ملتان : ٹریڈنگ اور سرمایہ کاری کے نام پر 12 ارب کا فراڈ کرنے والے گروہ کو گرفتار کرلیا گیا، ملزمان نے 200 سے زائد افراد سے منافع کے جھوٹے وعدے کیے تھے۔
تفصیلات کے مطابق ایف آئی اے سائبرکرائم ملتان نے ملکی تاریخ کی بڑی کارروائی کرتے ہوئے ٹریڈنگ اور سرمایہ کاری کے نام پر 12 ارب کا فراڈ کرنے والے گروہ کو گرفتار کرلیا۔
ترجمان کا کہنا تھا کہ ملزمان نے 200 سے زائد افراد سے منافع کے جھوٹے وعدے کیے تھے، زاہد نامی ملزم بیرون ملک فرار کی کوشش میں لاہورایئرپورٹ سے گرفتار ہوا۔
ترجمان کا کہنا تھا کہ نشاندہی پرمزید2ملزمان کوماڈل ٹاؤن ملتان سےگرفتار کیا گیا جبکہ ملوث کمپنی کے 12 ڈائریکٹرز کے نام اسٹاپ لسٹ میں ڈال دیے گئے ہیں۔
آسٹریلین کرکٹ ٹیم کے جارح مزاج بلے باز میتھیو شارٹ کے آئی سی سی چیمپئنز ٹرافی 2025 سے باہر ہونے کا امکان ظاہر کیا جارہا ہے۔
آسٹریلیا کا چیمپئنز ٹرافی میں سیمی فائنل انڈیا یا نیوزی لینڈ کے خلاف آئندہ ہفتے ہو گا، آسٹریلیا کے جارح مزاج بلے باز میتھیو شارٹ انجری کا شکار ہونے کے باعث چیمپئنز ٹرافی کے سیمی فائنل سے باہر ہوسکتے ہیں۔
آسٹریلوی بلے باز افغانستان کے خلاف میچ میں گھٹنے کی انجری کا شکار ہوگئے تھے۔
آسٹریلوی کپتان اسٹیو اسمتھ کا کہنا ہے میرا نہیں خیال میتھیو سیمی فائنل کے لیے فٹ ہوں گے، میتھیو مشکل میں ہیں، وہ زیادہ حرکت نہیں کر سکتے تھے، میتھیو کے فٹ ہونے کے لیے وقت زیادتہ نہیں ہے۔
میڈیا رپورٹس میں کہا جا رہا ہے کہ میتھیو فٹ نہ ہوئے تو ان کی جگہ جیک فریزر میکگرک کو شامل کیا جا سکتا ہے۔
دوسری جانب آسٹریلوی کپتان اسٹیو اسمتھ نے افغانستان کے خلاف میچ میں اسپورٹس مین اسپرٹ کا مظاہرہ کیا جس کی ویڈیو سوشل میڈیا پر بھی وائرل ہوگئی۔
لاہور میں کھیلے گئے چیمپئنز ٹرافی کے نویں میچ میں آسٹریلوی وکٹ کیپر جوش انگلس نے امپائر کی جانب سے اوور پکارے جانے سے قبل ہی نور احمد کے کریز چھوڑنے پر انہیں رن آؤٹ کیا۔
ویڈیو میں دیکھا جاسکتا ہے کہ نور احمد ساتھی کھلاڑی عظمت اللہ عمرزئی سے بات کرنے بیچ پچ پر چلے گئے جبکہ امپائر نے اوور نہیں کہا تھا۔
کراچی میں چوری اور لوٹ مار کی وارداتیں مزید بڑھ گئیں، ڈیفنس خیابان سحر میں موٹرسائیکل سوار ملزمان 30 سیکنڈ میں گاڑی چوری کرکے فرار ہوگئے۔
تفصیلات کے مطابق کراچی میں کارلفٹنگ کی وارداتیں رک نہ سکی، کراچی کے علاقے ڈیفنس خیابان سحر میں شہری اپنی قیمتی گاڑی سے محروم ہوگیا، شہری اپنی گاڑی اسلام آباد سے خرید کر کراچی لایا تھا۔
