نیویارک : امریکی محکمہ خارجہ کے ترجمان مارگریٹ میک لاؤڈ کا کہنا ہے کہ امریکا پاکستان کیساتھ تعلقات اپنے طور پر دیکھتا ہے کسی اور کی نظر سے نہیں۔

تفصیلات کے مطابق امریکی محکمہ خارجہ ترجمان مارگریٹ میک لاؤڈ نے اے آر وائی سے اردو میں خصوصی گفتگو کی، مارگریٹ میکلاؤڈ نے بات چیت کا آغاز "آداب” سے کیا۔

امریکی ترجمان نے ہر سوال کا جواب اردو میں خوبصورتی سے دیا، پاک امریکا تعلقات سے متعلق سوال کے جواب میں مارگریٹ میک لاؤڈ نے کہا امریکا اور پاکستان کے بہت سےمشترکہ مفادات ہیں ، دونوں ممالک بہت سے شعبوں میں تعاون کرتے ہیں۔

امریکی محکمہ خارجہ کی ترجمان کا کہنا تھا کہ امریکا پاکستان کیساتھ تعلقات اپنے طور پر دیکھتا ہے کسی اور کی نظر سے نہیں، جمہوریت میں انتخابات انتہائی ضروری ہیں۔

انھوں نے مزید کہا کہ آج کل عالمی مالیاتی ادارےکےسدھار کی بات ہورہی ہے ، زراعت، توانائی، پانی اور ماحولیاتی تعاون کر رہے ہیں۔

کراچی : پیپلزپارٹی کے مرکزی رہنما خورشید شاہ کا کہنا ہے کہ زرداری نے بلاول کے ہاتھ کھول دیئے تو 80 والی دہائی میں واپس چلے جائیں گے۔

تفصیلات کے مطابق پیپلزپارٹی کے مرکزی رہنما خورشید شاہ نے نجی وی چینل کے پروگرام میں گفتگو کے دوران اپنا موقف دہراتے ہوئے کہا کہ نگراں وفاقی کابینہ میں ن لیگ کے لوگ بیٹھے ہیں، بہت سےعہدیدار ن لیگ کے ہیں۔

خورشید شاہ کا کہنا تھا کہ اس وقت ملک میں ن لیگ کی حکومت ہے توشکوہ بھی ان سے ہی ہے ، ن لیگ والے اپنے ہیں اور شکایت اپنوں سے ہی کی جاتی ہے۔

ن لیگ کے حوالے سے پی پی رہنما نے کہا کہ آصف زرداری کا مؤقف ہم سے اچھا ہے وہ ن لیگ سے لڑنا نہیں چاہتے، ہماری قیادت نے ن لیگ سے بات نہیں کی توکرنی چاہیے۔

ان کا کہنا تھا کہ زرداری نے بلاول کے ہاتھ کھول دیئے تو 80 والی دہائی میں واپس چلےجائیں گے، ہمارا مطالبہ ہے کہ لیول پلیئنگ فیلڈ فراہم کی جائے۔

نواز شریف کی واپسی کے سوال پر خورشید شاہ نے کہا کہ پہلے بھی کہتے تھے نواز شریف کو وطن واپس آنا چاہیے، ہمیں خوشی ہے کہ نوازشریف واپس آرہے ہیں۔

انھوں نے شکوہ کیا کہ نون لیگ والوں کو دوست سمجھتے ہیں لیکن سندھ میں ترقیاتی کام رک گئے اور پنجاب میں دھڑادھڑکام ہورہا ہے، سندھ کی بیوروکریسی میں بڑے پیمانے پر تبدیلیاں ہوئی اور پنجاب میں نہیں۔

اسلام آباد : رواں سال پاکستان اسٹیل کے ملازمین کو بغیر کام تنخواہوں کی ادائیگی پر ایک ارب 24 کروڑ روپےسے زائد خرچ ہوں گے۔

تفصیلات کے مطابق سال2015 سے بند پاکستان اسٹیل ملز ملازمین کے مزے آگئے، ذرائع نے بتایا کہ بغیر کام تنخواہوں کی ادائیگی پر اس سال 1ارب 24 کروڑ سے زائد خرچ ہوں گے۔

ذرائع کا کہنا تھا کہ رواں مالی سال اسٹیل ملز کے مجموعی اخراجات کیلئے 10 ارب روپے مختص ہیں تاہم ملازمین کو تنخواہوں کی ادائیگی کیلئے مالی وسائل دستیاب نہیں۔

اسٹیل ملز سے 8 ہزار 779 ملازمین میں سے 5 ہزار 679 فارغ کیے جا چکے ہیں اور اس وقت اسٹیل ملز ملازمین کی موجودہ تعداد3 ہزار سے زائد ہے، جن کی ماہانہ تنخواہ کا بل10 کروڑ 40 لاکھ روپے ہے۔

ذرائع کے مطابق اسٹیل ملز کے جون 2022 تک مجموعی نقصان 206 ارب سے زیادہ تھا۔

گذشتہ روز اقتصادی رابطہ کمیٹی (ای سی سی) نے پاکستان اسٹیل مل ملازمین کی تنخواہیں جاری کرنے کی منظوری دی تھی۔

اسلام آباد : مسلم لیگ نون کے رہنما راناثنااللہ کا کہنا ہے کہ قمرباجوہ اورفیض حمید قومی مجرم ہیں، جیسے مشرف کو کٹہرے میں لائے تھے ان لوگوں کو بھی انصاف کے کٹہرے میں لائیں گے۔

تفصیلات کے مطابق مسلم لیگن کے رہنما رانا ثنااللہ نے نجی ٹی وی چینل کے پروگرام میں گفتگو کرتے ہوئے کہا کہ نواز شریف کی خواہش ہے ملک کو اس حال تک پہنچانے والوں کا احتساب ہونا چاہیے، قمرباجوہ اورفیض حمید قومی مجرم ہیں۔

رانا ثنااللہ کا کہنا تھا کہ معیشت کا بھٹہ بٹھانے کے یہ لوگ ذمہ دارہیں، جن لوگوں نے ملک کو اس حال تک پہنچایا ان کیخلاف مقدمہ ہوناچاہیے۔

سابق وزیر نے کہا کہ کوئی یہ سمجھےکہ ہم نے آتے ساتھ ہی انتقام کے پیچھے پڑجاناہے، جیسے مشرف کو کٹہرےمیں لایا گیا ان لوگوں کو بھی لانا چاہیے، ہم نے مشرف کو کٹہرے میں لانےکیلئے مشکلات بھگتیں۔

نواز شریف کے بیان کے حوالے سے ان کا کہنا تھا کہ نوازشریف کا کل پارٹی اجلاس میں بیان پالیسی بیان ہے، جنہوں نے ملک کو اس صورتحال دو چار کیا ان کا احتساب ہونا چاہیے۔

رانا ثنااللہ نے بتایا کہ قمر جاوید باجوہ کو میں نے کہا تھا آپ نے میرے خلاف کیس بنایا ہے تو قمرباجوہ کا کہنا تھا کہ میں نے کیس نہیں بنایا، جس پر میں نے کہا آپ نے ہی بنایا ہے۔

ن لیگی رہنما نے کہا کہ نوازشریف کی واپسی پر لاکھوں کارکنوں کولاہورلانا چاہتے ہیں،ان کوایئرپورٹ سےاقبال پارک لےجایاجائےگا، نواز شریف اقبال پارک میں عوام سےخطاب کریں گے۔