پاکستان اور سری لنکا کی ٹیمیں سیریز کے دوسرے ٹیسٹ میچ میں کل آمنے سامنے آئیں گی، لیکن اس بار دونوں ٹیمیں دبئی کی اسپن وکٹ پر برتری حاصل کرنے کی کوشش کریں گی، قومی ٹیم میں ایک تبدیلی کا امکان ہے۔ ابو ظہبی میں کھیلا گیا پہلا ٹیسٹ تو ڈراہوگیا۔

کیا دوسرا ٹیسٹ نتیجہ خیزہوگا ؟؟اب میدان دبئی میں سجے گا ۔کیا پاکستانی شاہین کم بیک کریں گے  اور لنکن ٹائیگرز کو شکست دیں گے ؟؟ طویل دورانیے کی کرکٹ میں  اعصاب کی جنگ ہوگی ۔ ایشیا کی دو بہترین ٹیمیں میدان میں اتریں گی۔

دوسرے میچ کے لئے قومی ٹیم میں ایک تبدیلی کا امکان ہے ، پہلے میچ میں خاطر خواہ کارکردگی نہ دکھانے والی راحت علی کی جگہ محمد طلحہ یا عبد الرحمان کو مو قع دیئے جانے کا امکان ہے، ادھر سری لنکن اسکواڈ میں بھی ایک تبدیلی کی جاسکتی ہے۔ دونوں ٹیموں کے لئے فکر کی بات سعید اجمل اور جے وردھنے جیسے سنیئر کھلاڑیوں کا پرفارم نہ کرنا ہے۔

دوسرا اسپیشلسٹ سعید اجمل پہلے میچ کی پرفارمنس کو بھلا کر دوسرے میچ میں زیادہ سے زیادہ وکٹیں لینے کی کوشش کریں گے، جادوگر اسپنر پہلے میچ میں صرف دو وکٹیں ہی لے سکے تھے۔ محمد حفیظ نے بھی شاندار کم بیک کرتے ہوئے اسی رنز کی ناقابل شکست اننگز کھیل کر سری لنکن بولرز کے لئے خطرے کی گھنٹی بجائی ۔

بیٹنگ میں ٹیم یونس اور مصباح پر انحصارکرے گی ۔ماہرین کے مطابق دبئی کی وکٹ اسپنز کے لئے مدد گار ہوتی ہے اور بہتر اسپن اٹیک ہونے کی باعث میچ میں پاکستان کی جیت کے امکانات بھی روشن ہیں۔

بنگلہ دیش میں آئندہ ماہ ایشیا کپ اورمارچ میں ورلڈ ٹی ٹوئنٹی شیڈول ہے۔ لیکن وہاں کے خراب حالات اور پاکستان مخالف جذبات کو دیکھتے ہوئے قومی ٹیم کا بنگلہ دیش جانا کسی خطرے سے کم نہیں۔ بنگلہ دیش میں گزشتہ دنوں پاکستانی قونصل خانے کا گھیراؤ بھی کیا گیا۔

اب تک ہونے والے پرتشدد واقعات میں سینکڑوں افراد ہلاک ہوچکے ہیں۔ دہشت گر د واقعات اور بم دھماکوں کے سبب ویسٹ انڈیز پہلے ہی اپنی انڈر نائنٹین ٹیم بنگلہ دیش سے واپس بلاچکا ہے۔ اب تو بنگلہ دیش کے ڈومیسٹک ایونٹ بھی سیکیورٹی وجوہات کے سبب منسوخ ہوچکے ہیں۔

ایسی صورتحال میں پاکستان کا بنگلہ دیش جانا درست نہیں ہوگا۔ ایسے میں ایشین کرکٹ کونسل کا ایونٹ کو بنگلہ دیش سے منتقل نہ کرنا سمجھ سے بالاتر ہے۔ آئی سی سی کے سابق سربراہ احسان مانی نے پی سی بی کو ایشیا کپ سے دستبردار ہونے کا مشورہ دیا ہے۔

ان کا کہنا ہے کہ کھلاڑیوں کے زندگیوں کو خطرے میں ڈالنا مناسب نہیں ہوگا۔ دوسری جانب دفتر خارجہ کی ترجمان تسنیم اسلم نے کہا ہے کہ ایشیا کپ اور ورلڈ ٹی ٹوئنٹی میں پاکستان کرکٹ ٹیم کو بنگلہ دیش بھیجنے کے حوالے سے پی سی بی نے کوئی رابطہ نہیں کیا، بنگلہ دیش کے حوالے سے پی سی بی نے مشورہ کیا تو فیصلہ کریں گے۔

ارجنٹائن ڈاکار ریلی کا دوسرا مرحلہ فرانس کے اسٹیون پیٹرہینسل نے جیت لیا۔ فرانسیسی ڈرائیور کو ریس میں مجموعی برتری حاصل ہے۔ سین لوئس سے سین ریفل تک کار ریلی کا دوسرا مرحلہ چار سو تینتیس کلو میٹر پرمشتمل تھا۔ ڈرائیورز کو اونچے نیچے راستوں میں دشواری کا سامنا رہا۔