کار چوری کی سی سی ٹی وی فوٹیج سامنےآگئی، فوٹیج میں دیکھا گیا کہ موٹر سائیکل سوار ملزمان گھر کے باہر پارکنگ میں پہنچے، ایک ملزم نے اتر کر سیکنڈوں میں دروازہ کھولا اور گاڑی اسٹارٹ کر کے چلتا بنا۔
سی سی ٹی وی فوٹیجز میں ملزمان کو واضح دیکھا جاسکتا ہے، لیکن پولیس کئی روز بعد بھی ملزمان کا سراغ نا لگا سکی۔
دوسری جانب گوٹھ میں موٹرسائیکل سوار ملزمان نے پیڑول پمپ پر کیشئر سے اسلحے کے زور پر رقم چھین لی، یہ واردات دو روز قبل ہوئی تھی۔
اس کے عالاوہ کراچی کے علاقے سعید آباد مختار گھمن چوک پر بینک سے رقم لیکر نکلنے والا شہری لٹ گیا، مویشیوں کا تاجر بینک سے تین لاکھ روپے لے کر نکلا تھا۔
سابق پاکستانی کرکٹرز نے مطالبہ کیا ہے کہ بابراعظم، رضوان، شاہین آفریدی کو ٹی ٹوئنٹی نہ کھلایا جائے، تینوں کی ٹی 20 ٹیم میں جگہ نہیں بنتی۔
اے آر وائی نیوز کے پروگرام ہرلمحہ پُرجوش میں گفتگو کرتے ہوئے سابق ٹیسٹ کرکٹر باسط علی نے چیمپئنز ٹرافی میں پاکستانی ٹیم کی بدترین کارکردگی پر میزبان وسیم بادامی کے سوال کا جواب دیتے ہوئے کہا کہ ان کھلاڑیوں کو اب آرام تو لازمی دیا جائے گا، کیونکہ انہیں دوبارہ واپس بھی تو لانا ہے۔
باسط علی نے کہا کہ انہیں ایک مضبوط ٹیم کے خلاف نہیں کھلایا جائے گا، تاکہ ان کی آگے جگہ بن جائے، تاکہ نئے لڑکے فیل ہوجائیں، انہوں نے کہا کہ ہم ہی بولیں گے کہ یار بابر کے ساتھ زیادتی ہوئی، شاہین کے ساتھ زیادتی ہوئی ہے، ان کی سوچ کو پکڑا کریں۔
سابق ٹیسٹ کرکٹر نے کہا کہ آپ کو یہ بولنا چاہئے کہ ہم نے ٹی ٹوئنٹی کے لئے آپ کو لینا ہی نہیں ہے، ایسے ہونا چاہئے۔۔ بابر کو، رضوان کو، شاہین کو ان سب کے نام لے کر بولیں، لیکن بولیں گے نہیں کیونکہ واپس بھی تو انہیں ہی لانا ہے۔
انھوں نے کہا کہ ہم 1988 سے سن رہے ہیں کہ طویل مدتی منصوبہ بندی کریں گے، طویل مدتی منصوبہ بندی نہیں دیکھی لیکن پیراشوٹ سے کھلاڑی آتے دیکھے۔
سابق کرکٹر کامران اکمل نے کہا کہ بابر اعظم، محمد رضوان، شاہین آفریدی کو ٹی ٹوئنٹی نہ کھلایا جائے، بابر اعظم، رضوان، شاہین آفریدی کو ٹیسٹ کرکٹ کھلائی جائے۔
کامران اکمل نے کہا کہ بابر، رضوان، شاہین ون ڈے ٹیم میں بڑی ٹیموں کیخلاف آئیں، متبادل کھلاڑی چاہیے تو پی سی بی کو فیصلے لینے پڑیں گے۔
