لاطینی امریکا کے ملک وینزویلا میں افراط زر کی شرح پچاس فیصد سے بھی بڑھ گئی۔
وینزویلا میں افراط زر اور مہنگائی بام عروج پر پہنچ گئی اور پچھلے تمام ریکارڈ توڑتے ہوئے سال دو ہزار تیرہ میں چھپن اعشاریہ چھ فیصد تک پہنچ گئی۔
وینزویلا کے صدر میڈورو کا بڑھتی ہوئی افراط زر کے بارے میں کہنا تھا کہ امریکی سازشوں کے باعث آج ملک کی معاشی حالت ابتر ہے، تاہم وہ اور انکی حکومت ماضی کی طرح اب بھی ماسکو کے ساتھ ہی اتحادی کی حیثیت سے رہے گی اور معاشی بدحالی کے اس موقع پر روس کی جانب سے تعاون کے خواہاں ہیں۔
سانتا کلاز کرسمس کے موقع پر بچوں میں تحائف تقسیم کرنے کے لئے مشہور ہے لیکن سربیا کے شہر بلغراد میں سانتا کلاز نے ایک نیا کام کیا۔
سربیا کے دارالحکومت میں سانتا کلاز کا روپ دھارے افراد کے درمیان دوڑ کا مقابلہ بلغراد کی گلیوں اور سڑکوں پر ہوا، جسے دیکھ کر بچے اور بڑے سب ہی بہت محظوظ ہوئے، اس ریس کا مقصد لاوارث بچوں کے لئے فنڈز اکٹھا کرنا تھا۔
سن دو ہزار گیارہ کی ریس کے فاتح اور دوہزار بارہ میں رنر اپ رہنے والے ساسا اسٹولک نے اس موقع پر کہا کہ ہر سال کرسمس کے موقع پر سانتا کلاز کا روپ دھار کر ریس میں حصہ لینا اور جیتنا ان کے لئے ایک اعزاز کی بات ہے۔
پاکستان اور سری لنکا کے درمیان سیریز کا پہلا میچ ابو ظہبی میں شروع ہوگیا۔ قومی ٹیم کے کپتان مصباح الحق نے ٹاس جیت کر فیلڈنگ کا فیصلہ کیا۔ مصباح الحق کا کہنا ہے کہ ٹیسٹ سیریز میں سر ی لنکا کو کمزور حریف سمجھ کر نہیں کھیلیں گے۔
ابو ظہبی میں پہلے ٹیسٹ سے قبل پاکستان اور سری لنکا کی ٹیموں نے بھرپور پریکٹس کی۔ سری لنکن ٹیسٹ اسکواڈ میں شامل جے وردھنے اور ہیراتھ نے پریکٹس سیشن میں حصہ لیا۔ ٹیسٹ سیریز کی ٹرافی کی تقریب رونمائی کے بعد قومی ٹیم کے کپتان مصباح نے کہا کہ اوپنز فارم میں ہیں ، فائنل الیون کا انتخاب مشکل ہوگا۔
مصباح الحق نے مزید کہا کہ ون ڈے اور ٹی ٹوئینٹی کی طرح ٹیسٹ میچز میں بھی سخت مقابلہ ہوگا، سری لنکا کی ٹیم مضبوط حریف ہے.
دوسری جانب سری لنکن کپتان اینجلو میتھوز کاکہنا تھا کہ جے دورھنے کے آنے سے بیٹنگ لائن مضبوط ہوگی، ٹیسٹ میچز میں پاکستان کو فیورٹ قرار نہیں دیتے جو ٹیم میدان میں بہتر کھیل پیش کرے گی وہی ٹیم میچ جیت سکتی ہے۔ سنئیر کھلاڑیوں کی شمولیت سے ٹیم متوازن ہوگئی ہے۔
اب ڈرون طیارے ڈرانے نہیں بلکہ لوگوں کو سہولیات پہچانے کے لئے مختلف کام سر انجام دیتے نظرآئیں گے، امریکی ادارے نے ڈرون طیاروں کی مدد سے تحقیقاتی مقاصد سر انجام دینے کا تجرباتی منصوبہ بنایا ہے۔
امریکی ہوابازی کے ادارے نے دو ہزار پندرہ سے ڈرونز کو سول مقاصد کے لئے استعمال کرنے کا اعلان کیا ہے، ادارے کی جاری کردی رپورٹ کے مطابق سات ہزار سے زائد ایسے طیارے بنائے جائیں گے، جو صرف تحقیقی اور نجی مقاصد کے لئے استعمال ہونگے۔
رپورٹ کے مطابق امریکی ریاستوں نیویارک، ڈکوٹا، نیواڈا الاسکا، ٹیکساس اور ورجینیا میں بنائے گئے چھ ٹیسٹ مقامات پر اگلے تین مہینے میں تجرباتی پروازوں کا آغاز کردیا جائے گا۔
