ایشیا کپ میں خراب فارم کے باعث قومی ٹیم کے نائب کپتان شاداب خان سخت تنقید کا سامنا کر رہے ہیں شاہد آفریدی نے انہیں ورلڈ کپ کے لیے مفید مشورے دیے ہیں۔

ایشیا کپ میں پاکستان کرکٹ ٹیم کے نائب کپتان شاداب خان بولنگ اور بیٹنگ دونوں میں ںاکام رہے جس پر انہیں شائقین کی جانب سے سخت تنقید کا سامنا ہے۔ ایسے میں سابق کپتان شاہد آفریدی ان کی مدد کو آگے آئیں ہیں اور آل راؤنڈر کو ورلڈ کپ سے قبل فارم حاصل کرنے کے لیے اہم مشورے دیے ہیں۔

نجی ٹی وی کے کرکٹ سے متعلق پروگرام میں گفتگو کرتے سابق سابق اسٹار آل راؤنڈر نے شاداب خان کے حوالے سے گفتگو کرتے ہوئے کہا کہ شاداب خان ہمیشہ میرا فیورٹ رہا ہے اور اس نے ماضی میں کئی نا قابل فراموش پرفارمنس دیں اور اہم میچز اپنی بولنگ کی وجہ سے پاکستان کو جتوائے ہیں۔

شاہد آفریدی نے مزید کہا کہ شاداب خان میں انہیں ہمیشہ اپنا آپ ہی نظر آیا کہ جیسا ان کا ٹیم میں کردار ہوتا تھا آل راؤنڈر کا وہی کردار شاداب کا ہے اور اس کو وہ بخوبی نبھاتے آ رہے ہیں لیکن کچھ عرصے سے ان کی پرفارمنس میں پہلے جیسی بات نہیں رہی۔

بوم بوم کرکٹ اسٹار نے کہا کہ شاداب خان کا کردار مڈل اوورز میں اہم ہوتا ہے کیونکہ بعض اوقات فاسٹ بولرز کے پرفارم نہ کرنے پر اس مرحلے پر اسپنرز پر وکٹیں لینے کی ذمے داری ہوتی ہے لیکن نائب کپتان جو ٹیم کے ستون ہیں ان کی خراب فارم کی وجہ سے ٹیم مشکلات کا شکار ہے۔

انہوں نے لیگ اسپنر آل راؤنڈر کو مشورہ دیا کہ وہ ورلڈ کپ سے قبل آرام کریں اور سابق لیجنڈ اسپنر مشتاق احمد سے ملیں ان کے ساتھ 10، 12 روز کی نشست لگائیں، مشورے لیں اور ان پر عمل کریں جو ورلڈ کپ جیسے اہم ترین ایونٹ سے قبل ان کی فارم میں واپسی کے لیے انتہائی مفید ثابت ہوں گی۔

ایشیا کپ میں پاکستانی ٹیم کی مایوس کن کارکردگی اور نسیم شاہ کی انجری پر شائقین کرکٹ محمد عامر کی قومی ٹیم میں واپسی کا پرزور مطالبہ کر رہے ہیں جس کی معین خان نے حمایت کر دی ہے۔

حال ہی میں بھارت کے آٹھویں بار چیمپئن بننے کے ساتھ اختتام پذیر ہونے والے ایشیا کپ میں پاکستان کرکٹ ٹیم کی مایوس کن کارکردگی، نسیم شاہ کی انجری اور ورلڈ میں شرکت کے امکانات کم ہونے پر شائقین کرکٹ نے سوشل میڈیا پر محمد عامر سے ریٹائرمنٹ واپس لینے اور پی سی بی حکام سے انہیں قومی ٹیم میں شامل کرنے کے پرزور مطالبات سامنے آئے ہیں۔

اب محمد عامر کی انٹرنیشنل کرکٹ اور قومی ٹیم میں شمولیت کے لیے کرکٹ کے حلقوں سے بھی آواز اٹھ رہی ہیں اور سابق کپتان وٹیسٹ کرکٹر معین خان نے محمد عامر کی انٹرنیشنل کرکٹ میں واپسی اور قومی ٹیم میں شمولیت کی حمایت کر دی ہے۔

کراچی میں میڈیا سے گفتگو کرتے ہوئے معین خان نے کہا کہ محمد عامر زبردست کرکٹر اور بہترین بولر ہے جو اس وقت لیگز کھیل رہا ہے اور اچھا پرفارم بھی کر رہا ہے اسے انٹرنیشنل کرکٹ میں واپسی کرنی چاہیے۔

قومی ٹیم میں واپسی کے حوالے سے سابق کپتان کا موقف تھا کہ ایسا نہیں کرنا چاہیے کہ حقدار کھلاڑی جو پہلے ہی ٹیم میں سیٹ ہو اس کی جگہ عامر کو دوبارہ لے آئیں تاہم ایک طریقہ کار ہے جس سے گزر کر اگر وہ ٹیم میں آتا ہے تو اس کو ضرور آنا چاہیے۔

واضح رہے کہ 2020 میں محمد عامر نے پی سی بی منیجمنٹ سے مایوس ہو کر انٹرنیشنل کرکٹ سے ریٹائرمنٹ کا اعلان کیا تھا۔

اس موقع پر انہوں نے پی سی بی کو کڑی تنقید کا نشانہ بناتے ہوئے الزام عائد کیا تھا کہ مجھے ذہنی طور پر ٹارچر کیا جا رہا ہے جب کہ عامر کے ریٹائرمنٹ کے اعلان پر پاکستان کرکٹ بورڈ نے اسے بولر کا ذاتی فیصلہ قرار دیتے ہوئے کہا تھا کہ آئندہ کسی انٹرنیشنل میچ میں محمد عامر کے نام پر غور نہیں کیا جائے گا۔