برطانیہ میں طوفانی ہوائیں اور سیلاب کے باعث نظام زندگی مفلوج ہوکر رہ گیا دس ہزار سے افراد بجلی سے محروم ہوگئے۔

برطانوی دارالحکومت لندن اور اس قریبی علاقوں میں رواں ہفتے شدید بارشوں اور طوفانی ہواؤں کے باعث پانچ افراد ہلاک ہوگئے، سیلاب سے ایک ہزار سے زائد گھر متاثر جبکہ تیرہ ہزار بجلی سے محروم ہیں۔

یورپی ممالک میں ان دنوں کرسمس کی تعطیلات جاری ہیں، سخت سردی اور بارشوں کے باعث لاکھوں افراد کرسمس کا تہوار گھروں پر منانے پر مجبور تھے، حکام کیجانب سے چھیاسٹھ سیلابی وارننگ جاری کی گئیں، متاثرہ علاقوں میں امدادی کاروائیاں جاری ہیں۔
   

برازیل میں موسلادھار بارشوں میں چالیس افراد کی ہلاکتوں کے بعد فوج کو تعینات کر دیا گیا۔

غیر ملکی میڈیا کے مطابق برازیل کے اسپیرتو صوبے میں گذشتہ دس دن سے جاری طوفانی بارشوں نے تباہی مچا دی ہے، بارش کی وجہ سے پچاس ہزار سے زائد افراد بے گھر ہوگئے ہیں۔

نشیبی علاقے مکمل طور پر زیر آب آچکے ہیں، متاثرہ علاقوں میں فوج کو تعینات کر دیا گیا ہے، جوتعلیمی ادارے اور تمام سرکاری عمارتوں میں متاثرین کیلئے میڈیکل کیمپس اور خیمہ بستیوں کا بندوبست کر رہی ہے۔
   

مصر میں فوجی حکومت نے اخوان امسلمین کو دہشت تنظیم قرار دینے کے بعد کریک ڈاؤن کرتے ہوئے پچاس سے زائد کارکنوں کو گرفتار کرلیا ہے۔

امریکی وزیر خارجہ جان کیری نے اخوان کو دہشت گرد قرار دینے کی مذمت کی ہے، مصری حکام نے اخوان المسلمین کے کارکنان پر دہشت گردی کے الزامات عائد کرتے ہوئے کریک ڈاؤن شروع کردیا جبکہ اخوان المسلمین کی حمایت میں مظاہرہ اور کسی بھی مہم میں حصہ لینے والے افراد کو گرفتاراور پانچ سال کی قید کا حکم دیا گیا ہے۔

مصر میں پولیس پر حملوں اور سولہ افراد کی ہلاکت کے بعد حکام نے الزام اخوان المسلمین پر عائد کیا، اخوان المسلمین کیجانب سے الزامات کی تردید کی گئی ہے، امریکی وزیر خارجہ جان کیری نے اخوان المسلمین کو دہشت گرد تنظیم قرار دینے پر مذمت کی ہے۔

بھارت میں فرقہ وارانہ فسادات کے متاثرین کیمپ میں ٹھنڈ لگنے کے باعث چونتیس بچے ہلاک ہوگئے، حکام نے بچوں کی ہلاکت کی تصدیق کر دی۔

بھارتی ریاست اتر پردیش میں مظفرنگر کے فرقہ وارانہ فسادات میں بے گھر متاثرین کیلئے لگائے گئے امدادی کیمپ میں ناکافی سہولیات کے باعث درجنوں بچے حکومتی بے حسی کا شکار ہوگئے۔

مظفرنگر میں ہونے والے ہندو مسلم فسادات میں پینتالیس افراد ہلاک جبکہ سینکڑوں گھر نذرآتش ہوئے تھے، حکام کیجانب سے واقعے کی وضاحت کرتے ہوئے کہا گیا ہے کہ اموات کی وجہ ناقص خوراک اور ڈینگی وائرس ہے، اپوزیشن جماعتوں نے واقعے کے خلاف مظاہرہ کرتے ہوئے شدید مذمت کی ہے۔

فلسطین میں اسرائیلی بربریت اور گھروں کو مسمار کرنے کے خلاف اقوام متحدہ نے مذمت کی، غزہ کی پٹی میں اسرائیلی طیاروں کی بمباری سے متعدد افراد زخمی ہوگئے۔

اسرائیل کی جانب سے غزہ کی پٹی میں فلسطینی گھروں کو مسمار کرنے پر اقوام متحدہ کے انسانی حقوق کمیشن نے فوری طور پر کاروائی روکنے پر زور دیا۔

اسرائیل کی حالیہ کاروائی میں اڑسٹھ افراد متاثر ہوئے، جس میں بتیس بچے شامل ہیں، رواں سال ایک ہزار سے زائد افراد اسرائیلی کاروائی سے بے گھر ہوئے۔

غیر ملکی خبر ایجنسی کے مطابق اسرائیلی طیاروں کی جانب سے غزہ کی پٹی میں دو فضائی حملے کیے گئے، فضائی حملے ایک اسرائیلی شہری کے ہلاک ہونے کے رد عمل میں کیے گئے، حکام کے مطابق فضائی حملے میں حماس کو نشانہ بنایا گیا ہے۔
   

سائبیریا میں روسی کارگو طیارہ گر کر تباہ ہونے سے نو افراد لقمہ اجل بن گئے۔

غیر ملکی خبر رساں ادارے کے مطابق روسی کارگو طیارہ ملٹری کے ایک ویئر ہاوس پر گرا، روسی حکام کے مطابق کارگو طیارہ فنی خرابی کے باعث کر تباہ ہوا، جس کے نتیجے میں طیارے پرعملے کے چھ افراد سمیت نو افراد ہلاک ہو گئے۔

واقعے کے بعد روسی فورسز نے علاقے کو گھیرے میِں لیکر آمدورفت کے لئے بند کر دیا اور لاشوں کو اسپتال منتقل کیا، واقعے کی تحقیقات کے لیے تحقیقاتی کمیشن قائم کر دیا گیا ہے تاہم اس حادثے کی فوری وجوہات سامنے نہیں آئی ہیں۔

ترکی میں بدعنوانی کے الزامات پر کابینہ کے تین وزراء کے استعفی کے بعد ایک نئے سیاسی بحران نے جنم لے لیا ہے۔

کرپشن کے الزامات پر پولیس نے گذشتہ دنوں وفاقی کابینہ کے تین وزراء کے بیٹوں کو حراست میں لے لیا، جس کے بعد وزراء نے اپنے استعفے وزیراعظم کو بھجوا دیئے۔

وزراء کا موقف ہے کہ وزیراعظم رجب طیب خود ہی کرپشن میں ملوث ہیں اور ان پر الزامات لگا رہے ہیں، مستعفی وزراء کے اس موقف کے بعد انقرہ کو ایک بار پھر سیاسی بحران کا سامنا کرنا پڑ رہا ہے اور ترک عوام وزیراعظم سے صاف شفاف تحقیقات کا مطالبہ کر رہے ہیں۔

دوسری جانب وزیراعظم اردگان نےمستعفی وزراء کی جگہ کابینہ میں نئے وزراء کو شامل کرلیا ہے۔