واضح رہے کہ اس سے قبل برطانیہ میں ڈرون کے ذریعے پیزا ڈلیوری کا بھی باقاعدہ آغاز کیا جاچکا ہے، اب دیکھنا یہ ہے کہ یہ ٹیکنالوجی مزید کیا گل کھلاتی ہے۔
سندھ ہائی کورٹ کی ایڈیشنل جج 56 سالہ اشرف جہاں نے پیر کو کراچی میں شریعت کورٹ کے عہدے کے لیے حلف اٹھایا، وفاقی شریعت کورٹ کے چیف جسٹس آغا رفیق احمد نے کہا کہ یہ ایک تاریخی حلف برداری کی تقریب تھی، پاکستان کی وفاقی شریعت کورٹ میں عدالت کی 33 سالہ تاریخ میں پہلی بار ایک خاتون جج کو تعینات کیا گیا ہے۔
وفاقی شریعت کورٹ 1980 میں فوجی صدر ضیا الحق کے دور میں بنائی گئی، اس عدالت کا مقصد اس بات کو یقینی بنانا ہے کہ پاکستان کے قوانین اسلام تعلیمات کے مطابق ہوں، اس کے علاوہ عدالت حدود آرڈینینس کے تحت مقدمات کی سماعت بھی کرسکتی ہے۔
چیف جسٹس شریعت کورٹ آغا احمد کا کہنا تھا کہ پاکستان کے آئین میں کسی خاتون کے شریعت کورٹ کا جج بننے پر کوئی بندش نہیں ہے اور اس میں مردوں اور خواتین کے درمیان کوئی امتیاز نہیں ہے۔
انہوں نے کہا کہ انہوں نے اقدام اس لیے اٹھایا ہے تاکہ دنیا بھر میں یہ پیغام پہنچایا جاسکے کہ ہم روشن خیال لوگ ہیں اور بہت سے لوگوں کی غلط فہمی دور ہوگی۔
ملک کے کئی علاقے شدید ترین سردی کی لپیٹ میں ہیں جبکہ وفاقی دارلحکومت میں بھی درجہ حرارت منفی تین درجہ سینٹی گریڈ تک پہنچ گیا۔
ملک میں ان دنوں شدید سردی ہے اور کئی علاقوں میں بارش جبکہ بعض علاقوں میں برف باری سے درجہ حرارت منفی ڈگری تک پہنچ چکا ہے، جہاں نظام زندگی بھی بری طرح متاثر ہے۔
سب سے زیادہ سردی قلات میں ہے، جہاں درجہ حرارت منفی پندرہ درجے ریکارڈ کیا گیا، کوئٹہ منفی تیرہ، پارا چنار منفی دس ،استور، ژوب، گلگت، مری اور دیر میں درجہ حرارت منفی چار سے منفی سات درجہ سینٹی گریڈ تک ریکارڈ کیا گیا۔
وفاقی درالحکومت میں بھی شام کو درجہ حرارت منفی تین درجہ سینٹی گریڈ رہا، سردی سے بچنے کے لئے جہاں گرم ملبوسات کا استعمال عروج پر ہے وہاں بازاروں میں لوگ چائے، سوپ ، دودھ جلیبی اور گرم گرم پکوڑوں سے بھی لطف اندوز ہوتے نظر آتے ہیں۔
محکمہ موسمیات کا کہنا ہے کہ آئندہ چوبیس گھنٹے کے دوران لاہور، گجرانوالہ، راول پنڈی، اسلام آباد، ہزارہ ڈویژن، کشمیر کے علاوہ سرگودھا، گلگت گردونواح میں ہلکی بارش اور بالائی علاقوں میں برف فباری کے امکانات ہیں۔
کراچی کے علاقے اورنگی ٹاؤن میں شہریوں کے تشدد سے دو مبینہ ڈاکو ہلاک ہوگئے، پولیس کا دعویٰ ہے کہ ہلاک ہونے والے ڈاکو ہیں جب کہ ورثا نے الزام عائد کیا ہے کہ ایس ایچ او مومن آباد نے دونوں افراد کو شہریوں کے ہاتھوں قتل کرایا ہے۔
پولیس کے مطابق مومن آباد میں ڈاکوؤں کی اطلاع پر پولیس موبائل موقع پر پہنچی تو شہری دو ڈاکوؤں کوتشدد کا نشانہ بنارہے تھے، پولیس نے ڈاکوؤں کو شہریوں سے چھڑانے کی کوشش کی تو شہریوں نے انہیں مزید تشدد کا نشانہ بنایا، جس کے باعث وہ موقع پر ہی ہلاک ہوگئے۔
ہلاک ہونے افراد کے ورثا نے الزام عائد کیا ہے کہ ایس ایچ او مومن آباد نے دونوں افراد کو شہریوں کے ہاتھوں قتل کرایا ہے، ورثا نے مطالبہ کیا ہے کہ ایس ایچ او کے خلاف کاروائی کی جائے، پولیس کا کہنا ہے کہ ڈاکؤں کی فائرنگ سے ایک شہری بھی زخمی ہوا ہے، جس نے ڈاکوؤں کی شناخت کی ہے۔
