آزادکشمیر میں لیفٹیننٹ کرنل ظہیرعباس کے شہید بیٹے7 سالہ ارتضیٰ عباس کی نمازجنازہ ادا کر دی گئی۔ ارتضیٰ عباس آزادکشمیر کے علاقے دوا رانڈی میں بھارتی اشتعال انگیزی میں شہید ہوئے تھے۔
نمازجنازہ میں صدرآصف زرداری، وزیراعظم شہبازشریف، وفاقی وزرا، آرمی چیف جنرل عاصم منیر، نیول چیف ایڈمرل نویداشرف نے شرکت کی جب کہ حاضرسروس و ریٹائرڈ فوجی افسران، سرکاری حکام اور شہیدکےاہل خانہ بھی شریک ہوئے۔
قومی سلامتی کمیٹی نے مسلح افواج کو بھارت کیخلاف جوابی کارروائی کا اختیار دے دیا
وزیراعظم نے کہا کہ شہریوں، بچوں، خواتین کو نشانہ بنانا بھارتی حکومت کے متکبرانہ رویے کی عکاسی ہے بھارتی اقدامات نہ صرف علاقائی بلکہ عالمی امن کےلیے بھی خطرہ ہیں، افواج پاکستان بھارتی جارحیت کا ہر محاذ پر جرات مندانہ جواب دےرہی ہیں۔
صدر مملکت آصف زرداری نے کہا کہ عالمی قوانین اور انسانی اقدارکی خلاف ورزیاں ناقابل برداشت ہیں۔
صدر آصف زرداری اور وزیراعظم شہبازشریف نے اس عزم کا اعادہ کیا کہ بھارت کو سخت جواب دیا جائے گا۔ صدر اور وزیراعظم نے شہدا کے درجات کی بلندی اور پسماندگان کیلئے صبر کی دعا کی۔
