لاہور: پاکستان جونئیر لیگ کے میچز فیصلہ کن مرحلے میں داخل ہو گئے ہیں۔
پی جے ایل کے پہلے الیمینیٹر میں مردان واریئرز نے راولپنڈی ریڈرز کو 6 وکٹوں سے شکست دے کر ٹورنامنٹ سے باہر کر دیا ہے، جب کہ آج کوالیفائر کی شکست خوردہ بہاولپور رائلز کوالیفائر ٹو میں مردان واریئرز سے پنجہ آزمائی کرے گی۔
قذافی اسٹیڈیم لاہور میں پاکستان جونیئر لیگ کے سنسنی خیر میچز جاری ہیں، پی جے ایل کے پہلے الیمینیٹر میں راولپنڈی ریڈرز نے ٹاس جیت کر پہلے بیٹنگ کا فیصلہ کیا، جو سود مند ثابت نہ ہو سکا، مردان واریئرز کی شان دار باؤلنگ کے سامنے راولپنڈی ریڈرز کی ٹیم 19.3 اوورز میں 121 رنز پر آل آؤٹ ہو گئی۔
راولپنڈی کے حبیب اللہ کے علاوہ کوئی کھلاڑی خاطر خواہ کارکردگی کا مظاہرہ نہ کر سکا، حبیب اللہ 51 گیندوں پر 6 چوکوں اور 2 چھکوں کی مدد سے 65 رنز بنا کر نمایاں رہے، جب کہ ان کے علاوہ صرف تین بیٹر ڈبل فگرز میں داخل ہو سکے، علی اسحاق نے 14، ہارون ارشد نے 13 جب کہ وہاب ریاض 11 رنز بنا کر آوٹ ہوئے۔
Shahzaib Khan is a treat to watch! #Next11 l #PJL I #RRvMW pic.twitter.com/myUk12EIfI
— Pakistan Junior League (@ThePJLofficial) October 19, 2022
مردان واریئرز کی جانب سے عابداللہ نے بہترین باؤلنگ کا مظاہرہ کرتے ہوئے 17 رنز کے عوض 3 کھلاڑیوں کو پولین کی راہ دکھائی، آرچی لینہم، محمد نبیل اور محمد عرفان نے بالترتیب 20، 25 اور 39 رنز کے عوض 2،2 وکیٹں حاصل کیں۔
دوسری جانب مردان واریئرز نے مطلوبہ ہدف کے تعاقب میں جارحانہ اننگرز کھیلتے ہوئے 18.4 اوورز میں 4 وکٹوں کے نقصان پر ہدف پورا کر کے راولپنڈی ریڈرز کا آگے کا سفر ختم کر دیا، شاہ زیب خان 32 گیندوں میں 4 چوکوں اور 1 چھکے کی مدد سے 35 رنز بنا کر نمایاں رہے، محمد فاروق 32 اسکور بنا کر آؤٹ ہوئے، اولی کاکس 21 اور حسیب خان 12 رنز بنا کر ناٹ آؤٹ رہے۔
راولپنڈی ریڈرز کے عامر حسن، عفنان خان اور حسن عیسیٰ خیل نے ایک ایک کھلاڑیوں کو آؤٹ کیا، مردان واریئرز کے عابداللہ کو 17 رنز کے عوض 3 وکیٹں حاصل کرنے پر پلیئر آف دی میچ قرار دیا گیا۔
آج پاکستان جونئیر لیگ میں دوسرا کوالیفائر میچ بہاولپور رائلز اور مردان واریئرز کے مابین شام 6 بجے کھلا جائے گا۔