کراچی سمیت سندھ بھر میں سی این جی اسٹیشنز آج صبح آٹھ بجے سے اڑتالیس گھنٹے کے لیے بند کر دیئے گئے۔
سوئی سدرن گیس کی جانب سے سندھ میں سی این جی اسٹیشنز کی بندش کا شیڈول تبدیل کر دیا گیا، رواں ہفتے سی این جی اسٹیشنز تین دن کے بجائے اڑتالیس گھنٹے کے لیے بند کیے جا رہے ہیں۔
سوئی سدرن گیس کے مطابق گیس فیلڈز سے گیس کی فراہمی میں کمی کے باعث سی این جی اسٹیشن کا شیڈول تبدیل کیا گیا ہے۔
نوری جام تماچی کے مزار کے احاطے سے ملنے والی پانچ لاشوں کا معمہ حل ہونے لگا۔
کینجھرجھیل کے ٹاپو پر واقع نوری جام تماچی کے مزار پر پانچ افراد کی ہلاکت کی گتھی سلجھنے لگی لیکن بہت سے سوالات کے جواب ملنا ابھی باقی ہیں، پولیس کے مطابق واقعے میں ہلاک ہونے والے کیپٹن بلال نے کچھ روز پہلے اپنے بھانجے کو ایک ایس ایم ایس کیا تھا، جس میں کہا گیا تھا کہ وہ بہت جلد دنیا چھوڑنے والے ہیں۔
کینجھرجھیل سے قتل کے شواہد تلاش کرنے کیلئے پولیس نے پاک بحریہ کےغوطہ خوروں سے بھی مدد حاصل کرلی ہے، فرانزک انویسٹی گیشن ٹیم نے بھی کینجھر جھیل پہنچ کر تفتیش کا آغاز کر دیا، ہفتے کی رات پانچ افراد نوری جام تماچی کے مزار سے مردہ حالت میں پائے گئے، جنہیں سر میں گولیاں مار کر قتل کیا گیا تھا، لیکن جائے وقوع سے گولیوں کے خول نہیں ملے تھے۔
پانچوں افراد کے قتل کا پتہ اس وقت چلا، جب ملاح پانچوں افراد کو لینے کیلئےمزار پہنچا، ورثا کے مطابق ہلاک ہونے والے علی ریاض کی چند روز پہلے ہی شادی ہوئی تھی اور تمام افراد ایک ساتھ ہی کینجھر جھیل گئے تھے۔
+ میں جاری آپریشن کے باعث سال 2013 ميں صوبے سندھ میں انسداد دہشت گردی عدالتوں کی تعداد میں اضافہ کیا گیا، جس کے بعد کراچی ميں 5 اور صوبے کے ديگر شہروں ميں 9 عدالتيں فعال ہيں جبکہ پندرہ سیشن ججز کو بھی انسداد دہشت گردی کے اختیارات دیئے گئے ہیں۔
سال بھر میں کل 1104 نئے مقدمات داخل کئے گئے جبکہ عدالتوں نے 450 مقدمات ميں فيصلے سنائے، جس میں 104 ملزمان کو انسداد دہشت گردی ایکٹ کے تحت مختلف سزائيں سنائی گئيں، صوبے کي انسداد دہشت گردی کی خصوصی عدالتوں ميں اب بھی 1470 مقدمات زير سماعت ہيں جبکہ سال 2012 ميں ان کی تعداد 1389 اور سال 2011 ميں زير التواء مقدمات کی تعداد 1121 تھی۔
کراچی کی پانچ عدالتوں ميں 575 نئے کيسز داخل کئے گئے، جن ميں سے صرف 136 کے فيصلے سنائے گئے، جن ميں 46 ملزمان کو سزائيں سنائی گئيں، کراچی کی پانچ انسداد دہشت گردی کی عدالتوں ميں اب بھی 707 کيسز زير سماعت ہيں۔
رواں سال کراچي کی پانچ عدالتوں سے 30 خطرناک ملزمان کو رينجرز نے انسداد دہشت گردی کي عدالتوں ميں پيش کيا اور90 روز کے نظر بندی کی استدعا کی جو منظور کی گئیں، ملزمان کو کیفر کردار تک پہنچانے کے لئے ان افراد سے تفتيش مشترکہ تحقيقاتی کميٹی کرے گی۔
قانونی ماہرین کے مطابق مقدمات کے زير التواء رہنے اور سزائيں سنانے کی شرح ميں کمی تفتیشی افسران کي نااہلی، کمزور تفتيش اور گواہوں کا عدم تحفظ کا احساس ہے۔
