اسلام آباد : پاکستان نے آئی ایم ایف سے مزید چھ ارب ڈالر کا نیا قرض پروگرام حاصل کرنے کی تیاری کرلی، نئے قرض پروگرام کے تحت بجلی، گیس مزید مہنگی کی جائے گی۔
تفصیلات کے مطابق وزارت خزانہ نے آئی ایم ایف سے مزید چھ ارب ڈالر کا نیا قرض پروگرام حاصل کرنے کی تیاری کرلی۔
ذرائع نے بتایا کہ نیا پروگرام تین سال کے لیے ہو گا اور اس کا نام ایکسٹینڈڈ فنڈ فیسلیٹی پروگرام ہو گا، آئی ایم ایف کے ساتھ نئے قرض پروگرام کیلئے مذاکرات دوسرے اقتصادی جائزہ کے ساتھ ہوں گے۔
وزارت خزانہ ذرائع کا کہنا تھا کہ نئے قرض پروگرام کے تحت بجلی، گیس مزید مہنگی کی جائے گی اور مختلف شعبوں کو دی جانے والی سبسڈی کا بتدریج خاتمہ کیا جائے گا۔
ذرائع کے مطابق ٹیکسوں کی مد میں مختلف شعبوں کو دیا جانے والا استثنیٰ بھی ختم کیا جائے گا اور تمام یقین دہانیاں بجٹ میں تحریری طورپر کرائی جائیں گی۔
