امریکا نے شمالی کوریا کو خبردار کیا ہے کہ اس کے یا اتحادیوں کیخلاف کوئی بھی جوہری حملہ ناقابل قبول ہوگا اور اس کے نتیجے میں کم جونگ کی حکومت کا خاتمہ ہو جائےگا۔

ہفتے کو امریکا اور جنوبی کوریا کی جانب سے جاری مشترکہ بیان میں کہا گیا کہ امریکا ایک بار پھر اس بات کا اعادہ کرتا ہے کہ شمالی کوریا کی جانب سے جنوبی کوریا کیخلاف کسی بھی جوہری حملے کی صورت میں فوری اور فیصلہ کن ردعمل دیا جائے گا۔

امریکا اور کوریا نیوکلیئر کنسلٹیٹو گروپ کا اہم اجلاس جمعہ کو واشنگٹن میں منعقد ہوا تھا۔ نیوز ایجنسی کے مطابق امریکا اور جنوبی کوریا اگلے سال کے وسط تک جوہری دفاعی حکمت عملی پر مشترکہ منصوبہ بنارہے ہیں۔

اس حکمت عملی کے تحت شمالی کوریا کے جوہری ہتھیاروں کو روکنے کے لیے ایک مربوط نظام قائم کرنے کا منصوبہ بنایا جارہا ہے۔

واشنگٹن اور سیول نے اگلے سال تک ایک جامع رہنما منصوبہ بندی مکمل کرنے کا فیصلہ کیا ہے تاکہ پیانگ یانگ کی جانب سے جوہری حملے کے خطرے کو مل کر روکا جاسکے اور اس کا جواب دیا جاسکے۔

یونہاپ نیوز ایجنسی کا کہنا ہے کہ توقع ہے کہ امریکا اور جنوبی کوریا اگلے سال کی مشترکہ فوجی مشقوں میں جوہری آپریشن کی مشقیں بھی شامل کرسکتے ہیں۔

کم نے جمعہ کو کہا تھا کہ شمالی کوریا اس ماہ ایک بین البراعظمی بیلسٹک میزائل (آئی سی بی ایم) کا تجربہ کر سکتا ہے، جو اپنی رینج سے قطع نظر جوہری صلاحیت کا مالک ہے کیونکہ یہ جوہری وار ہیڈ لے جا سکتا ہے۔

واضح رہے کہ شمالی کوریا کی جانب سے ایسے بیلسٹک میزائلوں کی ایک رینج تیار کی گئی ہے اور ان کا تجربہ کیا گیا ہے جو جنوبی کوریا، جاپان اور امریکی سرزمین پر اپنے اہداف کو نشانہ بنا سکتے ہیں۔