اسلام آباد: سربراہ پاک فضائیہ ایئر چیف مارشل ظہیر احمد بابر سدھو کا کہنا ہے کہ پاکستان امریکا سے سفارتی، اقتصادی، دفاعی تعلقات کو قدر کی نگاہ سے دیکھتا ہے۔
اے آر وائی نیوز کے مطابق سربراہ پاک فضائیہ سے کمانڈر امریکی ایئرفورسز سینٹرل کمانڈ کی ملاقات ہوئی جس میں علاقائی سلامتی کی صوت حال، دو طرفہ دفاعی تعاون بڑھانے پر گفتگو کی گئی۔
ترجمان پاک فضائیہ کا کہنا ہے کہ معزز مہمان کی پاک فضائیہ کی خود انحصاری کے میدان میں غیر معمولی پیش رفت کی تعریف کی گئی جبکہ امریکی ایئرفورسز سینٹرل کمانڈ کی علاقائی امن کے فروغ میں ملکی کوششوں کی تعریف کی۔
ترجمان پاک فضائیہ کا کہنا ہے کہ معزز مہمان نے مختلف شعبوں میں تعاون بڑھانے کے عزم کا اعادہ کیا ہے جبکہ سیلاب سے جانی نقصان پر پاکستان کی عوام سے دلی تعزیت کی گئی۔
انہوں نے کہا کہ معزز مہمان نے سیلاب زدگان کی امداد، بحالی میں پاک فضائیہ کی کوششوں کو سراہا جبکہ ایئر چیف نے سیکیورٹی چیلنجز سے نمٹنے کے لیے فضائیہ کو جدید خطوط پر استوار کرنے کے وژن کا ذکر کیا۔
ترجمان پاک فضائیہ کے مطابق ملاقات میں تربیت، آپریشنل شعبوں سمیت دو طرفہ عسکری تعلقات کو مزید بہتر بنانے پر اتفاق کیا گیا۔
ایئر چیف مارشل نے کہا کہ تعلقات علاقائی امن، سلامتی اور استحکام سے متعلق تمام امور میں ہم آہنگی پر مبنی ہیں، پاکستان امریکا سے سفارتی، اقتصادی، دفاعی تعلقات کو قدر کی نگاہ سے دیکھتا ہے۔
