اہلسنت والجماعت کے سربراہ علامہ محمد احمد لدھیانوی نے ملک میں امن کی ناقص صورت حال پر سخت تشویش کا اظہار کرتے ہوئے کہا ہے کہ مذہب اور مسلکی اختلافات میں گولی اور گالی کی قطعا کوئی گنجائش نہیں۔

حکومت اور انتظامیہ حالات کنٹرول کرنے کے بجائے ڈنگ ٹپاوپالیسی اور مذمت تک محدود ہوکر رہ گئی ہے۔

انہوں نے کہا کہ شیعہ اور سنی اختلافات ضرور ہیں اور رہیں گے تاہم اختلافات کے نام پر فسادات ناقابل معافی جرم ہے۔

ان کا کہنا تھا کہ مرنے والوں کو لاکھوں روپے دینے اور میتوں کو پروٹوکول دینے کے بجائے زندہ افراد کے تحفظ کے لیے ہنگامی اقدامات اٹھانا ناگزیر ہوچکے ہیں۔

حکومت نے چئیرمین پیمرا کی بحالی کے ہائیکورٹ کے فیصلے کو سپریم کورٹ میں چیلنج کردیا۔

چیئرمین پیمرا کی بحالی فیصلے کے خلاف اپیل وزارت اطلاعات اور سیکریٹری اسٹیبلشمنٹ نے دائر کی، جس میں کہا گیا ہے کہ چئیرمین پیمرا کا تقررغیر قانونی تھا، ہائیکورٹ نے ہمارا موقف نہیں سنا اور یکطرفہ طور پر بحالی کا حکم سنا دیا۔

ہائیکورٹ نے نئے چئیرمین کے تقرر کا نوٹیفکشن بھی منسوخ نہیں کیا، اس طرح پیمرا کے بیک وقت دوچیئرمین ہیں، جو قانون کے مطا بق نہیں، اپیل میں استدعا کی گئی ہے کہ چئیرمین پیمرا کی بحالی کا عبوری حکم معطل کیا جائے۔

شاہ عبداللطیف بھٹائی کے عرس کی تین روزہ تقریبات شروع ہوگئیں، تقریبات کا آغازاسپیکر سندھ اسمبلی آغا سراج درانی اور شرمیلا فاروقی نے کیا، عرس کے موقع پر صوبے کے تمام نجی، سرکاری تعلیمی اداروں اور عدالتوں میں تعطیل ہے۔

سندھ کے صوفی شاعر حضرت شاہ عبداللطیف بھٹائی کا آج دوسو سترواں عرس ہے، عرس کی تیاریاں کئی روز سے جاری تھیں، وزیراعلیٰ سندھ کی مشیر شرمیلا فاروقی نے بھٹ شاہ میں انتظامات کابھی جائزہ لیا، عرس کی تقریبات کا افتتاح مزار پر چادر چڑھا کر کیا گیا۔

عرس میں شرکت کے لیے ملک بھر سے زائرین کی آمد کا سلسلہ جاری ہے، مزار کے احاطے میں شاہ کے فقیر اْن کا کلام لوگوں کوسنا رہے ہیں، محکمہ اوقاف کی جانب سے زائرین کے لیے لنگر کا انتظام بھی کیا گیا ہے،عرس کے موقع پر زرعی نمائش، ادبی کانفرنس اورسندھ کی روایتی کْشتی ملاکھڑا کے مقابلے بھی ہوں گے۔

عرس کے تیسرے اور آخری روز موسیقی کا پروگرام اور ایوارڈز کی تقریب ہوگی، عرس کے موقع پر سیکیورٹی کے سخت انتظامات کیے گئے ہیں، مزار کے داخلی راستوں پر واک تھرو گیٹ بھی نصب ہیں اور صوبے کے تمام نجی اور سرکاری تعلیمی اداروں اور عدالتوں میں تعطیل ہے۔

الیکشن کمیشن نے سندھ میں بلدیاتی الیکشن کا شیڈول تیار کرلیا، جو آج جاری کیا جائے گا۔

الیکشن کمیشن کے مطابق سندھ میں بلدیاتی انتخابات کے کاغذات نامزدگی چھبیس سےانتیس دسمبرکو جمع کرائے جاسکیں گے جبکہ پانچ جنوری تک جانچ پڑتال کی جائے گی، اسی طرح چھ اورسات جنوری کو اپیلیں جمع کرائی جائیں گی۔

الیکشن کمیشن کا کہنا ہے کہ تیرہ جنوری کو حتمی فہرست جاری کی جائے گی، الیکشن کمیشن کے مطابق حکومت سندھ نے بلدیاتی انتخابات کے حوالے سے تمام قانونی تقاضے پورے کر دیئے ہیں، اس لئے بلدیاتی انتخابات کرانا ممکن ہوگیا ہے، سندھ بھر میں بلدیاتی نمائندوں کے انتخابات کے لئے اٹھارہ جنوری کو پولنگ کا اعلان کیا گیا ہے