بلوچستان کے ضلع مستونگ میں لک پاس کے مقام پر حملہ آور نے خود کو دھماکے سے اڑا لیا۔

پولیس کا کہنا ہے کہ خودکش حملہ آور نے دھرنے میں جانے کی کوشش کی، محافظوں اور کارکنان کے روکنے پر حملہ آور نے خودکش دھماکا کردیا۔

حملہ آور اپنے ساتھی کے ساتھ موٹرسائیکل پرآیا تھا، دھماکے کے بعد حملہ آورکا ساتھی فرار ہوگیا۔

ترجمان بلوچستان حکومت کا کہنا ہے جائے وقوع کے قریب بلوچستان نیشنل پارٹی کا دھرنا جاری تھا، کوئی جانی نقصان نہیں ہوا، سردار اخترمینگل اور بی این پی کی قیادت اور شرکا محفوظ رہے۔

صوبائی حکومت گزشتہ رات سے بی این پی قیادت سے رابطے میں ہے، بی این پی مینگل کے وفد کی گزشتہ رات انتظامیہ سےملاقات ہوئی۔

حکومتی وفد کا سردار اختر مینگل سے آج ملاقات پراتفاق ہوا ہے، سردار اختر مینگل، دھرنے کے شرکا،عوام  کی حفاظت حکومت کی ذمہ داری ہے۔

پنجاب کے شہر صادق آباد میں یوٹیوب چینل بنانے کی وجہ سے مشہور کچے کے انتہا مطلوب ڈاکو شاہد لونڈ کو ہلاک کرنے والا عمر لونڈ قتل کر دیا گیا۔

پولیس حکام نے بتایا کہ جمالدینی والی کے قریب ڈاکوؤں کی فائرنگ سے تین افراد کے قتل ہونے کا واقعہ پیش آیا، مارے جانے والوں میں عمر لونڈ، حذیفہ لونڈ اور راہ گیر خالد دھنوانی شامل ہیں۔

حکام کے مطابق مقتول عمر لونڈ نے چند ماہ قبل ڈاکو شاہد لونڈ کو قتل کیا تھا، حملہ آوروں نے ہلاک ڈاکو کے قتل کا بدلہ لیا۔

یہ بھی پڑھیں: یوٹیوبر ڈاکو شاہد لونڈ مبینہ طور پر ساتھیوں کی فائرنگ سے ہلاک

نومبر 2024 میں ڈاکو شاہد لونڈ اپنے ہی ساتھیوں کی فائرنگ سے ہلاک ہوگیا تھا۔ ذرائع نے بتایا تھا کہ عمر لونڈ اور اس کے ساتھیوں نے فائرنگ کر کے انتہائی مطلوب ڈاکو کو قتل کیا، شاہد لونڈ اور عمر لونڈ کے درمیان تلخ کلامی کے بعد فائرنگ کا تبادلہ ہوا تھا۔

دوسری جانب، پنجاب پولیس کا کہنا تھا کہ شاہد لونڈ کو رحیم یار خان اور راجن پور پولیس کی مشترکہ کارروائی میں کچہ بنگلہ اچھا میں ہلاک کیا گیا۔

ترجمان پنجاب پولیس نے بتایا تھا کہ حکومت ِ پنجاب نے ہلاک ڈاکو کے سر کی قیمت 1 کروڑ روپے مقرر کی تھی، شاہد لونڈ قتل اور ڈکیتی سمیت متعدد مقدمات میں پولیس کو مطلوب تھا۔

ادھر، آئی جی پنجاب ڈاکٹر عثمان انور نے کامیاب کارروائی پر رحیم یار خان اور راجن پور پولیس کو شاباشی دی اور کہا تھا کہ کچے کے علاقے سے دہشتگردوں اور ڈاکوؤں کا خاتمہ مشن ہے۔

لاہور: وزیر اطلاعات و نشریات پنجاب عظمیٰ بخاری نے پاکستان تحریک انصاف (پی ٹی آئی) کی قیادت کو طالبان کا بھائی قرار دے دیا۔

عظمیٰ بخاری نے اپنے بیان میں کہا کہ نہ دہشتگرد چھٹی کرتے ہیں اور نہ حکومت کر سکتی ہے، ڈی جی خان کے علاقے میں دہشتگردوں نے حملہ کیا جہاں ہمارا بارڈر خیبر پختونخوا کے ساتھ ملتا ہے۔

