پاکستان اور چین کی بحری افواج کی بحری مشق سی گارڈئینز 2023 کا آغاز ہو گیا، اس بار سی گارڈئینز کا محور بحری خطرات سے نمٹنے کے لئے مشترکہ حکمت عملی پر ہو گا۔
تفصیلات کے مطابق پاک بحریہ اور چین کی پیپلز لبریشن آرمی نیوی کی حربی مشق سی گارڈئینز 2023 شروع ہوگئی، دفاعی ذرائع نے بتایا کہ سی گارڈئینز سلسلے کی تیسری مشق شمالی بحیرہ عرب میں منعقد کی جا رہی ہیں، اس بار سی گارڈئینز کا محور بحری خطرات سے نمٹنے کے لئے مشترکہ حکمت عملی پر ہو گا۔
سی گارڈئینز 23 کی سب سے خاص بات چینی بحریہ کی سونگ کلاس یا ٹائپ 039 سب میرین کی شرکت ہے، عام طور پر کسی دوسرے ملک کے ساتھ بحری مشق میں آبدوز حصہ نہیں لیتی لیکن چینی آبدوز کا پاکستان نیوی کے ساتھ بحری مشق میں حصہ لینا اس بات کا عکاس ہے کہ دونوں ملک اپنی اسٹرٹیجک شراکت داری اور روایتی دوستانہ تعلقات کو مزید فروغ دے رہے ہیں۔
پاکستان اور چین کے درمیان حربی تربیت کو بھی فروغ دیا جا رہا ہے، سی گارڈئِنز مشقوں کا آغاز 2020 میں ہوا تھا، پہلی سی گارڈئِنز مشق بحیرہ عرب جبکہ دوسری جولائی 2022 میں شنگھائی کے قریب منعقد کی گئی۔
رواں برس پاکستان اور چین کی فضائی افواج نے بھی شاہین 10 جنگی مشقیں منعقد کی تھی۔