انھوں نے کہا کہ بابر، رضوان، شاہین کو اب ٹی ٹوئنٹی کھیلنے کی ضرورت بھی نہیں، مختلف سیریز میں نئے کھلاڑیوں کو ٹیم میں کھلانا چاہیے، انگلینڈ جوروٹ کو صرف آئی سی سی ایونٹ میں لیکر آتی ہے، پی سی بی کو اب ٹیم میں نئے کھلاڑیوں کو لانا پڑیگا۔
کامران اکمل نے کہا کہ بابراعظم سے بڑے ریکارڈ بنوانے ہیں، ٹیسٹ اور ون ڈے کھلائیں، ہمیں ٹی ٹوئنٹی میں نئے کھلاڑیوں کو کھلانا پڑیگا، ڈومیسٹک کے پرفارمرز کو ٹیم میں لانا چاہیے۔
اسلام آباد: ورلڈ بینک کے پاکستان میں کنٹری ڈائریکٹر ناجی بینہسین نے کہا ہے کہ پاکستان میں معاشی استحکام مضبوط ہوتا جا رہا ہے، آئندہ 10 سال میں پاکستان کے لیے کم از کم 20 ارب ڈالر کی فنڈنگ مختص ہے۔
اپنے بیان میں کنٹری ڈائریکٹر ورلڈ بینک نے کہا کہ یہ معاشی استحکام دس سالہ معاہدے کے لیے مناسب وقت ہے، یہ منصوبہ پاکستان کو 20 ارب ڈالر ترقیاتی قرض دینے پر توجہ مرکوز کرے گا۔
انھوں نے کہا پاکستان کے ساتھ کنٹری پارٹنر شپ فریم ورک کا اعلان گزشتہ ماہ کیا گیا تھا، سال 2026 کے بعد سے یہ فنڈنگ کلین انرجی اور کلائمیٹ رزیلینس کے لیے دی جائے گی۔
ناجی بینہسین کا کہنا تھا کہ یہ ورلڈ بینک اور پاکستان کے درمیان شراکت داری کا اہم لمحہ ہے، اس وقت پاکستان استحکام کی جانب گامزن ہے، پاکستان میں طویل مدتی ترقی کے لیے نئے مقاصد اور منصوبے ہیں، جو عالمی بینک کی ترجیحات سے بالکل ہم آہنگ ہیں۔
انھوں نے کہا اس منصوبے کے تحت پاکستان میں سالانہ کم از کم 2 ارب ڈالر کی فراہمی ممکن ہو سکے گی، عالمی بینک کی جانب سے آئندہ 10 سال کے دوران غربت میں کمی، سماجی تحفظ، ماحولیات اثرات کے نقصانات کم کرنے والے پراجیکٹس کے لیے فنڈنگ دستیاب ہوگی۔
نوشہرہ : دارالعلوم حقانیہ اکوڑہ خٹک میں خودکش دھماکے کے عینی شاہد کی آنکھوں دیکھا حال بتاتے ہوئے کہا خودکش حملہ آور نےمولانا سے ہاتھ ملایا اور دھماکہ ہوگیا۔
تفصیلات کے مطابق نوشہرہ میں دارالعلوم حقانیہ اکوڑہ خٹک میں خودکش دھماکے میں جے یوآئی س اور دفاع پاکستان کونسل کے سربراہ مولانا حامد الحق سمیت 4 افراد شہید ہوگئے۔
دھماکے کے عینی شاہد نے بتایا کہ نماز جمعہ کی ادائیگی کے بعد مولانا حامد الحق مسجد سے نکلنے لگے تو دروازے پر کھڑا لڑکا ان سے ہاتھ ملانے آگے بڑھا اور خود کو اڑالیا۔
دارالعلوم حقانیہ میں داخلے کے لیے4 دروازے ہیں، پولیس کا کہنا ہے کہ حملہ آور مولانا حامد الحق کے لیے مخصوص دروازے سے اندر آیا۔
