اسلام آباد : متحدہ عرب امارات کے بعد سعودی عرب کی جانب سے پاکستان کوایک ارب ڈالرکی آخری قسط موصول ہوگئی ، سعودی رقم ملنے کے بعد زرمبادلہ کے ذخائر کا مجموعی حجم پندرہ ارب پچیس کروڑ ڈالر ہوگیا ہے۔
تفصیلات کے مطابق پاکستانی معیشت کو سنبھالا دینے کے لیے سعودی عرب کی جانب سےپاکستان کوایک ارب ڈالرکی آخری قسط بھی موصول ہوگئی ، سعودی رقم ملنے کے بعد اسٹیٹ بینک کے زرمبادلہ کے ذخائر کاحجم آٹھ ارب چھیاسی کروڑ ڈالر جبکہ زرمبادلہ کے ذخائر کا مجموعی حجم پندرہ ارب پچیس کروڑ ڈالر ہوگیا ہے۔
اسٹیٹ بینک کا کہنا ہے کہ سعودی عرب سےمجموعی طورتین ارب ڈالرمل گئے ہیں سعودی رقم پر پاکستان کو تین فیصد سالانہ منافع دینا ہوگا، رقم سعودی عرب کے جانب سے دئیے گئے پیکج کا حصہ ہے پیکج میں سرمایہ کاری اور موخر ادائیگوں پر تیل کی سہولت بھی شامل ہے۔
گذشتہ روز دوست ملک یوای اے کی جانب پاکستان کو ایک ارب ڈالر ملے تھے ، اسٹیٹ بینک کے ترجمان کا کہنا تھا تین ارب ڈالر میں سے ایک ارب ڈالر کی پہلی قسط مل گئی، باقی دوارب ڈالربھی جلد پاکستان کوحاصل ہوجائیں گے۔
ترجمان کا مزید کہنا تھا کہ یہ رقم زرمبادلہ ذخائر میں مسلسل کمی کو روکنے کیلئے دی گئی ہے، یہ رقم امداد نہیں بلکہ سرمایہ کاری ہے، اس پرسالانہ تین فیصد منافع دینا ہوگا۔
مزید پڑھیں : یواے ای سے اسٹیٹ بینک کو1 ارب ڈالر مالی تعاون کی پہلی قسط مل گئی
خیال رہے یو اے ای پاکستان کو تین ارب ڈالر مالیت کا خام تیل موخر ادائیگیوں پردے گا اور مختلف منصوبوں میں سرمایہ کاری بھی کرےگا۔
واضح رہے 23 اکتوبر 2018 کو وزیرِ اعظم عمران خان کے دورے کے موقع پر سعودی عرب کی جانب سے 12 ارب ڈالر کے امدادی پیکج کا وعدہ کیا گیا تھا، دونوں ممالک کے مابین اس بات پر بھی اتفاق کیا گیا تھا کہ تاخیر سے ادائیگی کی بنیاد پر سعودی عرب پاکستان کو سالانہ 3 ارب ڈالر مالیت کا تیل دے گا اور یہ سلسلہ 3 سال تک جاری رہے گا۔
مزید پڑھیں : سعودی عرب اور یواےای نے پاکستان میں اربوں ڈالرسرمایہ کاری کی پیشکش کردی، امریکی اخبار کا دعویٰ
تین ارب ڈالر نقد میں سے دو ارب ڈالر پاکستان کو موصول ہوچکے تھے ، پہلی قسط 19نومبر اور دوسری قسط 14 دسمبر کو منتقل ہوئی تھی۔
چند روز قبل مریکی اخبار نے دعویٰ کیا تھا کہ سعودی عرب اور یواے ای نے پاکستان میں اربوں ڈالرسرمایہ کاری کی پیشکش کی ہے ، دوست خلیجی ممالک 30 ارب ڈالر کے قرضے اور سرمایہ کاری کے لئے تیار ہے ، سعودی ولی عہد معاہدوں پر دستخط کیلئے فروری میں پاکستان آئیں گے۔
