قومی اسمبلی کی قائمہ کمیٹی برائے داخلہ کے اجلاس میں نبیل گبول نے کہا ہے ان کی زندگی کو طالبان سے خطرہ ہے۔ مگر ایک ہفتے پہلے سندھ حکومت نے سیکیورٹی واپس لے لی۔

اسلام آباد میں قومی اسمبلی کی قائمہ کمیٹی برائے داخلہ کا اجلاس ہوا، ایم کیو ایم کے ایم این اے نبیل گبول نے بتایا ان کی زندگی کو خطرہ ہے، اجلاس میں اگست دو ہزار تیرہ کی تاریخ سے جاری نیشنل کرائسز مینجمنٹ سیل کا الرٹ پیش کیا گیا۔

جس میں بتایا گیا ہے کہ ایم کیوایم کے تین اراکین اسمبلی کو طالبان سے خطرہ ہے، ان میں ایم این اے نبیل گبول، ایم این اے ڈاکٹر فاروق ستار اور رکن سندھ اسمبلی فیصل سبزواری شامل ہیں۔

نبیل گبول کا کہنا تھا کہ اس کے باوجود سندھ حکومت نے ایک ہفتے قبل ان کی سیکورٹی واپس لے لی، کمیٹی کے چیئرمین شمیم احمد خان نے یقین دہانی کرائی قومی اسمبلی کی قائمہ کمیٹی برائے داخلہ نبیل گبول کے لئے سیکریٹری داخلہ کو خط لکھے گی۔
   

سپریم کورٹ میں اوگرا عملدرآمد کیس کی سماعت ہوئی، پراسیکیوٹر نیب کے آغا نے عدالت کو بتایا کہ چیئرمین نیب نہیں ہیں، جس کی وجہ سے مشکلات ہو رہی ہیں وقت دیا جائے۔

جسٹس جواد نے استفسار کیا کہ توقیر صادق کے بارے میں کیا تحقیقات کی گئیں، جس پر پراسیکیوٹر نیب نے کہا کہ تحقیقات جاری ہیں توقیر صادق کے نام پر لاہور میں دو زمینیں ہیں، اس کی بھی تحقیقات جاری ہیں جبکہ توقیرصادق کو باہر سے لانے میں اڑتیس لاکھ  کے اخراجات آئے، عدالت نے مزید سماعت سولہ جنوری تک ملتوی کردی۔
   

وفاقی کی جانب سے اسلام آباد ہائیکورٹ میں چیئرمین پیمرا چوہدری رشید کی بحالی کے خلاف انٹراکورٹ اپیل دائر کردی گئی۔

انٹرا کورٹ اپیل چھبیس دسمبر کے عدالتی فیصلے کے خلاف دائرکی گئی، جسٹس ریاض احمد خان نے چیئرمین پیمرا کی بحالی کے احکامات جاری کیے تھے۔

انٹرا کورٹ اپیل میں موقف اختیار کیا گیا ہے کہ چیئرمین پیمرا کی تعیناتی پیمرا آرڈنینس کی سیشن دس کی خلاف ورزی ہے، چیئرمین کی بحالی کیلئے دائر درخواست میں عدالت سے حقائق چھپائے گئے۔
       

تحریک انصاف کے رہنما عمران خان کی ہدایت پر خیبر پختوخواں کی حکومت نے ہنگو میں اپنی جان کی بازی لگا کر کئی زندگیاں بچانے والے اعتزاز حسن کے ورثا کے لئے پچاس لاکھ روپے اور اس جانباز طالب علم کے نام سے صوبائی اسکول اور اسٹیڈیم کا نام منسوب کرنے بھی عندیا دیا ہے۔

اپنی جان کی بازی لگا کر خود کش بمبار کو روک کر اپنا اسکول اور اس میں موجود کئی طالبعلموں کی زندگیاں بچانے والا ہنگو کا رہائشی نڈر طالب علم اعتزاز حسن جسے پوری قوم سلام تو کر رہی ہے۔

محب وطن اور انسانیت کے لئے اپنی جان دینے والے اعتزاز کو خراج پیش کرنے پی ٹی آئی کے وزرا اسکے گھر گئے، والدین سے ملاقات کی اور انکے بیٹے کے کارنامے پر انہیں سلام پیش کیا۔