اسلام آباد: سعودی عرب کی جیلوں میں قید پاکستانیوں کا وطن واپسی کا سلسلہ شروع ہوگیا، پانچ پاکستانی شہری رہائی ملنے کے بعد لاہور پہنچ گئے۔
تفصیلات کے مطابق سعودی جیلوں سے رہائی کے بعد پانچ پاکستانی نجی پرواز پر جدہ سے لاہور پہنچ گئے، دیگر شہری بھی وطن لوٹیں گے۔
ایف آئی اے امیگریشن کی جانچ پڑتال کے بعد مسافروں کو گھر جانے کی اجازت دے دی گئی، سعودی عرب کی جیلوں سے رہا افراد نے لاہور ایئرپورٹ پر سجدہ شکر ادا کیا۔
پانچوں پاکستانی وطن واپسی پر آبدیدہ ہوگئے، وزیر اعظم عمران خان کے آواز بلند کرنے کا خیر مقدم بھی کیا۔
دو روز قبل وزیرِ اعظم عمران خان کی درخواست پر سعودی ولیٔ عہد محمد بن سلمان نے سعودی عرب کی مختلف جیلوں میں قید 2107 پاکستانیوں کی فوری رہائی کا حکم دیا تھا۔
سعودی جیلوں سے پاکستانیوں کی رہائی، جدہ جیل کی ویڈیو وائرل
بعد ازاں سعودی جیلوں سے پاکستانیوں کی رہائی کے احکامات جب جدہ جیل کے پاکستانی قیدیوں تک پہنچے تو جذباتی منظر دیکھنے میں آیا، کئی قیدی آبدیدہ ہوگئے تھے۔
سعودی عرب میں قید 2107پاکستانی قیدیوں کی رہائی کے لیے شاہی فرمان جاری
ولی عہد کے حکم کے بعد ریاض کے سفارت خانے اور جدہ قونصل خانے کو فہرستیں مرتب کرنے کی ہدایت بھی کی جا چکی ہے۔
خیال رہے کہ ان پاکستانی قیدیوں پر زیادہ تر مقدمات کفالہ نظام اور معاہدوں کی خلاف ورزی کے ہیں۔