حملے کے بعد سیکیورٹی اداروں نے علاقے کو گھیرے میں لیکر سرچ آپریشن کیا جبکہ بم ڈسپوزل یونٹ اور پولیس کی ٹیموں نے شواہد اکٹھے کرلیے۔
سی سی ٹی وی فوٹیج بھی حاصل کرلی گئی ہیں اور خود کش بمبار کے اعضا فرانزک کے لیے بھجوا دیئے گئے ۔
کراچی: شہر قائد میں بینک سے رقم لے کر نکلنے والا ایک اور بیوپاری لٹ گیا، ڈاکوؤں کی فوٹیج بھی سامنے آئی ہے۔
تفصیلات کے مطابق کراچی کے علاقے سعید آباد مختار گھمن چوک پر بینک سے رقم لے کر نکلنے والے شہری کو لوٹ لیا گیا، متاثرہ شہری کی جانب سے درخواست اور واردات کی سی سی ٹی وی فوٹیج پولیس کو موصول ہو گئی ہے۔
درخواست گزار محمد سعید نے کہا ’’میں گلشن غازی بلاک اے میں رہتا ہوں اور مویشیوں کی خرید و فروخت کا کام کرتا ہوں، بینک سے 3 لاکھ روپے کیش لے کر نکلا تھا، لٹیروں نے لوٹ لیا۔‘‘
درخواست گزار کے مطابق 2 موٹر سائیکل سوار آئے اور تلاشی لینا شروع کر دی، لٹیرے اسلحے کے زور پر 3 لاکھ 2 ہزار روپے لے کر فرار ہو گئے۔ محمد سعید نے درخواست کی ملزمان کو گرفتار کر کے اس کی رقم واپس دلوائی جائے۔
واضح رہے کہ سعید آباد تھانے کے علاقے مواچھ گوٹھ کے مین اسٹاپ کے قریب واقع پٹرول پمپ پر 2 روز قبل ڈکیتی کی واردات ہوئی ہے، جس کا مقدمہ پمپ کی انتظامیہ نے درج کرانے سے انکار کر دیا ہے۔ کراچی میں پٹرول پمپوں پر ڈکیتی کی وارداتیں عام ہو چکی ہیں، رقم چھیننے والے لٹیرے دیدہ دلیری سے واردات کر کے فرار ہو جاتے ہیں، شہری اور تاجر خود کو غیر محفوظ تصور کرنے لگے ہیں۔ شہر قائد میں بینک سے رقوم لے کر نکلنے والے شہری بھی مسلسل لٹیروں کے نشانے پر ہیں۔
بھارت میں حیدرآباد شہر کے مضافاتی علاقہ پوپال گوڑہ میں ایک اپارٹمنٹ کی گراؤنڈ فلور پر واقع گروسری شاپ میں شارٹ سرکٹ کے باعث اچانک خوفناک آگ بھڑک اُٹھی، جس نے گھر کو بھی اپنی لپیٹ میں لے لیا، جس کی ویڈیو بھی سوشل میڈیا پر گردش کررہی ہے۔
بھارتی میڈیا رپورٹس کے مطابق دکان میں لگی آگ قریب ہی کھڑی گاڑیوں تک پھیل گئی اور عمارت کی پہلی منزل تک پہنچ گئی۔ اس دوران پہلی منزل پر موجود ایک فلیٹ میں موجود دو سلنڈرآگ کے باعث پھٹ گئے۔
رپورٹس کے مطابق آگ کے باعث جمیلا خاتون، شاہنہ خاتون، سال اور سجرہ خاتون گھر میں پھنس گئی تھیں۔ انہیں وہاں سے نکال کر اسپتال منتقل کیا گیا مگر وہ جانبر نہ ہوسکیں۔
