وسط افریقی ریپبلکن میں متحارب گروہوں میں مذاکرات کامیاب ہوگئے، عبوری صدر مستعفی ہوگئے، مخالف کیمپ میں کا جشن کا سماں ہے۔

غیر ملکی خبر رساں ادارے کے مطابق بینگوئی میں ایک ماہ سے جاری کشیدگی کے ختم ہونے کی امید پیدا ہوگئی ہے، متحارب گروہوں کے مابین افریقی ملک چاڈ میں ہونے والے مذاکرات کامیابی سے ہمکنار ہو گئے۔

مذاکرات کے بعد ملک کے عبوری صدر نے استعفیٰ دے دیا ہے، جس کے بعد حالات بہتر ہونے کی توقع کی جاری ہے، صدر کے استعفٰی کے بعد بڑی تعداد میں عوام سڑکوں پر نکل آئے اور خوشی کا اظہار کیا۔

یاد رہے کہ بینگوئی میں باغی رہنما فرانکوئیس کی عیسائی ملیشیا نے مسلمانوں کے خلاف اعلان جنگ کر رکھا ہے، جس کے نتیجے میں اب تک ہزار سے زائد مسلمان لقمہ اجل بن چکے ہیں ۔

اقوام متحدہ نے جنوبی سوڈان کے ہزاروں پناہ گزین کے لیے انسانی بنیادوں پراقوام عالم سے ننانوے ملین ڈالر امداد کی درخواست کی ہے۔

اقوام متحدہ کے ادارہ برائے پناگزین نے افریقی ملک جنوبی سوڈان کے ہزاروں بے گھر افراد کی رہائش و طعام اور علاج معالجے کے لیے انسانی ہمدردی کی بنیاد پر اقوام عالم سے درخواست کی ہے، فوری طور ننانوے ملین ڈالرکی امداد فراہم کی جائے تاکہ بے گھر افراد کی کفالت بہتر طریقے سے کی جاسکے۔

جنوبی سوڈان کے دارلحکومت جوبا میں قائم عارضی کیمپوں میں ہزاروں بے گھر افراد انتہائی کسمپرسی کی زندگی گزار رہے ہیں، رپورٹ کے مطابق پناگزینوں غذائی اجناس کی قلت اور علاج معالجے کے لیے دشواریوں کا سامنا کرنا پڑ رہا ہے۔
   

کینیا نے صومالیہ پر فضائی حملہ میں الشباب کے تیس دہشت گرد ہلاک اور درجنوں کو زخمی کرنے کا دعوی کیا ہے۔

کینیا کی حکومت کی جانب سے جاری کردہ رپورٹ میں انکشاف کیا گیا ہے کہ اس نے صومالیہ کی عسکریت پسند تنظیم الشباب کے اڈوں پر فضائی حملہ کیا ہے، جس میں تیس افراد ہلاک ہوئے ہیں۔

کینیا ڈیفینس فورس کے ترجمان کے مطابق لڑاکا جیٹ طیاروں نے الشباب کے کیمپوں پر اس وقت حملہ کیا جب وہاں ایک میٹنگ جاری تھی جبکہ عسکریت پسندوں نے اس دعوے کی فوری تردید کی ہے۔

کینیا اکتوبر دوہزار گیارہ سے صومالی تنظیم کے خلاف زمینی اور فضائی حملے کر رہا ہے ۔
    
   

اقوام متحدہ کے سیکرٹری جنرل بان کی مون کا کہنا ہے کہ سال دو ہزار چودہ میں سخت چیلنجزکا سامنا ہے۔

نئے سال کی پہلی نیوز کانفرنس کرتے ہوئے اقوام متحدہ کے سیکرٹری جنرل بان کی بان نے شام ، جنوبی سوڈان اور جمہوریہ وسطی افریقہ میں جاری تنازعات، پر توجہ مرکوز کروائی۔

بان کی مون نے بین الاقوامی برادری پر زور دیا کہ وہ سیاسی کشیدگی کو ختم کرنے کے لئے ان تمام ممالک کی مدد کریں اور ان ممالک میں امن کی راہ تلاش کرنے میں اپنا اہم کردار ادا کریں۔

بان کی مون نے جنوبی سوڈان کے باغیوں اورخاص کر حکومت پر زور دیا ہے کہ فوری طور پر جنگ بندی کرنے کے اقدامات کریں۔
   

امریکہ نے کہا ہے کہ وہ شام کے اعتدال پسند باغی جماعتوں کی غیرمہلک امداد کی ترسیل دوبارہ شروع کرنے پر غور کررہا ہے۔

وائٹ ہاؤس کے ترجمان جے کارنی نے میڈیا کو بریفنگ دیتے ہوئے کہا ہے کہ شام کے اعتدال پسند باغی جماعتوں کو غیرمہلک امداد کی ترسیل دوبارہ بحال کرنے کہ حوالے سے تاحال کوئی حتمی فیصلہ نہیں کیا گیا۔

تاہم شام کے شمالی علاقے میں متاثرہ افراد کے لیے غیرمہلک امداد فراہم کی جارہی ہے، شام میں حزب اختلاف کہ اعتدال پسند فوجیوں کی پشت پناہی کے سوال پر جے کارنی کا کہنا تھا کہ امریکہ اعتدال پسند باغی فوجیوں کی حمایت نہیں کرتا تاہم وہ شامی صدر کے آمرانہ اقدامات کی بھرپورمذمت کرتا ہے ۔
   

شام میں حکومت اور اعتدال پسند باغیوں میں جھڑپوں سے ایک ہفتے کے دوران پانچ سو افراد ہلاک ہوگئے۔

میڈیا رپورٹس کے مطابق شام میں اعتدال پسند باغیوں کے زیر کنٹرول شمالی علاقوں میں گزشتے ایک ہفتے کے دوران حکومت سے تصادم کے نتیجے میں پانچ سو سے زائد افراد ہلاک ہوچکے ہیں۔

انسانی حقوق کی تنظیم کی رپورٹ کے مطابق ان جھڑپوں میں دوسو چالیس باغی ،ایک سو ستاون حکومتی اہلکار جبکہ پچاسی عام شہری بھی شامل ہیں، رپورٹ کے مطابق شام میں ابتک خانہ جنگی سے ایک لاکھ سے زائد افراد اپنی زندگی سے محروم ہوچکے ہیں ۔
    
   

امریکی سینیٹرز کی اکثریت نے ایران کے خلاف نئی پابندیوں عائد کرنے کی حمایت کردی ہے، جس سے ایران اور امریکہ کے درمیان جوہری پروگرام پر جاری مذکرات کا عمل متاثر ہونے کا خدشہ بڑھ گیا ہے۔

امریکی سینیٹ میں ایران پر مزید نئی پابندیاں عائد کرنے کے حوالے سے بل ریپبلکنز کی جانب سے پیش کیا گیا، نیوکلئیر ویپن فری ایکٹ نامی اس بل کو سو کے ایوان میں سے چوون سینیٹرز کی حمایت حاصل ہے۔

دوسری جانب وہائٹ ہاؤس نے اس بل کو ویٹو کرنے کی دھمکی دی ہے، امریکی سینیٹرز کی جانب سے پیش کئے جانے والے بل پر فوری طور پر ایران نے ردعمل کا اظہار کرتے ہوئے کہا ہے کہ ایران کے خلاف نئی پابندیوں کے حوالے سے گزشتہ ماہ ہونے والے مذاکرات معطل سمجھیں جائیںگے۔