کراچی : پاکستان آرمی کے زیرانتظام ملک بھر کی طرح سندھ میں بھی آرمی پبلک اسکول اینڈ کالج سسٹم (اے پی ایس اے سی ایس) کے تحت معیاری تعلیم کی فراہمی کا سلسلہ جاری ہے۔
پاکستان کی ترقی کا راستہ تعلیم سے منسلک ہے، آرمی ماڈل اسکولز ملک بھر اورخصوصاً سندھ میں اہم کردار ادا کررہے ہیں، تعلیم سے محروم بچوں اور نوجوانوں کیلئے پاکستان آرمی اس شعبے میں بھی برسرپیکار ہے۔
سندھ بھرمیں پاکستان آرمی نے پرائمری اور سیکنڈری تعلیم کیلئے اسکولوں کا سلسلہ شروع کیا ہوا ہے، اس حوالے سے صوبہ سندھ کے آرمی ماڈل اسکولز اپنی مثال آپ ہیں۔
حیدرآباد، مٹھی، ننگرپارکر، گولارچی، ٹھٹھہ، سیہون اور دادو میں جدید اسکولز تعمیر کیے گئے ہیں، یہ تمام اسکولز جدید تعلیمی سہولیات سے مزین ہیں، انہیں آرمی پبلک اسکولز کی طرز پر چلایا جارہا ہے۔
آرمی ماڈل اسکولز کا مشن سندھ کے دور دراز علاقوں میں معیاری تعلیم کو یقینی بنانا ہے اس وقت ان اسکولزمیں3800سے زائد طلبا زیر تعلیم ہیں، انگریزی کے علاوہ سائنس کے مضامین بھی ان اسکولز میں پڑھائے جاتے ہیں۔
ان اسکولزمیں ہاسٹل کی سہولیات بھی موجود ہیں، جہاں طلباء کی بڑی تعداد رہائش پذیرہے بچوں کی ذہنی نشونما کیلئےکھیل کے میدان بھی موجود ہیں، یہاں پڑھنے والے طلبا کے والدین معیار تعلیم اور سہولیات سے مکمل مطمئن ہیں۔
