پاکستان نے بھارتی قیادت کے بے بنیاد پروپیگنڈے کو مسترد کرتے ہوئے کہا ہے کہ الزامات کا مقصد انسداد دہشتگردی پر مثبت کارروائی کو گمراہ کرنا ہے۔
اے آر وائی نیوز کے مطابق ترجمان دفتر خارجہ نے کہا ہے کہ نام نہاد دہشتگردوں کی مالی مدد پر بھارتی قیادت کے بیانات کو مسترد کرتے ہیں۔ بھارت کالعدم تنظیموں کی مالی معاونت کے مبینہ الزامات عائد کرتا رہتا ہے۔ ان الزامات کا مقصد انسداد دہشتگردی پر مثبت کارروائی کو گمراہ کرنا ہے۔
ترجمان دفتر خارجہ ممتاز زہرا بلوچ نے مزید کہا کہ بھارت کی کھوکھلی بیان بازی پاکستان کے کامیاب اقدامات کے سامنے ناکام ہو چکی ہے۔ انسداد دہشتگردی، منی لانڈرنگ، فیٹف کے ادارے بھی پاکستان کی کاوشوں کا اعتراف کر چکے ہیں۔
انہوں نے کہا کہ بھارت کا پاکستان کے اندر دہشگردی میں ملوث ہونا ایک حقیقت ہے۔ نومبر2020 میں پاکستان نے بھارت کے دہشتگردی میں ملوث ہونے پر ڈوزیئر دیا تھا۔ کلبھوشن یادیو بھارت کا دہشتگردی میں ملوث ہونے کا واضح ثبوت ہے۔ افغانستان میں پاکستان مخالف عناصر کے ساتھ بھارت کے رابطے سب کے سامنے ہیں
ترجمان دفتر خارجہ کا کہنا تھا کہ مقبوضہ کشمیر میں بھارت ظلم و بربریت جاری رکھے ہوئے ہے۔ کشمیر میں بھارت کی ریاستی دہشتگردی کا کوئی جواز نہیں ہے۔
