پاکستان کی ویمن فٹبال ٹیم کی کپتان مائرہ خان کے سعودی فٹبال ٹیم کے خلاف شاندار گول کے چرچے ہر جگہ ہو رہے ہیں۔
پاکستان اور سعودی عرب کی فٹبال ٹیموں کے درمیان کھیلے گئے فٹبال میچ میں سعودی عرب کو ایک صفر کی سبقت حاصل تھی کہ اسی دوران کھیل کے آخری لمحات میں پاکستان کو ایک فری کک مل گئی۔
پاکستان ویمن فٹبال ٹیم کی کپتان مائرہ خان نے فری کک پر شاندار ہٹ لگائی جو سعودی ویمن فٹبال ٹیم کی گول کیپر ہاتھوں کو چھوتی ہوئی گول کے اندر چلی گئی اور اس طرح میچ ایک ایک گول سے برابر ہو گیا۔
گراؤنڈ میں موجود کمنٹیٹرز اور تماشائی بھی شاندار گول کرنے پر مائرہ خان کو داد دیے بغیر نہ رہ سکے اور قومی ویمن فٹبال ٹیم کی کپتان کو میچ کا بہترین کھلاڑی بھی قرار دیا گیا۔
https://twitter.com/FootballPak/status/1616171153764007945?s=20&t=y-HHoyZjxTllZmn1GRxIWw
دوسری جانب سعودی عرب میں 4 ملکی ٹورنامنٹ میں شرکت کے بعد آج وطن واپس پہنچ گئی، جہاں ان کا پاکستان فٹبال ہاؤس میں نارملائزیشن کمیٹی کے چیئرمین ہارون ملک اور دیگر ارکان نے شاندار استقبال کیا۔
اس موقع پر نارملائزیشن کمیٹی کے چیئرمین ہارون ملک کا کہنا تھا کہ ٹیم نے بہتر کارکردگی کا مظاہرہ کیا۔ چارملکی ٹورنامنٹ کیلئے منتخب اسکواڈ میں تجربہ کار پلیئرز کے ساتھ نئے ٹیلنٹ کو بھی شامل کیا گیا تھا۔
واضح رہے کہ سعودی عرب میں 4 ملکی ٹورنامنٹ میں ٹیم کی قیادت مائرہ خان نے ہی کی تھی
