چمن : پاکستان اور افغانستان کے تاجروں کے درمیان ہونے والے اجلاس میں اہم پیشرفت سامنے آئی ہے جس میں دونوں ممالک کے درمیان تجارتی تعلقات کو فروغ دینے کے عزم کا اعادہ کیا گیا۔
تفصیلات کے مطابق چمن میں ہونے والے پاک افغان جوائنٹ چیمبر آف کامرس کے اجلاس کا اعلامیہ جاری کردیا گیا ہے۔
اعلامیہ میں کہا گیا ہے کہ پاکستان اور افغانستان کا مستقبل ایک دوسرے سے وابستہ ہے، بلوچستان میں چمن بارڈر دونوں ممالک کیلئے سب سے زیادہ فعال تجارتی سرحد ہے۔
اجلاس میں کاروباری مسائل کا مشاہدہ کرنے کیلئے سرحدی کراسنگ پر ان سیشنز کو سراہا گیا اور دونوں اطراف سے اقتصادی تعلقات کے مسائل پر بات چیت کی گئی۔
اعلامیہ کے مطابق اجلاس میں لیبر چارجز، افغان سائیڈ پر سامان کی لوڈنگ کا معاملہ زیرغور آیا اور ہینڈلنگ،ٹرانزٹ گڈز ٹیکس، خالی کنٹینرز کی کلیئرنس کی سست شرح پر بحث ہوئی۔
اس کے علاوہ کلیئرنس، بارڈرکراسنگ، ویزا پراسیسنگ میں تاخیر کا معاملہ بھی زیربحث آیا، اجلاس میں کہا گیا کہ افغان سائیڈ پر قوانین میں ترمیم کی ضرورت ہے۔
پاک افغان جوائنٹ چیمبر آف کامرس کے اجلاس میں افغان تاجروں نےیقین دہانی کرائی کہ پاکستان کسٹمز اور کابل ہم منصب میں بات چیت جاری ہے۔
