عراقی دارالحکومت بغداد زور دار دھماکوں سے لرز اٹھا، دو کار بم دھماکوں کے نتیجے میں اٹھارہ افراد جاں بحق جبکہ درجنوں زخمی ہوگئے۔

غیرملکی میڈیا کے مطابق بغداد کے نواحی علاقے میں بس ٹرمینل کے باہر کار میں نصب بم پھٹنے سے بارہ افراد لقمہ اجل بن گئے، دھماکے کے بعد سیکیورٹی اہلکاروں نے علاقے کو گھیرے میں لے کر زخمی افراد کو اسپتال منتقل کیا جبکہ بغداد میں ہی ایک اور کار بم دھماکے میں چھ افراد جان کی بازی ہار گئے۔

اقوام متحدہ کی جاری کردہ رپورٹ کے مطابق گذشتہ سال عراق میں بم دھماکوں اور پرتشدد واقعات میں ساڑھے آٹھ ہزار افراد جاں بحق جبکہ ایک لاکھ سے زائد زخمی ہوگئے۔

مغربی جرمنی کے علاقے ٹرائیر میں نجی طیارہ گر کر تباہ ہوگیا، جس کے نتیجے میں چار افراد ہلاک ہوگئے۔

فائر ڈیپارٹمنٹ کے ترجمان ایرک تھائی ایلٹیگس کا کہنا ہے کہ نجی طیارہ انگلینڈ سے جرمنی کی طرف آرہا تھا اور بہت زیادہ دھند ہو نے کے باعث ریلوے کو بجلی سپلائی کرنے والے پول سے ٹکرا کرتباہ ہوگیا، جس میں سوار دو مسافر اور دو پائلٹ موقع پر ہی ہلاک ہوگئے۔
   

ایرانی وزیر خارجہ محمد جواد ظریف نے کہا ہے کہ ایران دہشت گردی اور انتہا پسندی کا مقابلہ کرنے کے لئے تمام ممالک کے درمیان قریبی تعاون چاہتا ہے۔

تہران میں کینیا کے سینیٹ کے اسپیکر ایکوی ڈیوڈ ایتھورو کیساتھ ملاقات میں انکا کہنا تھا کہ ایرانی حکومت کینیا سمیت افریقی ممالک کے ساتھ تعلقات میں مزید توسیع کو خواہشمند ہے۔

اس موقع پر کینیا سینیٹ کے اسپیکر ڈیوڈ ایتھورو کا کہنا تھا کہ کینیا ایران کے ساتھ اقتصادی، تجارتی، زرعی اور سیاحت کے شعبوں میں تعلقات کو مزید مستحکم کرنے کا خواہاں ہے۔

مصر میں حکومت کیجانب سے عائد کردہ پابندی کے باوجود قاہرہ اور ملک کی دیگر یونیوزسٹیوں کے طالب علموں اور فورسزکے درمیان جھڑپیں جاری ہیں۔

مقامی میڈیا کے مطابق ملک بھر کی کئی جامعات کے طلباء معزول صدر محمد مرسی کی بحالی کے لئے مطالبہ کررہے تھے، قاہرہ یونیورسٹی کے باہر جاری مظاہرے کو منتشر کرنے کے لئے پولیس کی بھاری نفری موجود تھی۔

مظاہرین کو منتشرکرنے کے لئے پولیس نے طلباء پر آنسو گیس اور ہوائی فائرنگ کی، جس سے مظاہرین اور پولیس کے درمیان تصادم شروع ہوگیا، پولیس کی کارروائی سے کئی طلبا زخمی ہوگئے۔

پولیس نے پندرہ طالبات کو گرفتار کرلیا، یونیورسٹی کے طلباء کئی روز سے سراپا احتجاج ہیں اور انہیں سیکیورٹی فورسز کیجانب سے سخت مداخلت کا سامنا ہے۔
    
   

یوکرائن میں حکومت مخالف سینکڑوں مظاہرین نے دارالحکومت کیف میں صدر وکٹر یانوکووچ کے خلاف کار ریلی کے ذریعے صدر کی رہائش گاہ کی جانب مارچ شروع کر دیا۔

دارالحکومت کیف میں مظاہرین کا حکومت کے خلاف احتجاج کا سلسلہ تاحال جاری ہے، مظاہرین نے صدر وکٹر یانوکووچ کے خلاف کار ریلی نکالی، مظاہرین نے صدر کیخلاف نعرے بازی اور انکے استعفے کا مطالبہ کیا جبکہ پولیس کی بھاری نفری کسی بھی ناخوشگوار واقعے سے نمٹنے کیلئے موجود ہے۔

یوکرائن میں مظاہروں کا سلسلہ اس وقت سے جاری ہے، جب یوکرائن کے صدر نے یورپی یونین کے ساتھ تجارتی معاہدے سے انکار کر دیا تھا۔