فائر بریگیڈ کی ٹیم آگ لگنے کی اطلاع ملتے ہی فوراً مقام واقعہ پر پہنچی اور بھڑکتی ہوئی آگ پر قابو پایا۔
اس سے قبل بھی بھارت کی ریاست تلنگانہ کے ضلع نظام آباد کے رنجل منڈل میں دلخراش واقعہ رونما ہوا، جہاں ایک ہی خاندان کے تین افراد کرنٹ لگنے سے جان کی بازی ہار گئے۔
ساٹاپور گاؤں سے تعلق رکھنے والے گنگا رام اس کی اہلیہ بالا منی اور بیٹا کشن جنگلی جانوروں کو پکڑنے کے لیے جنگل گئے تھے، اسی دوران کھیتوں کے قریب کرنٹ کی تار سے چھو جانے کے سبب تینوں موقع پر ہی اپنی جان گنوا بیٹھے۔
پولیس واقعہ کی اطلاع ملتے ہی موقع پر پہنچ گئی نعشوں کو پوسٹ مارٹم کے لیے بودھن اسپتال منتقل کردیا گیا اور تحقیقات شروع کردی گئی ہیں۔
ابتدائی تحقیقات میں معلوم ہوا ہے کہ پیگڑا پلی کے مضافات میں کھیتوں کے قریب یہ برقی تار لگائے گئے تھے۔ تاہم پولیس مزید تفصیلات اکٹھی کر رہی ہے اور حادثے کے اصل حقائق جاننے کی کوشش کررہی ہے۔
بھارتی فلم انڈسٹری کے ورسٹائل اداکار گووندا کی اہلیہ سنیتا آہوجا نے طلاق کی افواہوں پر خاموشی توڑ دی۔
بھارتی میڈیا کے مطابق گزشتہ دنوں یہ خبر زیر گردش تھی کہ گووندا اور سنیتا کے درمیان 38 سال بعد طلاق ہوگئی، جس کے لیے سنیتا نے چند ماہ قبل علیحدگی کا نوٹس بھیجا تھا۔
خبروں میں کہا جا رہا تھا کہ گوندا کی جانب سے طلاق کے نوٹس کا کوئی جواب نہیں دیا گیا تھا اور جوڑا علیحدہ علیحدہ گھر میں رہ رہے ہیں، ان افواہوں پر گووندا کے خاندان کی جانب سے ان کے بھانجے کرشنا اور بھانجی آرتی سامنے آئیں اور دونوں نے ان خبروں کو جھوٹ قرار دیا۔
گووندا کی منیجر نے اس خبر پر جاری بیان میں کہا تھا کہ وہ اس بات سے آگاہ ہیں کہ سنیتا جی نے طلاق کا نوٹس بھیجا ہے لیکن اس پر کوئی پیشرفت نہیں ہوئی ہے۔
تاہم اب گووندا کی اہلیہ سنیتا آہوجا کی جانب سے بھی ویڈیو ردعمل سامنے آیا ہے، جس میں انہوں نے کہا کہ الگ الگ رہتے ہیں اس کی وجہ یہ ہے کہ جب گوندا نے سیاست میں شمولیت اختیار کی تو اس وقت میری بیٹی جوان ہورہی تھی۔
سنیتا آہوجا کا کہنا تھا کہ اس دوارن گھر میں مختلف سیاسی شخصیات کا آنا جانا شروع ہوگیا، تو ان سب کے سامنے اس طرح گھومنا اچھا نہیں لگتا تھا، اس لیے ہم نے گھر کے سامنے ہی آفس لے لیا۔
سنیتا آہوجا نے اپنی بات جاری رکھتے ہوئے کہا کہ مجھے اور گووندا کو اس دنیا میں کوئی الگ نہیں کرسکتا، اگر کوئی مائی کا لعل ہے تو اسے سامنے آنا چاہیے۔