دفاعی چیمپئین فرانس کے اسٹیون پیٹرہینسل نے گاڑی پر کنٹرول برقرار رکھا اور تمام ڈرائیورزکو پیچھے چھوڑتے ہوئے مقررہ فاصلہ تین گھنٹے باون منٹ اور پانچ سیکنڈز میں سب سے پہلے طے کیا۔ اسپین کے کارلوس سینز دوسرے نمبر پر رہے۔

فرانسیسی ڈرائیور کو ریس میں مجموعی برتری حاصل ہوگئی ہے۔ موٹربائیک ریس میں برطانیہ کے سیم سدر لینڈ نے میدان مارلیا۔ برطانوی رائڈر تین گھنٹے بیالیس منٹ اور دس سیکنڈز کے ساتھ دوسرے مرحلے کے فاتح رائڈر رہے۔

آزمائشی طورپرشروع ہونے والی ایک روزہ کرکٹ کے آغاز کو چوالیس سال بیت گئے۔ون ڈے کرکٹ میں اب تک تین ہزارچار سو ستاون ون ڈے میچزکھیلےجاچکے ہیں۔ کرکٹ کی تاریخ صدیوں پرانی ہے۔ جینٹل مین گیم کی ابتدا برطانیہ سے ہوئی لیکن اس وقت تک اس کھیل سے گورے ہی واقف تھے۔

وقت بدلتا گیا۔ کھیل میں جدت آتی رہی اور پھر کرکٹ دنیا بھر میں کھیلی جانے لگی،اس کھیل کے شیدائی بڑھ گئے اور پھرفٹبال کے بعد یہ دنیا کا سب سے زیادہ پسند کیا جانے والا کھیل بن گیا۔ ٹیسٹ کرکٹ کے بعد پانچ جنوری انیس سواکہتر کو ایک روزہ کرکٹ کا آزمائشی طور پرانعقاد ہوا جس کو شائقین کرکٹ نے دنیا بھر میں عالمی سطح کی اونچائیو ں پر پہنچا دیا۔

ون ڈےکرکٹ کی روزافزاں مقبولیت کا یہ عالم ہوا کہ چوالیس سال کے دوران اس طرز کی کرکٹ کے دس عالمی کپ منعقد ہوچکےہیں، دنیاکی پچیس ٹیموں کے درمیان مجموعی طور پر تین ہزارچارسوباون ون ڈے میچزکھیلے جاچکے ہیں۔بھارتی ٹیم نے سب سے زیادہ آٹھ سوچوالیس ایک روزہ میچزکھیلے پاکستان نے آٹھ سوبارہ ایک روزہ میچز میں چارسوچونتیس کامیابیاں سمیٹیں۔ ایک روزہ کرکٹ میں پاکستان نے کئی کارنامے بھی انجام دیئے۔

عمران خان کی قیادت میں انیس سو بانوے میں عالمی کپ کا اعزاز اپنے نام کیا۔ وسیم اکرم اور وقار یونس جیسے عظیم بولرز پیدا کئے اور ون ڈے میں کئی منفرد ریکارڈز آج بھی پاکستان ہی کے پاس ہیں۔

اسپینش لالیگا لیگ میں ریال میڈرڈ نے سیلٹا ڈی ویگو کو تین صفر سے شکست دے دی۔ اسٹار کھلاڑی کرسٹیانو رونالڈو نے کیرئیر میں گولز کی چار سینچریاں مکمل کرلیں۔ برناباؤ اسٹیڈیم میں کھیلے جانے والے میچ میں پہلے ہاف میں کوئی ٹیم گیند کو جال میں پہنچانے میں کامیاب نہ ہوسکی۔

دوسرے ہاف میں ریال میڈرڈ نے سرسٹویں منٹ میں بینزیما کے گول کی بدولت برتری حاصل کی۔ بیاسویں منٹ میں پرتگال کے اسٹار کھلاڑی کرسٹیانو رونالڈو نے گول کرکے ٹیم کی برتری کو دگنا کردیا۔

میچ کے آخری لمحات میں رونالڈو نے دوسرا گول کرکے ٹیم کو تین صفر سے جیت دلادی۔ حریف ٹیم میچ میں کوئی بھی گول کرنے میں کامیاب نہ ہوسکی۔ کرسٹیانو رونالڈو نے کیرئیر میں گولز کی چار سینچریاں مکمل کرلی ہیں۔

لالیگا لیگ میں ریال میڈرڈ کی ٹیم چوالیس پوائنٹس کے ساتھ تیسرے نمبر پر ہیں۔ بارسلونا کی ٹیم انچاس پوائنٹس کے ساتھ لیڈ کررہی ہے۔