صوبائی وزیر اطلاعات نے بتایا کہ 20 سے 25 دہشتگردوں نے حملہ کیا جن میں سے 2 مارے گئے، دہشتگردوں کا مقصد پنجاب کے حالات کو خراب کرنا تھا، زخمی دہشتگرد لاشیں اٹھا کر بھاگیں ہیں، شر پسندوں نے راکٹ لانچر بھی چلائے ہیں لیکن پولیس نے بہادری سے بڑے حملے کو ناکام بنایا۔

یہ بھی پڑھیں: دہشتگرد خود حکومت میں ہوں تو دہشتگردی کیسے ختم ہوگی؟ امیر مقام

انہوں نے بتایا کہ وزیر اعلیٰ مریم نواز نے ڈی جی خان میں پولیس کیلیے بنکرز بنائے، ڈی جی خان میں ہونے والا یہ 31واں حملہ تھا، یہاں پر خیبر پختونخوا سے حملے ہوتے ہیں، مریم نواز نے سی ٹی ڈی اور پولیس کو ویل ایکوئٹ کیا ہے۔

عظمیٰ بخاری نے دعویٰ کیا کہ حملے میں کالعدم ٹی ٹی پی کے شواہد ملے ہیں، خیبر پختونخوا خود دہشتگردی کا شکار ہے علی امین گنڈاپور نے کبھی امن و امان پر بریفنگ نہیں لی، عجیب اتفاق ہے کبھی پی ٹی آئی والوں پر کوئی تھریٹ الرٹ نہیں آتا، پی ٹی آئی والے طالبان کے بھائی ہیں تب ہی ان کے خلاف کچھ بولتے بھی نہیں۔

ان کا کہنا تھا کہ صحت کی وزارت پر مریم نواز کا زیادہ فوکس ہے، جس طرح ایئرپورٹس پر اعلانات ہوتے اب اسپتالوں میں بھی ہوں گے، جناح اسپتال میں اب ہر مریض کا ڈیجیٹل ریکارڈ موجود ہوگا۔

میئر کراچی مرتضیٰ وہاب کا کہنا ہے کہ گورنر سندھ کامران ٹیسوری کا حال ان کی گھنٹی جیسا ہے۔

میئر کراچی مرتضیٰ وہاب نے گورنر سندھ کامران ٹیسوری پر طنزیہ وار کرتے ہوئے کہا کہ کسی نے ویڈیو شیئر کی کہ گورنر ہاؤس سے بائیک چوری ہوگئی، شہری اسٹاف کے پاس گیا تو بولے پولیس کے پاس چلے جاؤ اب پولیس کے پاس جانا ہے تو گھنٹی کی کیا ضرورت؟

انہوں نے کہا کہ گورنر کے کام خبروں میں رہنے کے لیے ہیں جب ہم ایکشن لینے کا فیصلہ کرتے ہیں تو گورنر صاحب جاتے ہیں کہ کیا ہورہا ہے۔

مرتضیٰ وہاب نے کہا کہ میرا گورنر دلوں کا گورنر ہے، دل سے عزت کرتا ہوں۔

واضح رہے کہ میئر کراچی اور گورنر سندھ کے درمیان ان دنوں بیان بازی جاری ہے اور دونوں ایک دوسرے پر تابڑ توڑ حملے کررہے ہیں۔

میئر کراچی کا کہنا تھا کہ گورنر سندھ کا کام سحری یا افطاری کروانا نہیں اور اس طرح سے قوم اور مفلسی کا مذاق اڑایا جاتا ہے۔

دوسری طرف گورنر سندھ کامران خان ٹیسوری کا ماننا ہے کہ رمضان المبارک میں شہریوں کو افطار کروانا اعزاز ہے اور اس کی تعلیمات دین اسلام نے بھی دی ہیں۔

دونوں جانب سے جواب الجواب کا سلسلہ جاری ہے تو اسی دوران گورنر سندھ نے مفتی اعظم پاکستان تقی عثمانی کو خط لکھ کر میئر کراچی کے حوالے سے فتویٰ مانگ لیا۔

اپنے خط میں انہوں نے دریافت کیا کہ میئر کراچی کھلے عام سحر و افطار کا مذاق اڑا رہے ہیں، اس حوالے سے اسلام نے کیا حکم دیا ہے۔