ہر قسم کی ٹریفک کے لئے بند کردیا گیا ہے، شدید دھند کے باعث ٹریفک حادثات میں بھی اضافہ ہوگیا ہے۔

خانیوال میں موٹر سائیکل اور ٹرک میں تصادم میں دس طلبہ شدید زخمی ہوگئے، حویلی لکھا میں بس نے موٹر سائیکل کو ٹکر مار دی، جس کے نتیجے میں تین طالبعلم شدید زخمی ہوئے، نارنگ روڈ اور فیروز پور روڈ پر ٹریفک حادثات میں پندرہ افراد زخمی ہوگئے، جنہیں طبی امداد کے لئے اسپتال منتقل کردیا گیا۔

وٹر وے حکام نے عوام کو سفر کیلئے جی ٹی روڈ استعمال کرنے کی ہدایت کی ہے، ٹریفک حکام کا کہنا ہے کہ ڈرائیورز دھند میں فوگ لائٹس آن رکھیں اور احتیاط سے ڈرائیونگ کریں ۔

نارووال میں دھند کے باعث ٹریفک حادثہ چار افراد جاں بحق اور چار زخمی ہوگئے۔

پولیس کے مطابق حادثہ نارووال شکر گڑھ روڈ پر شدید دھند کے باعث پیش آیا،  پتھریلے راستوں کی وجہ سے گاڑی کا ٹائر پھٹ گیا، جس سے گاڑی بے قابو ہوکر مسجد سے ٹکرا گئی تھی، حادثے میں ڈرائیور سمیت گاڑی میں سوار چار افراد موقع پر ہی جاں بحق ہوگئے جبکہ چار افراد شدید زخمی ہوئے۔

پولیس اہلکاروں نے تمام لاشوں اور زخمیوں کو تحصیل ہیڈ کوارٹر اسپتال منتقل کردیا ہے، دوسری جانب شدید دھند کے باعث موٹر وے ایم  ون پشاور سے صوابی تک بند ہے، موٹر وے ایم 2 شیخوپورہ سے لاہور تک ہلکی دھند ہے جبکہ حد نگاہ  50سے 60میٹر ہے۔

ڈی آئی جی موٹر وے کے مطابق موٹر وے ایم  3پنڈی بھٹیاں سے فیصل آباد تک ہلکی دھند ہے۔
   

لاہور میں مالک کے تشدد کا شکار ہونے والی بچی تین روز تک زندگی اور موت کی کشمکش میں مبتلا رہنے کے بعد دم توڑ گئی، اس سے پہلے گھر کے مالک پروفیسر سلمان نے بچی پر تشدد کا اعتراف کرتے ہوئے کہا تھا کہ وہ پانچ سال سے بچی پر تشدد کر رہا ہے۔

لاہور میں گھر کے مالک کی جانب سے تشدد کا نشانہ بننے والی گھریلو ملازمہ دم توڑ گئی ہے، فضہ نامی لڑکی کو دو روز پہلے تشویشناک حالت میں سروسز اسپتال لایا گیا تھا، جہاں اس کی تشویشناک حالت کے پیش نظر اسے وینٹی لیٹر پر رکھا گیا تھا۔

حکومت کی ہدایت پر فضہ کے علاج کے لئے سنیئر ڈاکٹرز پر مشتمل میڈیکل بورڈ بھی تشکیل دیا گیا تھا، جس میں سرجری، میڈیکل اور نیوروسرجری کے ماہرین شامل تھے، تشدد کے الزام میں گرفتار پروفیسر سلمان ملک نے جرم کا اعتراف کرلیا ہے۔

سلمان ملک نے پولیس کو بتایا ہے کہ وہ فضہ کو پانچ سال سے تشدد کا نشانہ بنا رہا ہے، پروفیسرسلمان ملک کو جوڈیشل مجسٹریٹ نے تین روزہ ریمانڈ پر پولیس کے حوالے کیا تھا، فضہ کے گھر والے سیالکوٹ سے لاہور پہنچ گئے تھے جبکہ ضروری کارروائی کے بعد میت ان کے حوالے کر دی جائے گی۔