تیل و گیس کی تلاش، روسی کمپنی کا پاکستان میں سرمایہ کاری کا اعلان، معاہدہ طے -
The news is by your side.

Advertisement

تیل و گیس کی تلاش، روسی کمپنی کا پاکستان میں سرمایہ کاری کا اعلان، معاہدہ طے

اسلام آباد: روسی کی کمپنی نے پاکستان میں تیل و گیس کے شعبے میں سرمایہ کاری کا اعلان کرتے ہوئے معاہدہ دستخط کردیے۔

تفصیلات کے مطابق روسی کمپنی کے وفد نے وفاقی وزیرپیٹرولیم غلام سرور خان اور پیٹرولیم ڈویژن کے حکام سے ملاقات کی جس میں دونوں ممالک کے درمیان تیل و گیس کی تلاش اور پیداوار بڑھانے سے متعلق امور زیر بحث آئے۔

اس موقع پر روسی وفد میں شامل گازپروم کمپنی کے سربراہ ویٹیلی اے مرکالوف اور انٹر اسٹیٹ گیس سسٹم پاکستان کے مینیجنگ ڈائریکٹر مبین صولت نے انٹر کارپوریٹ ایگریمنٹ پر دستخط کیے۔

معاہدے کے تحت روسی کمپنی گازپروم پاکستان میں ماورائے ساحل تیل و گیس کی تلاش و پیداوار کے شعبے میں سرمایہ کاری کرے گی ۔ اس موقع پر وفاقی وزیر پٹرولیم و قدرتی وسائل غلام سرور خان کا کہنا تھا کہ روسی کمپنی کی سرمایہ کاری کو خوش آئندہ قرار دیتے ہوئے کہا کہ معاہدے سے دونوں ممالک کے باہمی تعاون کو مزید فروغ ملے گا۔

مزید پڑھیں: بلوچستان کے تیل اور گیس کے ذخائر ملک کی تقدیر بدل سکتے ہیں: دارو خان اچکزئی

وفاقی وزیر پیٹرولیم کا کہنا تھا کہ انٹراسٹیٹ گیس سسٹم اورگازپروم کمپنی میں معاہدہ طےپاگیا جس کے تحت روسی کمپنی  پاکستان میں10ارب ڈالر کی سرمایہ کاری کرے گی، معاہدہ پاکستان اور روس کے باہمی تعاون کی روشن مثال ہے۔

وزارتِ پیٹرولیم کی جانب سے جاری اعلامیے کے مطابق معاہدے کے تحت روسی کمپنی مشرق وسطیٰ سے گیس مالیکیولز پائپ لائن کے ذریعے پاکستان لائے گی جس کے بعد انہیں دیگر ایشیائی ممالک تک رسائی دی جاسکتی ہے۔

اعلامیے کے مطابق روسی کمپنی پاکستان میں گیس کی زیرزمین اسٹوریج سے متعلق سہولیات کی فراہمی میں بھی دلچسپی رکھتی ہے، پٹرولیم ڈویژن کے شعبہ تعلقات عامہ کے مطابق اس معاہدے کے تحت روس پاکستان کو روزانہ 500 ملین سے ایک بلین کیوبک فٹ گیس فراہم کرے گاجو سمندری راستے سے پاکستان پہنچائی جائے گی۔پیٹرولیم ڈویژن اعلامیے میں بتایا گیا ہے کہ پائپ لائن کی تعمیر آئندہ 3 سے 4 سال کے دوران مکمل کر لی جائے گی۔

یہ بھی پڑھیں: سمندری حدود میں تیل اورگیس کی تلاش میں ڈرلنگ کا آغاز

روسی وفد نے منصوبے کی تکمیل میں بھرپور تعاون اور معاونت فراہم کرنے پر وفاقی وزیر پیٹرولیم غلام سرور خان کا شکریہ ادا کرتے ہوئےکہا کہ روس پاکستان کے انرجی سیکٹر میں تعاون جاری رکھے گا جبکہ وفد کے سربراہ ویٹیلی اے مرکالوف نے وفاقی وزیر پیٹرولیم کو روس کا دورہ کرنے کی دعوت بھی دی جسے انہوں نے قبول کرلیا۔

معاہدے پر روسی کمپنی کے سربراہ اور انٹراسٹیٹ گیس سسٹم پاکستان کے مینیجنگ ڈائریکٹر نے دستخط کیے۔

Comments

comments

یہ بھی پڑھیں